ލަންކާގެ 50000 ރުއް އިންދައިދިނުމަށް ރާއްޖެއިން އެދިއްޖެ
ދިވެހިރާއްޖޭގައި ސްްރީލަންކާގެ ކޮކޮނަޓް ރިސާޗް އިންސްޓިޓިއުޓް (ސީއާރްއައި) ގައި އުފައްދާ މަތީ ފެންވަރުގެ "ހައިބްރިޑް" ރުކުގެ 50000 ރުއް އިންދައިދިނުމަށް ރާއްޖެއިން އެދިއްޖެއެވެ.
އެގޮތުން ސްރީލަންކާގެ ހަބަރު ފަތުރާ ވަސީލަތްތަކުން ރިޕޯޓް ކޮށްފައިވާ ގޮތުގައި އެ ގައުމުގެ އިންޑަސްޓްރީޒް އެންޑް ޕްލާންޓޭޝަން މިނިސްޓަރ ޑރ. ޕަތިރަނާގެ އަރިހުން މި ފަދައިން އެދިފައިވަނީ ރާއްޖޭގެ އެގްރިކަލްޗަރަލް މިނިސްޓަރ ޑރ. ހުސައިން ރަޝީދު ހަސަންއެވެ.
އަދި މިނިސްޓަރ ރަޝީދު މިފަދައިން އެދިފައިވަނީ ސްރީލަންކާގެ ޕްލާންޓޭޝަން މިނިސްޓްރީގައި ކުރިއަށް ގެންދިޔަ ހާއްސަ ބައްދަލުވުމެއްގައި ދެ މިނިސްޓަރ ބައްދަލުވުމުން ކަމަށް އެ ޚަބަރުގައި ވެއެވެ.
އެގޮތުން ސްރީ ލަންކާގެ އިންޑަސްޓްރީޒް އެންޑް ޕްލާންޓޭޝަން މިނިސްޓަރ ޑރ. ޕަތިރަނާ މިކަމާއި ގުޅިގެން ވިދާޅުވެފައިވަނީ ސީއާރްއައި އާއި ކޮކޮނަޓް ކަލްޓިވޭޝަން ބޯޑުގެ މަޝްވަރާއާއިއެކު މިކަމަށް ބޭނުންވާ ވަސީލަތްތައް ރާއްޖެއަށް ފޯރުކޮށްދޭނެ ކަމަށެވެ.
މިއާއިއެކު މުސްތަގްބަލުގައި ކާށިއާއި ކާށީގެ މައްޗަށް ބިނާވާ ސިނާއަތްތައް އެ ގައުމުގެ ސައި ފަތް ވިޔަފާރިއަށް ވުރެ ކުރިއަރައި ދިޔުމުގެ ގާބިލްކަން ހުރި ކަމަށް ވެސް އޭނާ ފާހަގަކުރެއްވިއެވެ.
މީގެ އިތުރުން ރާއްޖޭގެ އެގްރިކަލްޗަރަލް މިނިސްޓަރ ފާހަގަކުރައްވާފައިވަނީ މިވަގުތަށް ރާއްޖޭގެ ފަތުރުވެރި ކަމުގެ ސިނާއަތަށް ބޭނުންވާ ކާށީގެ އުފެއްދުންތައް އެތެރެކުރަނީ އިންޑޮނޭޝިއާއިން ކަމަށެވެ.
އަދި މިނިސްޓަރ ވަނީ ސްރީލަންކާގެ ފަތުރުވެރިކަމާއި މަސްވެރިކަމުގެ ސިނާއަތް ކުރިއެރުވުމަށް ބޭނުންވާ ތަމްރީނާއި ވަޒީފާގެ ފުރުސަތުތައް ފޯރުކޮށްދިނުމަށް ބޭނުންވާ އެއްބާރުލުން ރާއްޖެއިން ދޭނެ ކަމުގެ ޔަގީންކަން ދެއްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
