ޑްރަގް އާއެކު ވިލިނގިލިން ތިން މީހުން ހައްޔަރު ކޮށްފި
މަސްތުވާތަކެތީގެ މައްސަލައެއްގައި ގއ. ވިލިނގިލިން ތިން މީހަކު ހައްޔަރުކޮށްފި އެވެ.
ފުލުހުން އިއްޔެ ވިލިނގިލީގައި ހިންގި އޮޕަރޭޝަނުގައި ހައްޔަރުކޮށްފައިވަނީ ވިލިނގިލި، ޒޫމް، މުހައްމަދު ތަގިއްޔު (25 އ) އާއި، ވިލިނގިލި، އެތެންސް، މުހައްމަދު އަތޫފް ހަބީބް (24 އ)ގެ އިތުރުން ގދ. ގައްދޫ، ވިލަސް، މުހައްމަދު ޒަހުވާން (23 އ) އެވެ.
ފުލުހުން ބުނެފައިވާ ގޮތުން، އެ ތިން މީހުން ހައްޔަރު ކުރުމަށްފަހު އެތަނުން އެކަކު ދިރިއުޅޭ ގެ ބަލައި ފާސްކޮށް، އަދި އެތަނުން މަސްތުވާތަކެތި ކަމަށް ބެލެވޭ އެއްޗެއްހުރި ހަތް ރަބަރު ޕެކެޓާއި، ހަތަރު ރަބަރުކޮޅާއި، ސެލޯފިންކޮޅެއްގެ އިތުރުން ބަނގުރާ ކަމަށް ބެލެވޭ އެއްޗެއް ހުރި 20 ލީޓަރުގެ ހަމެއް ހޯދާފައިވެ އެވެ.
އަދި މި މީހުންގެ ބަންދާ މެދު ގޮތެއް ނިންމުމަށް ވިލިނގިލި މެޖިސްޓްރޭޓް ކޯޓަށް ހާޒިރުކުރުމުން އަތޫފް 15 ދުވަސް ތަގިއްޔުއާއި ޒަހުވާންގެ ބަންދަށް ވަނީ 10 ދުވަސް ދީފައިވާ ކަމަށްވެސް ބުންޏެވެ.
ފުލުހުން ދަނީ މިމައްސަލަ އިތުރަށް ތަހުގީގު ކުރަމުން ކަމަށްވެސް ފުލުހުން ބުނެފައިވެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
