މަސްތުވާތަކެއްޗާއި ދެކޮޅަށް އެއްވެސް ސަރުކާރަކުން ނުކުރާ މަސައްކަތްތައް މި ސަރުކާރުން ކޮށްފި: އިކްރާމު

މަސްތުވާތަކެއްޗާއި ދެކޮޅަށް އެއްވެސް ސަރުކާރަކުން ނުކުރާ މަސައްކަތް މި ސަރުކާރުންކޮށްފައިވާކަމަށް ރައްޔިިތުންގެ މަޖިލީހުގެ ދިއްގަރު ދާއިރާގެ މެމްބަރު އިކްރާމް ހަސަން ވިދާޅުވެއްޖެ އެވެ.

އިކުރާމު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ނެވެ.

އިކުރާމުގެ ވާހަކައިގައި ވަނީ މި ސަރުކާރުން މަސްތުވާތަކެއްޗާއި ދެކޮޅަށް ކުރެވިފައިވާ ބައެއް މަސައްކަތްތައް ތަފާސް ހިސާބުގެ އަލީގައި ވިދާޅުވެދެއްވާފަ އެވެ.

އެގޮތުން އޭނާ ވިދާޅުވީ ރައީސް އިބްރާހިމް މުޙައްމަދު ޞާލިހުގެ ވެރިކަމުގެ ކުރިން ފާއިތުވި 10 އަހަރުގައިވެސް މަސްތުވާތަކެތީގެ ހާލަތު ރާއްޖޭގައި އޮތް މިންވަރު ދެނެގަތުމަށް ދިރާސާއެއް ހަދާފައި ނުވާކަމަށެވެ.

މަސްތުވާތަކެތީގެ ވަބާއިން އަރައިގަތުމަށް ބޭނުންޖެހިފައިވާ ފަރާތްތަކަށް ފަރުވާ ފޯރުކޮށްދިނުމުގައިވެސް ކުރީ ސަރުކާރުތަކުން ބޮޑެތި އިހުމާލުތަކެއް ވެފައިވަނިކޮށް، މި ސަރުކާރުން އައިސް އެ ފަރާތްތަކަށް ޖަލުތަކުގައިވެސް ފަރުވާ ފޯރުކޮށްދެމުންދާކަމަށް އިކުރާމު ވިދާޅުވި އެވެ.

"300 އަށްވުރެ ގިނަ މީހުންނަށް އެކަށީގެންވާ ފަރުވާ ނުދީ ކުރީ ސަރުކާރުން ވަނީ ޖަލަށް ލާފައި. އެމީހުންނަށް ފަރުވާ މި ސަރުކާރުން ވަނީ ޖަލުގައި ހަމަޖައްސާދީފަ. 80 ޕަސެންޓު މީހުންނަކީ ރީހެބްނެތި ޖަލަށް ލާފައިވާ މީހުން، އެހެންކަމުން މި ސަރުކާރުން ވަނީ ޖަލުން އެ ފަރުވާ ލިބޭނެ އިންތިޒާމު ހަމަޖައްސާދީފަ"

ދިއްގަރު ދާއިރާގެ މެމްބަރު އިކްރާމް ހަސަން

އިކުރާމު ވިދާޅުވީ ފަރުވާ ޕްރޮގްރާމުގެ ތެރެއިން ބައެއް ޓްރީޓްމަންޓުތައް މި ސަރުކާރު އައިރު އޮތީ ހުއްޓިފައި ކަމަށެވެ. އެކަންކަން އަލުން ފަށައިގަނެ ދާއިރާއިން މީހުން ބިނާކުރުމަށްވެސް ސަރުކާރުން ބޮޑެތި މަސައްކަތްތަކެއް ކޮށްފައިވާކަމަށް އިކުރާމުގެ ވާހަކައިގައި ފާހަގަކުރެއްވި އެވެ.

އޭގެ އިތުރުން ލާމަރުކަޒީ ނިޒާމުގެ ތެރެއިން މަސްތުވާތަކެތީގެ ވަބާއިން އަރައިގަތުމަށް ފަރުވާ ދޭން ފެށީވެސް މި ސަރުކާރުންކަމަށް އޭނާ ވިދާޅުވި އެވެ.

އެކަންކަން ފާހަގަކުރައްވާ އިކުރާމު ވިދާޅުވީ މަސްތުވާތަކެއްޗާއި ދެކޮޅަށް މި ސަރުކާރުން އެކަށީގެންވާ މަސައްކަތްތަކެއް ނުކުރާކަމަށް ބުނާ މެމްބަރުން ވާހަކަދައްކަވަމުން ދަނީ ހަގީގަތާއި ދެކޮޅަށް ކަމަށެވެ. އަދި އަމިއްލަފުޅަށް ދިރާސާތައް ހެއްދެވުމުން މި ސަރުކާރުން މަސްތުވާތަކެއްޗާއި ދެކޮޅަށް ކުރަމުންދާ މަސައްކަތް ފެނިވަޑައިގަންނަވާނެކަމަށް އޭނާ ވަނީ ވިދާޅުވެފަ އެވެ.