މުއިއްޒު ހުވާ ކުރައްވާ ޖަލްސާގައި ނަޝީދު ރިޔާސަތު ބަލަހައްޓާނަމަ އިހުތިޖާޖު ކުރާނަން: ނިޔާޒު
އިންތިޚާބީ ރައީސް ހުވާ ކުރުމުގެ ރަސްމިއްޔާތުގެ ރިޔާސަތު މަޖިލީހުގެ ރައީސް މުހައްމަދު ނަޝީދު ބަލަހައްޓަވާނަމަ ލ އެމް.ޑީ.ޕީ މެންބަރުން އިހުތިޖާޖު ކުރައްވާނެ ކަމަށް ހުޅުމާލެ ދާއިރާގެ މެމްބަރު އަލީ ނިޔާޒް ވިދާޅުވެއްޖެއެވެ.
މިފަދައިން އަލީ ނިޔާޒް ވިދާޅުވެފައި ވަނީ އެބޭފުޅާ ކުރެއްވި ޓްވީޓެއްގައެވެ.
"ސުޕްރީމްކޯޓުގެ ހުކުމާއެކު އިންތިޚާބީ ރައީސް ހުވާ ކުރުމުގެ ރަސްމިއްޔާތުގެ ރިޔާސަތު ބަލަހައްޓަނީ މަޖްލިސް މެމްބަރުންގެ އިތުބާރުނެތް ރިޔާސަތެއް ކަމުގައިވާނަމަ އެކަމަށް އެމް.ޑީ.ޕީ އިން އިހުތިޖާޖު ކުރާނެ." ނިޔާޒް ވިދާޅުވިއެވެ.
އަދި މި އިހުތިޖާޖު ކުރާނެ ގޮތުގެ ތަފްސީލް ނިންމާނީ އެމް.ޑީ.ޕީ ޕީޖީ އިން ކަމަށް ވެސް އަލީ ނިޔާޒް ކުރެއްވި ޓްވީޓްގައި ވެއެވެ.
ނިޔާޒް ގެ އިތުރުންވެސް ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދެވޭނެކަމަށް ސުޕްރީމް ކޯޓުން ހުކުމްކޮށްފައިވަނިކޮށް، އެ މައްސަލަ ނުނިންމައި، ނަޝީދު ރިޔާސަތުގައި އިންނަވައިގެން އިންތިޚާބީ ރައީސް ހުވައިކުރައްވާނަމަ، މަޖިލިސް މެޖޯރިޓީ އޮތް އެމްޑީޕީގެ މެމްބަރުން ހުވައި ބަލައިނުގަންނާނެކަމަށް އެ ޕާޓީގެ ޕީޖީ ލީޑަރު މުޙައްމަދު އަސްލަމް ވެސް ވަނީ ވިދާޅުވެފައެވެ.
ސުޕްރީމް ކޯޓުން އިއްޔެ ކުރި ހުކުމުގައި ވެސް ވަނީ ނަޝީދުގެ އިތުބާރު ނެތް ކަމުގެ މައްސަލަ ކުރިއަށް ނުގެންދެވުނު ނަމަވެސް، އިންތިޚާބީ ރައީސް ޑރ. މުޙައްމަދު މުއިއްޒުގެ ހުވާ ކުރެއްވުމަށް ހުރަސްއެޅިގެން ނުވާނެ ކަމަށް ނިންމައިފައެވެ.
މީގެ ކުރިން ހުވާކުރުމުގެ ޖަލްސާއަަށް ހުރަސް އެޅުމުގެ ރޫހު އެމްޑީޕީގެ ޕީޖީން ނުގެންގުޅޭކަމަށް އަސްލަމް ވިދާޅުވި ނަމަވެސް އޭރު ވެސް އަސްލަމްވަނީ މަޖިލީހުގެ ރައީސްގެ އިތުބާރު ނެތްކަމުގެ މައްސަލައެއް އެ އިދާރާއަށް ހުށަހަޅައިފައި ވަނިކޮށް އެ މައްސަލަ ކުރިއަށް ނުގެންގޮސް ބާއްވާ، ޖަލްސާއެއްގައި އިންތިޚާބީ ރައީސް ކުރައްވާ ހުވައަކީ ސައްހަ ހުވައެއް ކަމަށް އެމްޑީޕީގެ ޕީޖީން ގަބޫލު ނުކުރާނެ ކަމަށް ވިދާޅުވެފައެެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
