މޮރޮކޯ ބިންހެލުން: 18،000 އަށްވުރެ ގިނަ އާއިލާއަށް އަސަރުކުރި

ހުކުރު ދުވަހުގެ ރޭ މޮރޮކޯއަށް އައި 6.8 މެގްނެޓިޔުޓްގެ ބިންހެލުން ތަކުގެ ސަބަބުން 18،000 އާއިލާއަށް އަސަރުކޮށްފައިވާ ކަމަށް މޮރޮކޯގެ ޤައުމީ ޓީވީއިން ބުނެފިއެވެ.

މޮރޮކޯގެ ސެނެޓަރެއް ކަމަށްވާ ލައްސާން ހައްދާދް އަލްޖަޒީރާ އާއި ވާހަކަ ދައްކަވަމުން ބިންހެލުމުގެ ސަބަބުން ގެއްލުން ވެފައިވާ ފަރުބަދަމަތީ ސަރަހައްދުތަކުގައި ހުރި އަވަށްތަކަށް އެހީތެރިކަން ފޯރުކޮށް ދިނުމުގައި އުނދަގޫތަކެއް ހުރި ކަމަށެވެ.

"އަވަށްތަކާއި ގުޅުވައިދޭ މަގުތައް ނުހަދައި ހުރުމުން ބައެއް ފަހަރު މީހުން އުޅޭ ސަރަހައްދަށް އެހީ  ފޯރުމަށް އެބަޖެހޭ އާރމްޑ ފޯސް ގެންނަން، އެމީހުން ގެނެސްގެން ނޫނީ މީހުން ސަލާމަތް ކުރުމުގެ މަސައްކަތް ނުފެށޭ، އެއްވަގުތެއްގައި މިޖެހެނީ ހުރިހާ ކަމެއްވެސް ކުރަން، އާރމްޑ ފޯސްގެ އެހީ އާއި ނުލައި އެއްވެސް ކަމެއްވެސް ވާން ނެތީ" ލައްސާން ވިދާޅުވެފައިވެއެވެ.

މަގުތަކަށް އެޅިފައިހުރި ބޮޑެތި ހިލަތައް އެއްފަރާތް ކުރުމަށް ރެސްކިޔު ޓީމް ތަކުން ވަނީ ނުކުޅެދިފައެވެ.

މައްރަކެޝްގެ ދެކުނުން އޮންނަ އަވަށެއް ކަމަށްވާ ތަލާތް ނި ޔައުޤޫބް ގައި ވެއްޓިފައިވާ ޢިމާރާތް ތަކިގެ ދަށުން މީހުން ހޯދުމުގެ މަސައްކަތް ކެތްމަދު ވެފައިވާ ޙާލު ދަނީ ކުރަމުންނެވެ.

އެއަވަށުގެ މުޙައްމަދު އެއިތް އިގްރަހަލް ބުނެފައިވަނީ މިހާތަނަށް އޭނާގެ އާއިލަގެ 9 މީހަކު މަރުވެފައިވާ ކަމަށާއި، ނުފެނިވާ އޭނާގެ ކާފަދަރި ފެންނާނެ ކަމަށް އުންމީދު ކުރާ ކަމަށް އޭނާ ބުނެފައިވެއެވެ.

"އަހަރެންގެ ހިތް ކުދިކުދި ވެއްޖެ، އަހަރެންގެ އަންހެންދަރިފުޅު މަރުވެއްޖެ، އޭނާގެ ކުދިންވެސް މަރުވެއްޖެ، ނުފެނިވަނީ އެންމެ ކުއްޖެއް، އުންމީދު ކުރަނީ އޭނާ ދިރިހުއްޓާ ފެންނާނެ ކަމަށް" މުޙައްމަދު އަލްޖަޒީރާ އަށް ބުނެފައިވެއެވެ.

ނަމަވެސް އެކުއްޖާ ވެސް ވެއްޓިފައިވާ ޢިމާރާތުގެ ދަށުން ނެގިފައިވަނީ މަރުވެފައިވަނިކޮށެވެ.

6.8 މެގްނެޓިޔުޓްގެ ބާރު މިނުގައި އައި މި ބިންހެލުމުގެ ސަބަބުން 2000 އަށް ވުރެ ގިނަ މީހުން ޒަޚަމްވެފައިވާއިރު، 2000 އަށް ވުރެ ގިނަ މީހުން ވަނީ މަރުވެފައެވެ. އަދި މަރުވި މީހުންގެ ޢަދަދު މަތިވަމުން ދާނެ ކަމަށް ވަނީ ލަފާ ކޮށްފައެވެ.