ސުލްހަވެރިކަމާއެކު އިންޑިއާ ސިފައިން ބޭލުމުގެ މަސައްކަތް ކާމިޔާބުކުރާނަން: ޑރ މުއިއްޒު

ޑިޕްލޮމެޓިކް ހަމަތަކުގެ މަތިން ސުލްހަވެރިކަމާއެކު މަސައްކަތްކޮށް ދިވެހިރާއްޖޭގައި ތިބި އިންޑިއާ ސިފައިން އަނބުރާ ފޮނުވާލުމުގެ މަސައްކަތް ކާމިޔާބުކުރައްވާނެ ކަމަށް އިންތިޚާބީ ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.

55 ވަނަ ޖުމްހޫރީ ދުވަހުގެ މުނާސަބާއާއި ގުޅިގެން ދައުލަތުގެ މީޑިއާއިން ކުރިއަށް ގެންދިޔަ ޚާއްސަ ޕްރޮގްރާމެއްގައި ވާހަކަދައްކަވަމުން އިންތިޚާބީ ރައީސް ޑރ މުއިއްޒު ވިދާޅުވީ އިންޑިއާ ސިފައިން ރާއްޖޭގައި ތިބެން ބޭނުން ނުވާކަމަށް ރައްޔިތުން ޑިމޮކްރަސީގެ ހަމަތަކުގެ މަތިން ބުނެފައިވާ ކަމަށެވެ.

ރައްޔިތުންގެ އެ ނިންމުމަށް އިޚްތިރާމު ކުރައްވާނެ ކަމަށާއި، އިންޑިއާ ސިފައިން ރާއްޖެއިން ފޮނުވާލުމުގެ މަސައްކަތް ސުލްހަވެރިކަމާއެކު ކުރައްވަމުން ގެންދަވާނެކަމަށް ޑރ މުއިއްޒު ވިދާޅުވި އެވެ. އަދި ވިދާޅުވީ އެ މަސައްކަތް ފަސޭހަކަމާއެކު ކާމިޔާބުކުރެވޭނެ ކަމަށް ޤަބޫލުކުރައްވާ ކަމަށެވެ.

"ރައްޔިތުން މިވަނީ ޑިމޮކްރެޓިކް ނިންމުމެއް ނިންމާފަ، ކޮން ގޮތަކަށްކަން ރާއްޖޭގެ ޚާރިޖީ ސިޔާސަތު ބާއްވަން ބޭނުންވަނީ. އެ ނިންމުމަށް ރެސްޕެކްޓުކުރާނެ ކަމަށް އަޅުގަނޑަށް ފުރިހަމަ ޔަގީންކަން އެބޮތް ހުރިހާ ފަރާތްތަކުން ވެސް. އެހެންވީމަ އަޅުގަނޑު ޑިމޮކްރެޓިކް ރީތި އުސޫލުތަކުން ސުލްހަވެރިކަމާއެކު ކުރެވޭ މަސައްކަތުގެ ނަތީޖާއެއްގެ ގޮތުން އިރާދަކުރެއްވިއްޔާ މާ ލސްތަކެއް ނުވެ ރައްޔިތުން އެދޭގޮތަށް ރާއްޖޭގައި ތިބި ބޭރު ސިފައިން ރާއްޖެއިން ފޮނުވާލުމުގެ މަސައްކަތް ކާމިޔާބުކުރާނަން"

އިންތިޚާބީ ރައީސް ޑރ މުއިއްޒު

ޑރ މުއިއްޒުގެ ވާހަކަފުޅުގައި ވަނީ އިންޑިއާ އާއި ރާއްޖެއާއި އޮތް ޒަމާންވީ ގުޅުމަށް ވެސް އަލިއަޅުވާލައްވާފަ އެވެ.

އެގޮތުން ޑރ މުއިއްޒު ވިދާޅުވީ އިންޑިއާ އަކީ ރާއްޖެއާއި އަވައްޓެރި ގއުމަކަށް ވެފައި އިންޑިއާގެ އެހީތެރިކަން ވެސް ރާއްޖެއަށް ލިބެމުން އައިސްފައިވާ ކަމަށެވެ. އަދި ކުރިއަށް އޮތް ތަނުގައި ވެސް އެ ގުޅުން ދަމަހައްޓާ އިރުދެ ގައުމަށް ވެސް އެންމެ ފައިދާވާނެ ގޮތްތައް ބައްލަވައިގެން މަސައްކަތް ކުރައްވާނެ ކަމަށް ޑރ މުއިއްޒު ވިދާޅުވި އެވެ.

އެއާއެކު އެމަނިކުފާނު ވިދާޅުވީ "ޕްރޯ މޯލްޑިވްސް" ޚާރިޖީ ސިޔާސަތަކާއި އެކު ވަޑައިގަންނަވާއިރު، އެމަނިކުފާނު އަބަދުވެސް ދިވެހީންގެ މަސްލަހަތާއި ދިވެހީން ކަންކަމުގައި ބޭނުންވާނެ ގޮތް އިސްކުރައްވާނެ ކަމަށެވެ.

ޑިޕްލޮމަސީގެ ރީތި އުސޫލުތައް ގަބޫލުކުރާ ހުރިހާ ގައުމަކުން ވެސް ރާއްޖެއަކީ ވަކި ފަރާތަކަށް ބުރަވެފައިވާ ގައުމަކަށް ނުވެ އޮތުމަށް ލޯބި ކުރައްވާނެ ކަމަށާއި، އަދި ރާއްޖޭގެ ޚާރިޖީ ސިޔާސަތުތަކަށް އިޚްތިރާމުކުރާ ހުރިހާ ގައުމަކާއި އެކުވެސް އެކުވެރި ގުޅުންތައް ދަމަހައްޓަވާނެކަމަށް ޑރ މުއިއްޒު ވިދާޅުވި އެވެ.