ދަރިފުޅުގެ ކައިވެނި ހަފްލާ ހޮސްޕިޓަލުގައި؛ ސޯދުބެގެ ހާސް ޝުކުރު އައިޖީއެމްއެޗް އަށް!

ބަލި ހާލަތު ހުރިގޮތުން ހަގު ދަރިފުޅުގެ ކައިވެނި ހަފްލާގައި ބައިވެރި ނުވެވިދާނެ ކަމުގެ ހިތާމައިގައި އޮތް ދަނޑިވަޅުގައި އައިޖީއެމްއެޗް އިން ވެދިން އެހީއަށް ޝުކުރު އަދާކުރައްވައި ދިވެހި ބަހުގެ އުސްތާޒު ސޯދިގު (ސޯދުބެ)ގެ އިހްސާސްތައް ބަންޑުން ކޮށްލައްވައިފިއެވެ.

އައިޖީއެމްއެޗް އިން ދިން ޚިދުމަތާއި ބެހެއްޓި ގާތް ކަމަށް ޝުކުރު އަދާކޮށް، ސޯދުބެ ލިޔުއްވާފައިވާ ލިޔުން، އެ ހޮސްޕިޓަލުން މީސްމީޑިއާގައި އާއްމުކޮށްފައިވާއިރު، ޝުކުރުގެ އެ ލިޔުންކޮޅުގައި ސޯދުބެ ވަނީ އެބޭފުޅާ އަކީ އައިޖީއެމްއެޗް ގެ ފްރީކްއެންޓް ކަސްޓަމާރ ޑިސްކައުންޓް ލިބެންޖެހޭ މީހެއްކަން ޔަގީން ކުރައްވާކަމަށް ވިދާޅުވެފައެވެ.

އޭގެ ސަބަބެއްގެ ގޮތުގައި ސޯދުގެ ވިދާޅުވީ، އައިޖީއެމްއެޗްގެ ވޯޑުގައި އެ ބޭފުޅާ ނުބާއްވާ ކޮޓަރިއެއް ނެތް ކަމަށާ، އަދި އެ ހޮސްޕިޓަލުން އެބޭފުޅާ އަށް ފަރުވާ ނުދެއްވާ ނަރުހެއް އަދި ޑޮކްޓަރެއް މަދުވާނެ ކަން ޔަގީންވާތީއެވެ.

އެހެންނަމަވެސް، އެހެން ފަހަރުތަކާއި، އެންމެ ފަހުން އެޑްމިޓް ކުރެވުނު ފަހަރާއި ވަރަށް ތަފާތުކަން ފާހަގަކުރައްވައި ސޯދުބެ ވަނީ އެފަހަރުގެ ހަނދާންތައް ތާ އަބަދު ހުންނާނެކަމަށް ވިދާޅުވެފައެވެ.

އެގޮތުން ސޯދުބެ ވިދާޅުވީ، އެބޭފުޅާގެ ހަގު ދަރިފުޅު ކައިވެނިކުރަން ދެ ހަފްތާއަށް ވެފައި ވަނިކޮށް ހާލު ދެރަވެގެން ހޮސްޕިޓަލަށް ގެނެސް އެޑްމިޓް ކުރި ދުވަހުން ފެށިގެންވެސް އައިޖީއެމްއެޗްގެ މުވައްޒަފުންގެ ފަރާތުން ދިން ޚިދުމަތަށް ހިތުގެ ފުންމިނުން ޝުކުރު އަދާކުރަންޖެހޭ ކަމަށެވެ.

"މިއީ އުމުރުން މިހައި ހިސާބަށް އާދެވުނު އިރުވެސް ނުފެންނަ އޯގާތެރިކަން ފެނުނު ފަހަރެއް.  ގެއާއި މިހައި ދުރުގައި ހުންނަން އަނެއްކާވެސް ޖެހުނު ހިނދު އަނބުރައި ދާހިތް ނުވި ފަހަރެއް. މައިގަނޑު ސަބަބަކީ ތިޔަ ދެއްވި ލޯތްބާއި ޚިދުމަތެވެ. ހިތާއި އަމަލުން ފެނުނު ކުލުނެވެ. މިހެން ނުދެންނެވެންވީ ސަބަބެއް ނެތްތާއެވެ. ތިޔަ ދެއްވި ހަލުވި ފަރުވާގެ އިތުރަށް އަޅުގަނޑުގެ އެންމެ ހަގު ދަރިފުޅުގެ ކައިވެނި ވެސް މިތަނުގައި ކުރުމަށް މަގުފަހި ކޮށްދެއްވި ކަމަށްޓަކައި ހޮސްޕިޓަލްގެ އިސްވެރިންނަށް ހިތުގެ އެންމެ ފުންމިނުން ލޯތްބާއެކު ޝުކުރު ދަންނަވަމެވެ. އެ ދުވަސްވެސް ފެނި އެ އުފަލުގައިވެސް ބައިވެރި ވެވުނީ ތިޔަ ޚިދުމަތްތެރީންގެ ސަބަބުންނެވެ."

ސޯދުބެ އައިޖީއެމްއެޗް އަށް ޝުކުރުއަދާކުރައްވައި ލިޔުއްވާފައިވެއެވެ.

ސޯދުބެ އިތުރަށް ވިދާޅުވީ، އެ ދުވަހު އެވީ އުފައު ލިޔުމަކުން ބަޔާން ކޮށްދެއްވަންވެސް ނޭނގޭ ކަމަށާ، އެބޭފުޅާ ހެޔޮހާލުގައި ހުންނެވީ މާތް ރަސްކަލާނގެ ރަހުމަތާއި، އައިޖީއެމްއެޗް ގެ ޚިދުމަތްތެރީންގެ މަސައްކަތުން ކަމަށެވެ.

ދިވެހި ބަހުންނާއި އިނގިރޭސި ބަހުންވެސް އައިޖީއެމްއެޗް އަށް ޝުކުރު އަދާކުރައްވައި ސޯދުބެ ފޮނުއްވި މި ލިޔުން ޓުވީޓް ކުރައްވައި އައިޖީއެމްއެޗް އިންވެސް ވަނީ އެ ހޮސްޕިޓަލުގެ ޚިދުމަތްތައް ބަލައިގަތް ކަމަށްޓަކައި ސޯދުބެއަށް ޝުކުރު އަދާކޮށްފައެވެ.