މާލޭ ސިޓީ ކައުންސިލުން ގަސް ވިއްކާ މައްސަލަ ބަލާނެކަމަށް ނިޔާޒުގެ އިންޒާރެއް!

މާލޭ ސިޓީ ކައުންސިލުން ގަސް ވިއްކާ މައްސަލަ ބައްލަވާނެކަމަށް ވިދާޅުވެ ހުޅުމާލޭ ދާއިރާގެ މެމްބަރު އަލީ ނިޔާޒު އިންޒާރު ދެއްވައިފިއެވެ.

ނިޔާޒު މިފަދައިން ވިދާޅުވެފައިވަނީ މިއަދު މަޖިލީހުގައި ކުރިއަށް ދިޔަ ބައްދަލުވުމުގައި އިދާރީ ދާއިރާތައް ލާމަރުކަޒީ އުސޫލުން ހިންގުމުގެގަނޫނަށް އިސްލާހު ގެނައުމަށް ހުށަހަޅާފައިވާ ބިލަށް ބަހުސް ކުރައްވާ ދެއްކެވި ވާހަކައެއްގައެވެ.

އޭނާ ވިދާޅުވީ މާލޭ ސިޓީ ކައުންސިލުން ގަސް ވިއްކުމުގެ ވިޔަފާރި ކުރަމުންދަނީ ގަވައިދާއި ޚިލާފަށްކަމަށެވެ. ސިޓީ ކައުންސިލުން ގަސް ވިއްކުމުގެ ވިޔަފާރީގެ ތެރެއަށް ވަދެފައިވާކަން ފާހަގަކުރައްވާ އެކަމާއި ގުޅިގެން ގިނަ ފާޑުކިޔުންތަކެއްވެސް ނިޔާޒު ވަނީ އަމާޒުކުރައްވާފައެވެ.

އެގޮތުން ނިޔާޒު ވިދާޅުވީ ކައުންސިލްތަކަށް ވިޔަފާރި ކުރެވިދާނެ ކަމަށާއި އެހެން ނަމަވެސް ވިޔަފާރި ކުރަން ވާނީ ލޯކަލް އޮތޯރިޓީ ކުންފުންޏެއް ރަޖިސްޓްރީކޮށް އެ ކުންފުނީގެ ހުއްދަ ލިބިގެން ކަމަށެވެ. އަދި ލާމަރުކަޒީ ގާނޫނުގެ ދަށުން ކައުންސިލްތަކަސް ވިޔަފާރި ކުރެވޭނެ ގޮތަށް ހުއްދަ ދީފައި ވަނީ ސައި ހޮޓާތައް ހިންގުމާއި ކުދި އާންމު ވިޔަފާރިތަކަށް ވަދެވޭ ގޮތަށް ނޫން ކަމަށެވެ.

އޭނާ ވިދާޅުވީ މާލޭ ސިޓީ ކައުންސިލްއިން ވިޔާފަރިކުރަން ރަޖިސްޓްރާ އޮފް ކޮމްޕެނީސްއިން ހުއްދަ ދީފައި ނުވާ އިރު އެ ވިޔަފާރި ކުރަނީ ކޮން އުސޫލަކުން ކަމެއް ނޭނގޭ ކަމަށެވެ.

އެ ވާހަކަތަކާއި ގުޅުވާ އޭނާ ވިދާޅުވީ މާލޭ ސިޓީ ކައުންސިލުން ގަސްވިއްކާ މައްސަލަ ބައްލަވާނެކަމަށެވެ.

މާލޭ ސިޓީ ކައުންސިލްއިން ވަނީ އެ ކައުންސިލްއިން ހިންގަން ނިންމާފައިވާ “އެއް ލައްކަ ގަސް” ޕްރޮގްރާމްގެ ދަށުން ގަސްތައް ބަލަހައްޓައި ހައްދައި ގަސް ވިއްކަން މާލޭގެ ކާނިވާ ސަރަަހައްދުގައި ފިހާރައެއް ހުޅުވާފައެވެ.

މާލޭ ސިޓީ ކައުންސލުން ގަސް ވިއްކާތީ ގިނަ ބަޔަކު ފާޑުކިޔަމުންދާއިރު، އެކަމަށް މާލޭ ސިޓީގެ މޭޔަރު ޑރ މުހައްމަދު މުއިއްޒުވަނީ ރައްދުވެސް ދެއްވާފައެވެ.

މޭޔަރު ވިދާޅުވީ މާލޭ ސިޓީ ކައުންސިލުން ގަސް ވިއްކުމުގެ ވިޔަފާރި ކުރުމަކީ އޭގެ ސަބަބުން އެ ވިޔަފާރިކުރާ އެހެން ފަރާތްތަކަށް ގެއްލުންވާނެ ކަމެއްކަމަށް ގަބޫލުނުކުރައްވާކަމަށެވެ.