ރ. އަތޮޅުގެ ޔުޓިލިޓީ ހިދުމަތްތަކާ ސްޓެލްކޯއިން ރަސްމީކޮށް ހަވާލުވެ، ހިދުމަތް ދޭން ފަށައިފި

ރ. އަތޮޅުގެ ރަށްތަކުގައި ފެނަކަ ކޯޕަރޭޝަނުން ފޯރުކޮށްދެމުންދިޔަ ޔުޓިލިޓީ ހިދުމަތްތައް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ރަސްމީކޮށް ހަވާލުވެ، އެ ހިދުމަތްތައް ދޭން ފަށައިފިއެވެ.

މި ބަދަލާއެކު، ރ. އަތޮޅުގެ ރަށްތަކުގައި ކުރިން ފެނަކައިން ދެމުން އައި ޔުޓިލިޓީގެ އެކި ހިދުމަތްތައް ދެން ސީދާ ބަލަހައްޓަމުންދާނީ ސްޓެލްކޯއިންނެވެ.

ސްޓެލްކޯއިން މައުލޫމާތު ދޭ ގޮތުގައި، ރ. އަތޮޅުގެ ހިދުމަތްތަކާ އެ ކުންފުނިން ހަވާލުވި ދުވަހުން ފެށިގެން، އެ އަތޮޅުގައި ދެމުންދާ ހިދުމަތްތަކުގެ ފެންވަރު ސްޓެލްކޯގެ މިންގަނޑުތަކަށް ފެއްތުމުގެ މަސައްކަތްތައް ވަނީ ފަށާފައެވެ. އަދި މި މަސައްކަތްތައް މިހާރުވެސް ބާރަށް ކުރިއަށްދާކަން އެ ކުންފުނިން ފާހަގަކުރެއެވެ.

އެ ކުންފުނީގެ މައިގަނޑު އަމާޒަކީ ރ. އަތޮޅުގެ އެންމެހާ ރައްޔިތުންނަށް އިތުބާރުހުރި، އަދި ދެމެހެއްޓެނިވި ގޮތެއްގައި ޔުޓިލިޓީ ހިދުމަތްތައް ކަށަވަރުކޮށްދިނުންކަން އެ ކުންފުނިން ފާހަގަކުރެއެވެ. އެގޮތުން ހިދުމަތުގެ މިންގަނޑުތައް މަތިކުރުމަށް ކުރަންޖެހޭ އެންމެހާ އިސްލާހީ މަސައްކަތްތައް މެދުކެނޑުމެއްނެތި ކުރިއަށްދާނެ ކަމަށްވެސް ސްޓެލްކޯއިން ބުނެއެވެ.

މި ބަދަލު އައީ މިދިޔަ ސެޕްޓެމްބަރު މަހުގެ 7 ވަނަ ދުވަހު ފެނަކައާއި އާރްޑީސީ އުވާލާއި، އެ ކުންފުނިތަކުގެ މަސައްކަތް ސްޓެލްކޯއާއި އެމްޓީސީއާއި ހަވާލުކުރުމަށް ރައީސް ޑރ. މުޙައްމަދު މުޢިއްޒު ނިންމެވުމުންނެވެ. ރައީސް އޮފީހުގައި ބޭއްވި ބައްދަލުވުމުގައި މިކަން އިއުލާން ކުރައްވައި، ރައީސް ޑރ. މުޙައްމަދު މުޢިއްޒު ވިދާޅުވީ، ނިމިދިޔަ އެމްޑީޕީ ސަރުކާރުގައި އެ ކުންފުނީގެ ބޭނުން ނަހަމަ ގޮތުގައި ކޮށްފައިވާ ކަން އޮޑިޓް ރިޕޯޓުންވެސް އެނގޭ ކަމަށެވެ.

އެގޮތުން ރައީސް އިތުރަށް ވިދާޅުވީ، އެމްޓީސީސީއާ އާރްޑީސީއަކީ އެއް ކަހަލަ މަސައްކަތެއް ކުރާ ދެކުންފުނި ކަމަށެވެ. އެހެންކަމުން، އާރްޑީސީ އުވާލައި، އެމްޓީސީސީއާ އެއްކޮށްލުމުގެ މަސައްކަތްވެސް ކުރުމަށް ނިންމާފައިވާ ކަމަށް ވިދާޅުވިއެވެ.

ރައީސް މުޢިއްޒު ވިދާޅުވީ އެ މަސައްކަތުގެ ތެރެއިން ކުންފުނިތައް ރައިޓް ސައިޒްކޮށް، އެ ކުންފުނި ތަކުން، އިތުރު މުވައްޒަފުން މަދުކުރެވިގެންދާނެ ކަމަށެވެ.