މިނިސްޓްރީތަކުގެ މެންޑޭޓު ބޮޑުވުމަކީ ނަތީޖާ ނެރެދިނުމަށް އޮތް ހުރަހެއް: ޑރ މުއިއްޒު

ބައެއް މިނިސްޓްރީތަކުގެ މެންޑޭޓު ބޮޑުވުމަކީ ރައްޔިތުންނާއި ގުޅުންހުރި ކަންކަން ތަންފީޒުކުރުމަށް ވަރަށް ބޮޑެތި ގޮންޖެހުންތަކާއި ކުރިމަތިވާ ކަމެއްކަމަށް އިންތިޚާބީ ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.

ޖުމްހޫރީ ދުވަހުގެ މުނާސަބާއާއި ގުޅިގެން ދައުލަތުގެ މީޑިއާއިން ކުރިއަށް ގެންދިޔަ ޕްރޮގްރާމެއްގައި ވާހަކަދައްކަވަމުން، އިންތިޚާބީ ރައީސް ޑރ މުހައްމަދު މުއިއްޒު ވަނީ އެމަނިކުފާނުގެ ސަރުކާރުގައި މިނިސްޓްރީތައް އެކުލަވާލުމުގައި އަމަލުކުރައްވާނެ ގޮތާއި ގުޅޭގޮތުން މައުލޫމާތު ހިއްސާ ކުރައްވާފައެވެ.

މީގެ ކުރިން ދެ ސަރުކާރެއްގައި ކެބިނެޓުގައި މަސައްކަތްޕުޅު ކުރައްވާފައިވާ ޑރ މުއިއްޒު ވިދާޅުވީ އެމަނިކުފާނުގެ ތަޖުރިބާއަށް ބަލާއިރު، ސަރުކާރުން މިނިސްޓްރީތަކަށް ކަނޑައަޅާ މެންޑޭޓު ބޮޑުވުމަކީ، އެ ތަންފީޒު ކުރުމަށް ދަތިތަކާއި ކުރިމަތިވާނެ ކަމެއް ކަމަށެވެ. އަދި އޭގެ ސަބަބުން ނަތީޖާ ނުނެރެވި މިނިސްޓްރީތައް ވަރަށް ބޮޑަށް ފެއިލްވެގެންދާކަމަށް ޑރ މުއިއްޒު ވިދާޅުވި އެވެ.

މި ސަރުކާރުގެ ޕްލޭނިން މިނިސްޓްރީގެ މިސާލު ނަންގަވަމުން ޑރ މުއިއްޒު ވިދާޅުވީ ޕްލޭނިން މިނިސްޓްރީއަށް ނޫފުލޭވަރުގެ ބޮޑު މެންޑޭޓެއް އޮތުމުން ނަތީޖާ ނެރެދިނުމުގައި މިނިސްޓްރީ ފެއިލްވެފައިވާ މިންވަރު، މިނިސްޓްރީއާއި ގުޅުންހުރި ބައެއް މަޝްރޫއުތައް ކުރިއަށް ގެންދާ ގޮތުން ހާމަވެގެންދާ ކަމަށެވެ.

"އެއް ފުރާޅެއްގެ ދަށުގައި މެންޑޭޓު މާ ފުޅާވެގެން ގޮސް އެއްކަމެއް ނުވާ ސަރުކާރެއް، މިނިސްޓްރީތަކެއް އޮންނާކަށް ބޭނުމެއް ނޫން. އެއީ ރައްޔިތުން އެދޭނެ ގޮތެއް ނޫން. އެއް މިނިސްޓްރީތެރޭ އެބަ އޮވޭ ވަރަށް ބައިވަރު ކަންކަން ހިމަނާފަ. އެއްކަމެއް ވެސް ރަނގަޅަށް ނުވެފަ މި އޮންނަނީ. މިސާލަކަށް، ޕްލޭނިން މިނިސްޓްރީއަށް ބަލާލާއިރު، ކަމެއް ނުވާކަން ބްރިޖަށް ބަލާލީމަ އެނގޭނެ، އަމީނީ މަގަށް ބަލާލީމަ އެނގޭނެ"

އިންތިޚާބީ ރައީސް ޑރ މުއިއްޒު

އެކަން ފާހަގަކުރައްވާ ޑރ މުއިއްޒު ވިދާޅުވީ އެމަނިކުފާނުގެ ސަރުކާރު އެކުލަވާލާއިރު، މިނިސްޓްރީތަކަށް ނަތީޖާ ނެރެދެވޭނެ މެންޑޭޓުތަކެއް ކަނޑައެޅުމަށް ވިސްނަވާފައިވާނެ ކަމަށެވެ. ބައެއް ބޮޑެތި މިނިސްޓްރީތައް ދެބައި ކުރުމާއި، ވަކި މަސައްކަތްތަކަށް ޚާއްސަ މިނިސްޓްރީތައް އުފެއްދީ، މިނިސްޓްރީ ފެއިލްނުވެ ނަތީޖާ ނެރެދިނުމަށް މަގުފަހިކުރުމުގެ ގޮތުންކަން އެމަނިކުފާނު ފާހަގަކުރެއްވި އެވެ.

"އެފިޝަންޓު ޓީމެއް ނެގުމުގެ އިތުރަށް، އެ ޓީމަށް ފޯކަސްޑް މަސައްކަތްތަކެއް ކުރެވޭކަހަލަ ގޮތަކަށް މިނިސްޓްރީތައް އަޅުގަނޑު ހުންނާނީ، ބައެއް ބޮޑެތި މިނިސްޓްރީތައް ސްޕްލިޓްކޮށްފައި"

އިންތިޚާބީ ރައީސް ޑރ މުއިއްޒު

އިންތިޚާބީ ރައީސް ޑރ މުއިއްޒު ވިދާޅުވީ ރައްޔިތުން ބޭނުންވަނީ ނަތީޖާ ނެރެދިނުން ކަމަށެވެ. އަދި މިހާރު ސަރުކާރުގެ ވުޒާރާތައް އެކުލަވާލާފައިވާ ގޮތަށް ބަލާއިރު، ސިޔާސީ މަގާމުތައް މަދުވެފައި، އާ ވުޒާރާތައް އެކުލަވާލި ނަމަވެސް، އިތުރު އިމާރާތްތައް ނަގަން ނުޖެހި އަދި ރިކަރެންޓު ޚަރަދުވެސް ބޮޑު ނުވާގޮތަށް ވުޒާރާތައް ހިންގޭނެ އިންތިޒާމުތައް ހަމަޖައްސަވާފައިވާނެ ކަމަށް ޑރ މުއިއްޒު ވިދާޅުވި އެވެ.

އެމަނިކުފާނު ވިދާޅުވީ ސަރުކާރުގެ ރިކަރެންޓު ޚަރަދުތައް ކުޑަކޮށްގެން، ރައްޔިތުންނަށް ބޭނުންވާ ޚިދުމަތްތައް ފޯރުކޮށްދިނުމަކީ އަމާޒުކަމަށާއި، އެމަނިކުފާނުގެ ސަރުކާރު ވެގެންދާނީ ނަތީޖާ ނެރެދީ ރައްޔިތުންނަށް ވީ ވައުދުތައް ފުއްދާދޭނެ ސަރުކާރަށް ކަމަށެވެ.