އެމްޑީޕީގެ އެދުމަށް ރައީސް ނަޝީދުގެ އިތުބާރު ނެތް ކަމުގެ މައްސަލަ ކުރިއަށް ނުގެންގޮސް މަޖިލިސް މެދުކަނޑާލައިފި!

ވެރިކަން ކުރާ މައި ޕާޓީ، އެމްޑީޕީގެ މެންބަރުންގެ އެދިލެއްވުމަށް ރައްޔިތުންގެ މަޖިލީހުގެ ރައީސް، މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ނުގެން ގޮސް މަޖިލިސް މެދުކަނޑާލައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގެ އެޖެންޑާގައި ހިމެނިފައި އޮތީ ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ކުރިއަށްގެންދާނެ ގޮތަކާއިމެދު ގޮތެއް ނިންމުމެވެ.

މި ޖަލްސާ ފައްޓަވަމުން ރިޔާސަތުގައި އިންނަވައި ރައީސް ނަޝީދު ވިދާޅުވީ، މިއަދަށް އެ މައްސަލަ އެޖެންޑާ ކޮށްފައިވަނިކޮށް، އެ މައްސަލައިގައި ސޮއި ކުރެއްވި މެންބަރުންގެ ތެރެއިން 25 ބޭފުޅަކު ނަން އަނބުރާ ގެންދަވާފައިވާކަމަށެވެ.

މި މައްސަލަ ކުރިއަށް ގެންދިޔުމަށް 22 ބޭފުޅުންގެ ސޮއި ބޭނުންވޭ. އެހެންވީމާ އަދި 22 ބޭފުޅުންގެ ސޮއި އޮތުމާއިއެކު މައްސަލަ ކުރިއަށް ދާނެ. އިތުރު 8 ބޭފުޅަކުގެ ސޮއި އަނބުރާ ނުގެންދަވަނީ ނަމަ، މައްސަލަ ކުރިއަށް ގެންދެވޭނެ.

މަޖިލީހުގެ ރައީސް މުހައްމަދު ނަޝީދު

އެހެންކަމުން ނަޝީދު ވަނީ އެ މައްސަލަ ކުރިއަށް ގެންދިއުމަށްޓަކައި ވިލުފުށީ ދާއިރާގެ މެންބަރު ޙަސަން އަފީފާ ރިޔާސަތު ޙަވާލު ކުރައްވާފައެވެ.

އަފީފު ރިޔާސަތަށް ވަޑައިގެންނެވުމުން، މައްސަލަ އާއި ގުޅޭގޮތުން މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) ވާހަކަ ދައްކަވަމުން ވިދާޅުވީ އެމްޑީޕީގެ ޕީޖީ ގްރޫޕުން އެ މައްސަލަ އަނބުރާ ގެންދިއުމަށް ފާސްކޮށްފައިވާކަމަށެވެ.

އަޅުގަނޑަށް ހީވަނީ އީދާރީ ގޮތުން ކުޑަ އޮޅުމެއް އުޅޭހެން. މެންބަރުންގެ ސޮއި ހަމަ ވެފައި އޮތީ. އެހެންވީމާ މިހާރު އޮތް 25 ގެ އިތުރަށްވެސް ބޭނުންވާ ސޮއި ލިބިފައި އޮތަތީވެ، އިތުރަށް ދެން ބަހުސްކޮށްގެން މައްސަލަ ކުރިއަށް ގެންދާނެ ހާލަތެއް އޮތް ކަމަށް ނުފެނޭ. ޕީޖީ ގުރޫޕުގެ އަގުލަބިއްޔަތުން ޕީޖީ ގުރޫޕުން ފާސްކޮށްގެން. ސޮއި ހަމަ ނުވާ ކަމަށް ފެންނަންޏާ މިހާރުވެސް އެކަން ކުރެވޭނެ.

މަރަދޫ ދާއިރާގެ މެންބަރު އިބްރާހީމް ޝަރީފް

ޝަރީފް މިހެން ވިދާޅުވުމުންވެސް އަފީފު ވަނީ އެ ވިދާޅުވާ އަދަދަށް މެންބަރުން ސޮއި ނުގެންދަވާ ކަމަށާ، އެހެންކަމުން އެ މައްސަލަ ކުރިއަށް ގެންދަވާނެ ކަަމަށެވެ.

މިއާއެކު ނިޒާމީ ނުކުތާ ނަންގަވައި ކުޑަހުވަދޫ ދާއިރާގެ މެންބަރު އާމިރު ވަނީ އާންމުކޮށް މިފަދަ މައްސަލަތަކުގައި މަޖިލީހުން އަމަލުކުރާ ގޮތާއި ޚިލާފަށް ހޯމަ ދުވަހުގެ ޖަލްސާގެ ކަންކަން ކުރިއަށްދާތީ އެކަމުގެ ކަންބޮޑުވުން ފާޅުކުރައްވާފައެވެ.

އެއަށްފަހު މަވޯޓާ ޝަރީފު ވަނީ، އިދާރީ ގޮތުން ކުރަންޖެހޭ ކަންކަން ކޮށް، މަދުވާ ސޮއިތައް ހަމަ ކުރެއްވުމަށް އެ ޕާޓީއަށް އިތުރު ވަގުތު ދެއްވުމަށް މަޖިލިސް މެދުކަނޑާލުމަށް އެދިލައްވާފައެވެ.

އެހެން ރިޔާސަތުން ވަނީ މަޖިލިސް ކުޑަ ވަގުތުކޮޅަކަށް މެދުކަނޑާލާފައެވެ.