އައްޑޫސިޓީގައި އޮތް އެމްޑީޕީގެ ރަސްކަން މިފަހަރު ނިމުމަކަށް އަންނާނެ: ޝިޔާމް

އައްޑޫސިޓީގައި އޮތް އެމްޑީޕީގެ ރަސްކަން މިފަހަރުގެ ލޯކަލް ކައުންސިލް އިންތިހާބުގައި ނިމުމަކަށް އަންނާނޭކަމަށް އަދުގެ ސަރުކާރުގެ މަސްވެރިކަމާ ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.

ކޮންގްރެސް ޕާޓީން މިރޭ މާލެސިޓީގައި ބޭއްވި އައްޑޫސިޓީގެ މާލޭ އޭރިއާ ކެމްޕެއިން ޖަގަހަ ހުޅުވުމުގެ ހަފްލާގައި އައްޑޫސިޓީ ކައުންސިލަށް ނިސްބަތްކުރައްވައި ޝިޔާމް ވިދާޅުވީ، އެ ސިޓީގައި އޮތް އެމްޑީޕީގެ ރަސްކަން މިފަހަރު ނިމުމަކަށް އަންނާނޭކަމަށެވެ. މިނިސްޓަރު ވިދާޅުވީ އެމްޑީޕީގެ މެޖޯރިޓީ އޮތް ކައުންސިލެއް އައްޑޫ ސިޓީގައި އެތައް އަހަރަކު އޮތްއިރުވެސް އެއްވެސްކަމެއް ހާސިލްނުވާކަމަށެވެ.

އެގޮތުން އެމްޑީޕީގެ މެޖޯރިޓީ އޮތް ރައްޔިތުންގެ މަޖިލީހެއްގެ އިތުރުން ވެރިކަމެއް ނިމިގެންދިޔައިރު އައްޑޫސިޓީއަށް ކޮށްދިނީ ކޮންކަމެއްތޯ މިނިސްޓަރު ޝިޔާމް ވަނީ ސުވާލު އުފައްދަވާފައެވެ. ޝިޔާމް ވިދާޅުވީ، އެމްޑީޕީން މިއަދު އައްޑޫސިޓީގެ ކަރަންޓާއި އަދި ނަރުދަމާ ނިޒާމްގެ ވާހަކަދައްކަވަން ލަދުގަންނަން ޖެހޭނޭކަމަށެވެ. އެގޮތުން އެމްޑީޕީގެ ވެރިކަމުގައި އައްޑޫސިޓީއަށް އެކަންކަން ކޮށްދީފައި އޮތްނަމަ މިއަދު އެގޮވާގޮވުންތައް ގޮވަން ނުޖެހުނީސްކަމަށް ޝިޔާމް ފާހަގަކުރެއްވިއެވެ.

ރަސްކަމެއް ނިމޭއިރުގައި އެބޭފުޅުން އެދައްކަވަނީ ފެނާ ނަރުދަމާގެ ވާހަކަ، އެބޭފުޅުން އެދައްކަވަނީ ކަރަންޓު ކެނޑޭވާހަކަ، އެބޭފުޅުން އެދައްކަވަނީ މަގުތަކުގެ ވާހަކަ. އަޖައިބެއް ނޫންތޯ މީ؟

މަސްވެރިކަމާ ބެހޭ ވަޒީރު އަހުމަދު ޝިޔާމް

މިނިސްޓަރު ވިދާޅުވީ އައްޑޫސިޓީއަކީ މާލެ ސަރަހައްދު ފިޔަވައި ދެން އެންމެ ބައިބޯ ސަރަހައްދު ކަމަށާއި، އައްޑޫސިޓީ ތަރައްޤީކުރާނޭ ގޮތުގެ ތަސައްވުރެއް ރައީސް ޑރ.މުހައްމަދު މުއިއްޒުގެ އަތްޕުޅުގައި އެބައޮތްކަމަށެވެ. އެގޮތުން ކުރިއަށް މިއޮތް ލޯކަލް ކައުންސިލްގެ އިންތިހާބުގައި ރައްޔިތުން އެ ފުރުސަތު ޕީއެންސީއަށް ދީފިނަމަ އެކަމުގެ ތަފާތު ދައްކަވާނޭކަމަށް ޝިޔާމް ވިދާޅުވިއެވެ.

ޝިޔާމް ވިދާޅުވީ އެމްޑީޕީގެ ވެރިކަމެއް ނިމިގެންދިޔައިރު އައްޑޫސިޓިއަށް ކަމެއް ކޮށްދީފައި ނުވިނަމަވެސް، އައްޑޫ ސިޓީގައި ހުރި ޒަމާންވީ މަައްސަލަތައް ހައްލު ކުރެއްވުމަށްޓަކައި ރައީސް ޑރ.މުއިއްޒުގެ މެނިފެސްޓޯގައި ކަންކަން ކުރުމަށް ރާވާފައި އެބައޮތްކަމަށެވެ.

މިރޭގެ ހަފްލާގައި އައްޑޫސިޓީގެ މާލޭ އޭރިއާ ކެމްޕެއިން ޖަގަހަ ހުޅުވައިދެއްވީ ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ އިބްރާހީމެވެ.