ޖުޑިޝަރީ އިސްލާހު ކުރުމުގެ މަސައްކަތަށް ހުރަސް އަޅަނީ މަޖިލީހުގެ ރިޔާސަތުން: ޝަރީފު
ޖުޑިޝަރީ އިސްލާހުކުރުމަށް ރައީސް އިބްރާހިމް މުހައްމަދު ސާލިހުގެ ސަރުކާރުން ކުރަމުންދާ މަސައްކަތްތަކަށް ރައްޔިތުންގެ މަޖިލީހުގެ ރިޔާސަތުންނާއި، ދަ ޑިމޮކްރެޓްސް ގެ މެންބަރުން ހުރަސް އަޅަމުންދާ ކަމަށް މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ތުހުމަތުކުރައްވައިފިއެވެ.
ސަރުކާރުގެ ފަރާތުން ހުށަހަޅާފައިވާ ޖުޑިޝަރީ އިސްލާހު ކުރުމުގެ ބިލަށް ބަހުސް ކުރައްވަމުން މަވޯޓާ ޝަރީފު ވިދާޅުވީ ޖުޑިޝަރީ އިސްލާހުކުރުމަށް ސަރުކާރުން ކުރަމުންދާ މަސައްކަތްތަކަށް ދަ ޑިމޮކްރެޓްސް އަށް ނިސްބަތްވާ މެންބަރުންނާއި މަޖިލީހުގެ ހުރަސް އަޅުއްވަމުންދާ ކަމަށެވެ.
އެގޮތުން، ޖުޑިޝަރީ އިސްލާހުކުރާ ބިލަކީ މިއަހަރުގެ ޖޫން މަހުގެ 19 ވަނަ ދުވަހު މަޖިލީހަށް ހުށައެޅުނު ބިލެއް ކަމަށްވާއިރު، އެ ބިލުގެ ފުރަތަމަ ކިޔުން އިއްވިފައި ވަނީވެސް ސެޕްޓެމްބަރު މަހުގެ ތެރޭގައި ކަން އޭނާ ފާހަގަކުރެއްވިއެވެ. އަދި އެއީ މަޖިލީހުގެ ރިޔާސަތުން ޖުޑިޝަރީ އިސްލާހު ކުރުމަށް ހުރަސް އެޅުމުގެ ގޮތުން ހިންގާފައިވާ އަމަލެއް ކަމަށް އޭނާ ތުހުމަތު ކުރެއްވި އެވެ.
"19 ޖޫން ގައި ހުށަހެޅުނު ބިލެއް، ސެޕްޓެމްބަރު ގައި ފުރަތަމަ ކިޔުން އިއްވުމަކީވެސް މަޖިލީހުގެ ރިޔާސަތުން ކަނޑައެޅިގެން މިކަން ވިޔަ ނުދިނުމަށް ކުރައްވާފައި އޮތް ކަމެއްގެ ގޮތުގައި އަޅުގަނޑު ހިތާމައާއެކު ފާހަގަކުރަން. މި ބިލަށް ބަހުސް ނުކޮށް މަޖިލީހުގެ ތަޅުމަށް ނައިސް އޮތީވެސް ރާވައިގެން ޖުޑިޝަރީ އިސްލާހު ކުރުމަށް ހުރަސް އެޅުމުގެ ގޮތުން."
މަވޯޓާ ޝަރީފު
ޝަރީފް އިތުރަށް ވިދާޅުވީ، މިދިޔަ ފަސް އަހަރު މަޖިލީހުގައި ދެކިފައިވާ އެއް ވާހަކައަކީ ޖޭއެސްސީއަށް ސިޔާސީ ނުފޫޒު ވަދެފައިވާކަމުގެ ވާހަކަ ކަމަށެވެ. އަދި ސިޔާސީ ނުފޫޒު އެތަނަށް ވަނުމުގެ އެންމެ ބޮޑު ނާރެހަކީ މަޖިލީހުގެ ރައީސް މުހައްމަދު ނަޝީދު ޖޭއެސްސީގެ މެމްބަރެއްގެ ގޮތުގައި ހުންނަވާ ހުންނެވުމާއި ސިވިލް ސާވިސް ކޮމިޝަންގެ މެމްބަރެއްގެ ގޮތުގައި ހުންނެވުންކަމަށް ޝަރީފް ވިދާޅުވިއެވެ.
އެހެންކަމުން ވީހާވެސް އަވަހަކަށް ޖުޑިޝަރީ އިސްލާހު ކުރުމުގެ ބިލުގެ ބަހުސް ނިންމައި ޖޭއެސްސީއަށާއި ގާނޫނުއަސާސީ އަށް އިސްލާހުތައް ގެނައުމަކީ މުހިންމުކަމެއްކަމަށް އޭނާ ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
