ރާއްޖޭގައި އެއާ ކާގޯއާ ބެހޭ ގައުމީ ދިރާސާއެއް ކުރުމަށް އެއްބަސްވެއްޖެ

އެއާ ކާގޯއާ ބެހޭ ގައުމީ ދިރާސާއެއް ކުރަން ނިންމާ ރީޖަނަލް އެއާޕޯޓްސް ކޮމްޕެނީ، އާރުއޭސީއެލް އިން ގައުމީ ޔުނިވާސިޓީއާ އެކު އެއްބަސްވުމެއްގައި ސޮއިކޮށްފިއެވެ.

މިއެއްބަސްވުމުގައި ސޮއިކުރުން އޮތީ ޤައުމީ ޔުނިވަސިޓީގައެވެ. މި އެއްބަސްވުމުގައި ރީޖަނަލް އެއާޕޯޓްސް ކޮމްޕެނީ (އާރުއޭސީއެލް)ގެ ފަރާތުން ސޮއިކުރެއްވީ މެނޭޖިން ޑިރެކްޓަރު އަހުމަދު މުބީންއެވެ. އަދި އެމްއެންޔޫގެ ފަރާތުން ސޮއިކުރެއްވީ ވައިސް ޗާންސެލަރު ޑރ. އައިޝަތު ޝެހެނާޒް އަހުމަދެވެ.

މިއަދު މި ސޮއިކުރެވުނު އެއްބަސްވުމާއި ގުޅޭގޮތުން (އާރުއޭސީއެލް) މެނޭޖިން ޑިރެކްޓަރު އަހުމަދު މުބީން ވިދާޅުވީ މި އެއްބަސްވުމުގެ ބޭނުމަކީ އެ ކުންފުނިން ކުރަމުންގެންދާ މަސައްކަތްތައް އިތުރަށް ފުޅާކުރެވެން ހުރި ދާއިރާތައް ހޯދާ އެދާއިރާތަކުން ކުރިއަށް ދިއުމެވެ. އޭގެ އިތުރުން ރާއްޖެއަކީ ކަނޑުގެ ސަރަހައްދު ބޮޑު ޖަޒީރާ ޤައުމަކަށް ވާއިރު ރާއްޖޭގައި ބޭހާއި ކޮންޒިއުމާ ގުޑްސް ފޯރުކޮށްދިނުމުގައި ދިމާވަމުންދާ ދަތިތައް ދެނެގަނެ އެކަންތައްތަކަށް ހައްލެއް ބޭނުންވެފައިވުމެވެ.

މެނޭޖިން ޑިރެކްޓަރު އަހުމަދު މުބީން އިތުރަށް ވިދާޅުވީ ރާއްޖެއަކީ ފަތުރުވެރިކަމަށް ބަރޯސާވެފައިވާ، ގިނަ ރިސޯޓްތަކެއް ހިމެނޭ ޤައުމަކަށް ވުމަކީވެސް މިފަދަ ދިސާއެއްގެ މުހިއްމުކަން އިތުރުވެގެންދާ ކަމެކެވެ.

މި ރަސްމިއްޔާތުގައި ވައިސް ޗާންސެލަރު ޑރ. އައިޝަތު ޝެހެނާޒް އަހުމަދު ވިދާޅުވީ އެއާރ ކާގޯއަކީ ރާއްޖޭގެ އިޤްތިޞާދުގައި މުޙިއްމު ޚިދުމަތަކަށް ވާއިރު މިޚިދުމަތް އިތުރަށް ފުޅާކޮށް ކުރިއެރުވުމަށްޓަކައި މި ދިރާސާއަކީ ވަރަށް މުހިއްމު ބޭނުންތެރި ދިރާސާއަކަށް ވެގެންދާނެކަމަށެވެ.

"މި ދިރާސާއިން ރާއްޖޭގައި މި ވަގުތު އެއާ ކާގޯގެ ހިދުމަތް ފޯޜުކޮށްދިނުމުގެ ހާލަތު ދެނެގަނެވޭނެ. ރާއްޖޭގައި ކާގޯ ރައްކާކުރެވެން ހުރި ފެސިލިޓީތަކާއި އެ ތަންތަނުގެ ކެޕޭސިޓީ އާއި އެއާކާގޯއިން ގެންދާ ކާބޯތަކެތި ރައްކާތެރިކަމާއި އެކު ސްޓޯކުރެވޭނެ އިންތިޒާމުތައް ހުރިތޯ ވެސް ދެނެގަނެވޭނެ،"

ޑރ. ޝެހެނާޒް ވިދާޅުވި އެވެ.

ރައީސުލް ޖުމުހުރިއްޔާ ޑރ.މުހައްމަދު މުއިއްޒުގެ ސަރުކާރު ވެރިކަމަށް އައުމަށް ފަހު ރީޖަނަލް އެއާރޕޯރޓްތަކަށް ދިމާވެފައިވާ ތަފަތު މައްސަލަތައް ހައްލު ކުރުމަށްޓަކައި އާރުއޭސީއެލް އިން އަންނަނީ ވަރަށް ގިނަ މަސައްކަތްތަކެއް ކުރަމުންނެވެ. އެގޮތުން ހަނިމާދޫ އެއާރޕޯޓުގެ ރަންވޭގެ ބޮޑުބައެއް ނިންމާ މިހާރުވަނީ ބޭނުންކުރަން ފަށާފައެވެ.