52 މިލިއަން ދެއްކުމަށް ރައީސް ޔާމިނުގެ މައްޗަށް ކުރި އަމުރު ހައިކޯޓުންބާތިލުކޮށްފި

ވ. އާރަށުގެ މައްސަލައިގެ ހުކުމް ކުރިތާ 62 ދުވަސް ފަހުން 52 މިލިއަން ރުފިޔާ ދައުލަތަށް ދެއްކުމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް ކްރިމިނަލް ކޯޓުން ކުރި ހުކުމް ހައިކޯޓުން ބާތިލުކޮށްފި އެވެ.

52 މިލިއަން ރުފިޔާ ދެއްކުމަށް ކްރިމިނަލް ކޯޓުން ރައީސް ޔާމިނުގެ މައްޗަށް ކުރި އަމުރު އެމަނިކުފާނުގެ ފަރާތްޕުޅުން ހައިކޯޓުގައި އިސްތިއުނާފު ކުރަމުން ވަނީ އެއީ ގާނޫނާ ޚިލާފު އަމުރެއްކަމަށް ކަނޑައަޅުއްވައި ދެއްވުމަށް އެދިވަޑައިގެންފަ އެވެ.

މި އަމުރު ނެރެފައިވަނީ މި މައްސަލައިގެ ފުރިހަމަ ރިޕޯޓު ދޫކޮށް، އިސްތިއުނާފުކުރުމަށްވެސް ހުށަހެޅިފަހުންކަން ފާހަގަކޮށް ވަކީލުން ވިދާޅުވީ، މި އަމުރަކީ މައްސަލައިގެ ތެރޭގައި ހިމެނޭ އަމުރެއްނަމަ، މައްސަލައިގެ ފުރިހަމަ ރިޕޯޓާއި ލިއުންތައް ދޫކުރިއިރު މި އަމުރު ހިމެނޭނެކަމަށެވެ.

އެ މައްސަލައާއި ގުޅޭގޮތުން މިއަދު ހައިކޯޓުގައި ހުކުމްކުރި މަޖިލީހުގައި މައްސަލަ ބެއްލެވި ފަނޑިޔާރުން ވިދާޅުވެފައިވަނީ ޖިނާއީ އިޖްރައާތުގެ ގާނޫނު އޮތްގޮތުން ކުށްކޮށްގެން ހޯދާ މުދަލާއި ފައިސާ ދައުލަތަށް ނަގަން އަމުރު ކުރެވޭނީ ހުކުމް ކުރާ ވަގުތާއި އަދި ފަހުން ފެންނަ މުދަލާއި ފައިސާއެއް ނަމަ ފަހުން ނެރޭ އަމުރެއްގެ ދަށުން ކަމަށެވެ.

ރައީސް ޔާމީންގެ މައްސަލާގައި ކުށްކޮށްގެން ހޯދި ފައިސާއަކީ ކޮބައިކަން ދައުވާގައި ހިމަނާފައި ވިޔަސް، އެ މައްސަލާގައި ހުކުމްކުރި ވަގުތު އެ ފައިސާ ދައުލަތަށް ނަގަން އަމުރު ކޮށްފައި ނުވާ ކަމަށާއި، އެހެންކަމުން ފަހުން ނެރުނު އަމުރެއްގެ ދަށުން އެ ފައިސާ ދައްކަން އަންގަންޖެހޭ ސަބަބެއް ނެތްކަމަށް ހައިކޯޓުގެ ހުކުމުގައި ބުނެފައިވެއެވެ.

ހުކުމުގައި ހައިކޯޓުން ބުނީ 52 މިލިއަން ދެއްކުމަށް ކްރިމިނަލް ކޯޓުން އަމުރު ނެރުނުއިރު ކުރިން އެކަމާއި ގުޅިގެން ވާހަކަދެއްކުމުގެ ފުރުސަތު ރައީސް ޔާމިނަށް ލިބިފައި ނުވާކަމަށެވެ. އަދި ހުކުމް ކުރިތާ ދެ މަސް ދުވަސް ފަހުން އެފަދަ އަމުރެއް ނެރެދެން އެދުނު މަޤުބޫލު ސަަބަބެއްވެސް ދައުލަތަށް ބުނެދެވިފައި ނުވާކަމަށެވެ.

އެހެންކަމުން 52 މިލިއަން ރުފިޔާ 6 މަސް ދުވަސްތެރޭ ދެއްކުމަށް ކްރިމިނަލް ކޯޓުން ކުރި އަމުރަކީ ބާތިލް އަމުރެއްކަމަށް ހައިކޯޓުން ވަނީ ކަނޑައަޅާފަ އެވެ.

މިދިޔަ ޑިސެމްބަރުމަހު އާރަށު މައްސަލައާއި ގުޅުވާ ރައީސް ޔާމިނަށް އިއްވި ހުކުމް އެމަނިކުފާނުގެ ފަރާތްޕުޅުން ހައިކޯޓުގައި އިސްތިއުނާފުކޮށްފައިވާ އިރު، މިހާރު އެ މައްސަލަވެސް ހައިކޯޓުން ވަނީ ބަލައިގެންފަ އެވެ.