މާލޭ ޕާކިންގް މައްސަލަ ހައްލު ނުވަނީ ޕާކިންގް ބިލްޑިންގް އަޅަށް ސަރުކާރުން ހުރަސް އަޅާތީ: މޭޔަރު މުޢިއްޒު

މާލޭ ޕާކިންގް މައްސަލަ ހައްލު ނުވަނީ ޕާކިންގް ބިލްޑިންގް އަޅަށް ސަރުކާރުން ހުރަސް އަޅާތީ ކަމަށް މާލޭ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.

މުއިއްޒު މިހެން ވިދާޅުވީ، ކާރާއި ސައިކަލު ޕާކިންއަށް ތަފާތު ކުރާތީ، އެކަމާ އަލީ ރަމީޒު ނުރުހުން ފާޅުކޮށް، ކޮށްފައިވާ ޓުވީޓަށް ދިން ރައްދެއްގައެވެ.

ޕާކިންގް މައްސަލައިގައި އަލީ ރަމީޒު ބުނީ، ސައިކަލުވެސް ދުއްވަނީ ބަރާބަރަށް އަހަރީ ފީ ދައްކައިގެން ކަމަށާއި ނަމަވެސް ސައިކަލު ޕާކު ކުރުމަށް އެކަށީގެންވާ ވަރަށް ޖާގަ ނެތް ކަމަށެވެ.

"އަޅުގަނޑުމެންވެސް ސައިކަލް މި ދުއްވަނީ ގަވާއިދުން އަހަރުން އަހަރަށް ފީތައް ދައްކައިގެން. މާލޭގައި ސައިކަލު ޕާކު ކުރާނެ ޖާގައެއް ހޯދުމަކީ އިންތިހާއަށް އުނދަގޫކަމެއް. ޖާގަ ނުލިބިގެން ބައެއް ފަހަރަށް ކޮށި ވަށާ ދެތިންބުރު ޖަހަން އެބަޖެހޭ. ޕާކް ކުރާނެ ޖާގަ ނުލިބުނީމަ ދެން ޕާކު ކުރަން މަޖުބޫރުވަނީ ގަވާއިދާ ހިލާފަށް"

އަލީ ރަމީޒު ބުންޏެވެ.

އެއާ ޚިލާފަށް ކާރުތައް ގަރާޖުގައި ރަޖިސްޓްރީ ކޮށްފައި ހުންނައިރުވެސް އަދި ކާރުތަކަށް ޕާކިންގް ޒޯން ދޫކުރާ ކަމަށް އަލީ ރަމީޒު ބުންޏެވެ.

"ސުވާލަކީ ބައެއް ޕްރައިވެޓް ކާރާއި ޓެކްސީތަކުގެ ނަންބަރުބޯޑު ބިންމަތީގައި ޖަހާފައި އެމީހުންނަށް ޕާކިން ޒޯން ކުއްޔަށް ދީ، ހާއްސަ ކޮށްދޭއިރު، އެ ފުރުސަތު ސައިކަލްތަކަށް ނެތީ ކީއްވެތޯ؟"

އަލީ ރަމީޒު ސުވާލު އުފެއްދިއެވެ.

އޭނާ ބުނީ މަގުތަކަކީ ވަކި ބައެއްގެ މިލްކެއް ނޫން ކަމަށެވެ.

"އެއީ އެންމެންގެ ހައްގެއް. ކޮންމެ ކާރަކަށް ގަރާޖެއް ރަޖިސްޓްރީ ކޮށްފަ އޮންނައިރުވެސް މަގުމަތިން ޕާކިން ޒޯން މިދެނީ ކާރަށް. ވަކި ބަޔަކަށް ވަކި ހާއްސަ އިމްތިޔާޒުތަކެއް ދީފަ މިވަނީ ކީއްވެތޯ؟" އަލީ ރަމީޒް ބުނެފައި ވެއެވެ.

އެ ޓުވީީޓަށް ރިޕްލައި ކުރަމުން މުއިއްޒު ވިދާޅުވީ، މާލޭގައި އިމާރާތް ކުރަން ތައްޔާރުވި ޕާކިންގް ބިލްޑިންގްއަށް ސަރުކާރުން ހުރަސް ނޭޅި ނަމަ، މަދުވެގެން 6 ޕާކިންގް ބިލްޑިންގް މާލޭގައި އިމާރާތް ކުރެވިފައި ހުންނާނެ ކަމަށެވެ.

"މާލޭގެ ޕާކިންގް މައްސަލަ ހައްލު ނުކުރެވި ލަސްވަނީ ޕާކިންގް ބިލްޑިންގްތައް އެޅުމަށް ކައުންސިލްއިން ކުރަމުންދާ މަސައްކަތްތަކަށް ސަރުކާރުން ހުރަސްއަޅަމުން ގެންދާތީ"

މުއިއްޒު ވިދާޅުވިއެވެ.

މީގެ އިތުރުން މުއިއްޒު ވިިދާޅުވީ، މަގުމަތިން ކުއްޔަށްދޭ ސްލޮޓްތަކަކީ ޕާކިންގް ބިލްޑިންގްތަކުގެ ތެރެއަށް ބަދަލު ކުރުމަށް އޭރުވެސް ނިންމާ އިއުލާނު ކުރެވިފައިވާ، ވަގުތީ ސްލޮޓްތަކެއް ކަމަށެވެ.