މިދިޔަ 5 އަހަރު ތެރޭ ފެނަކަ ބަނގުރޫޓު ކޮއްލި މައްސަލަ ބަލަންޖެހޭ: ޢަމްރު

މިދިޔަ 5 އަހަރު ތެރޭ ފެނަކަ ބަނގުރޫޓު ކޮއްލި މައްސަލަ ބަލަންޖެހޭ ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރ ޙުސައިން ޢަމްރު ވިދާޅުވެއްޖެއެވެ.

ފެނަކައިގެ ދަރަނި ފިލުވަން އެ ކުންފުނިން އެމްއައިބީއިން 400 މިލިއަން ރުފިޔާގެ ލޯނެއް ނެގި ކަމަށް ފިނޭންސް މިނިސްޓްރީން ރައްޔިތުންގެ މަޖިލީހަށް ހިއްސާ ކުރި މައުލޫމާތު ތަކުން ވަނީ އެނގިފައެވެ.

އެކަމަށް އިޝާރާތް ކުރައްވައި ޢަމްރު ކުރެއްްވި ޓުވީޓެއްގައި ވިދާޅުވީ، ފެނަކައިގެ ދަރަނި މިހާރު 3.5 ބިލިއަން ރުފިޔާ އަށް އަރާފައިވާ ކަމަށެވެ. އަދި ފެނަކައިގެ ދަރަނީގެ މައްސަލަ އަކީ އައު ސަރުކާރުން ހައްލުކުރަން އޮތް ބޮޑު މައްސަލައެއް ކަން އޭނާ ފާހަގަކުރެއްވިއެވެ.

"5 އަހަރު ތެރޭ ކުންފުނި ބަނގުރޫޓު ކޮއްލި މައްަަސަލަ ބެލަންޖެހޭ. ކުންފުނީގެ މައި ހިއްސާދާރާ ހިންގަން ތިބި މީހުން ޒިންމާ ވާންޖެހޭ. ހައްޤު އަދަބު ދޭންޖެހޭ." އަމްރު ވިދާޅުވި އެވެ.

ހުސައިން އަމްރު

ފިނޭންސް މިނިސްޓްރީން މަޖިލީހުގެ މާލިއްޔަތު ކޮމެޓީއާ ހިއްސާކުރި ގޮތުގައި ފެނަކައަށް ބޭނުންވާ ވޯކިން ކެޕިޓަލް ހަމަޖެއްސުމަށް އެމްއައިބީއިން ނަގާ ދެ ލޯނަކަށް ސަރުކާރުން ގެރެންޓީ ދީފައިވެއެވެ. އެ މިނިސްޓްރީން ބުނީ އެއީ 200 މިލިއަން ރުފިޔާގެ ދެ ލޯނެއްކަމަށާއި ގެރެންޓީ ދިނީ 22 ޖޫން އާއި 27 އޮގަސްޓްގައި ކަމަށެވެ.

މިނިސްޓްރީން ހާމަކުރިގޮތުގައި އެ ލޯނުތަކުގައި ސޮއިކޮށްފައިވަނީ 20 ޖޫން އަދި 20 އޮގަސްޓުގައެވެ. އަދި ލޯނުތައް އަނބުރާ ދައްކަން ދީފައިވަނީ ތިން އަހަރު ދުވަހުގެ މުއްދަތެކެވެ.

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ)އިން އާންމުކޮށްފައިވާ ކުންފުނިތަކުގެ މާލީ ރިޕޯޓުން ދައްކާ ގޮތުގައި މިދިޔަ އަހަރު ނިމުނުއިރު ފެނަކައިން އެކި ފަރާތްތަކަށް ދައްކަން ހުރި ދަރަނި 2.22 ބިލިއަން ރުފިޔާއަށް އަރައި ކުންފުނި އޮތީ މާލީ ގޮތުން ނާޒުކު ހާލަތެއްގައެވެ.