މަޖިލީހަށް ކުރިމަތިލުމުގެ ވިސްނުމެއް ނެތް, މިއީ މެންބަރެއްގެ ހައިސިއްޔަތުން ވާހަކަ ދައްކާ ފަހު ދުވަސް: ރޮޒައިނާ

ކުރިއަށް އޮތް ތަނުގައި ރައްޔިތުންގެ މަޖިލީހަކަށް ކުރިމަތިލުމުގެ ވިސްނުމެއް ނެތް ކަމަށާއި، މިއީ ރައްޔިތުންގެ މަޖިލީހުގެ ތަޅުމުގައި މެމްބަރެއްގެ ހައިސިއްޔަތުން ވާހަކަފުޅު ދައްކަވާ ފަހު ދުވަސް ކަމަށް އައްޑޫމީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.

މިއަދު ކުރިއަށްދާ 19 ވަނަ ރައްޔިތުންގެ މަޖިލީހުގެ އެންމެ ފަހު ޖަލްސާގައި ވާހަކަފުޅު ދައްކަވަމުން ރޮޒައިނާ ވިދާޅުވީ، މިއަދަކީ 15 އަހަރު ދުވަހަށް ފަހު އޭނާ ރައްޔިތުންގެ މަޖިލީހާއި އަލްވަދާއު ކިޔާ ދުވަސްކަމަށާއި، ދެން ކުރިއަށް އޮތް ތަނުގައި ރައްޔިތުންގެ މަޖިލީހަށް ކުރިމަތިލެއްވުމުގެ ވިސްނުމެއް ނެތް ކަމަށެވެ.

"މިއަދަކީ 15 އަހަރު ދުވަސްކޮށްފައި، މި މަޖިލީހާއި އަޅުގަނޑު އަލްވަދާއު ކިޔާ ދުވަސް. އަޅުގަނޑުގެ ވިސްނުމެއް ނެތް ދެން ކުރިއަށް އޮތް ތަނުގައި ރައްޔިތުންގެ މަޖިލީހަކަށް ކުރިމަތިލުމުގެއެއް. އެހެންވީމަ މިއަދަކީ މަޖިލީހުގެ ތަޅުމުގައި އަޅުގަނޑު މެމްބަރެއްގެ ހައިސިއްޔަތުން ވާހަކަ ދައްކާ ފަހު ދުވަސް."

ރޮޒައިނާ ވިދާޅުވިއެވެ.

ރޮޒައިނާ ވިދާޅުވީ، ތުލުސްދޫ ދާއިރާ އާއި އައްޑޫމީދޫ ދާއިރާގެ ރައްޔިތުން އޭނާ އާއި ހަވާލުކުރެއްވި މަސައްކަތްތައް 15 އަހަރުގެ ތެރޭގައި ކުރެވިފައިވާ ކަމަށް ގަބޫލުފުޅު ކުރައްވާ ކަމަށާއި ފާއިތުވެ ދިޔަ 15 އަހަރުގެ ތެރޭގައި އޭނާގެ ގޮނޑި "ނީލަމުގައި" އިން އެންމެ ދުވަހެއް ވެސް އައިސްފައިނުވާނެ ކަމަށެވެ.

ހަމައެއާއިއެކު، ނިމިދިޔަ އެމްޑީޕީގެ ސަރުކާރުގެ ދާއިރާގެ ކުރިއެރުމަށް ވަރަށް ގިނަ މަސައްކަތްތަކެއް ކުރެވުނު ކަމަށާއި، މީދޫ އާއި މަރަދޫ ފޭދޫ އަކީ އައްޑު ސިޓީގެ އެންމެ އަޅާނުލެވި އޮތް ދެރަށަށްވާއިރު ނިމިދިޔަ ސަރުކާރުގައި މި ދެރަށަށް ވަރަށް ބޮޑު ތަރައްގީއެއް ގެނެސްދެވުނު ކަން ރޮޒައިނާ ފާހަގަކުރެއްވިއެވެ.

" ރައްޔިތުންގެ މަޖިލީހުގައި މަސައްކަތް ކުރުމަކީ އަންހެނަކަށް ހާއްސަކޮށް ފަސޭހަ ކަމެއް ނޫން. މި މަޖިލީހުގެ ތަޅުމުގައި އަޅުގަނޑަށް ވެސް ވަރަށް ގިނަ ކަންތައްތައް ދިމާވެފައިވަނީ. އޭގެއިތުރުން ސޯޝަލް މީޑިއާ އާއި އެކު ގޮތްގޮތަށް ވަރަށް ގިނަ ފުރައްސާރަތަކާއި ކުރިމަތިލާން ޖެހިފައި އޮތީ."

ރޮޒައިނާ ވިދާޅުވިއެވެ.

ރޮޒައިނާ ގެ އާއިލާ އާއި ރައްޓެހިންގެ އިތުރުން އެކީގައި މަސައްކަތް ކުރެއްވި މެމްބަރުންގެ ފަރާތުން ލިބުނު އެއްބާރުލުމުގެ ސަބަބުން މިއަދު މަޖިލީހުން ނުކުމެގެންދަނީ ވަރަށް ޖޯޝާއި ފޯރީގައިކަން ފާހަގަކުރައްވާ ރޮޒައިނާ ވިދާޅުވީ، 20 ވަނަ ރައްޔިތުންގެ މަޖިލީހަށް ވަޑައިގަންނަވާ 3 އަންހެން މެމްބަރުންނާއި އެކީގައި މަޖިލީހަށް ވަޑައިގަންނަވާ ފިރިހެން ބޭފުޅުންގެ އެއްބާރުލުން ލިބި ރަނގަޅު މަސައްކަތްތަކެއް ކުރުމުގައި އެހީތެރިވެދެއްވުމަކީ އެދުމެއް ކަމަށެވެ.

"މި މަޖިލީހަކީ ބައެއް ފަހަރަށް އަޅުގަނޑުމެން ކުރަން އުޅޭ މަސައްކަތުގައި އަމިއްލަ ޕާޓީން ވެސް އެއްބާރުލުން ނުލިބޭ ތަނެއް. އެކަމަކު މުސްތަޤުބަލުގައި ވެސް އަޅުގަނޑު އުންމީދު ކުރަނީ އެކަން އެހެން ނުވެ ވަރަށް ރަނގަޅަށް ކަންތައްތައް ދާނެ ކަމަށް."

ރޮޒައިނާ ވިދާޅުވިއެވެ.

ރައްޔިތުން މަޖިލީހަށް މެމްބަރުން ހޮވާއިރު ރައްޔިތުންގެ މަޖިލީހަކީ ހަމައެކަނި ތަޅުމުގައި ވާހަކަދައްކާ ތަނެއް ނޫންކަމަށާއި، އެއީ ކޮމިޓީގެ އެތައް ބުރަ މަސައްކަތްތަކެއް ކުރާ ތަނަކަށް ވާއިރު، ކޮމިޓީތަކުގައި ރަނގަޅު މަސައްކަތްތަކެއް ކުރެވޭނެ ބަޔަކު ހޮވުމަށް ރައްޔިތުން ހަނދާންކުރުމަށް ރޮޒައިނާވަނީ އެދިލައްވާފައެވެ.