ކްރިމިނަލް ކޯޓުގައި ހިނގަމުންދިޔަ، އާރަށާ ގުޅޭ ރައީސް ޔާމީނުގެ ޝަރީއަތް މަޑުޖައްސާލުމަށް ނިންމައިފި

އާރަށް ކުއްޔަށް ދޫކުރުމުގައި ހިޔާނާތްތެރިވި ކަމަށް ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ މައްޗަށް ތުހުމަތު ކުރެވޭ މައްސަލައިގެ ޝަރީއަތް ކްރިމިނަލް ކޯޓުން މަޑުޖައްސާލަން މިއަދު ނިންމައިފި އެވެ.

ދަށުކޯޓުން ޔާމީނުގެ މައްސަލަ މަޑުޖައްސާލުމަށް ނިންމީ، އާރަށުގެ މައްސަލައާ ގުޅޭގޮތުން، ރައީސް ޔާމިނަށް ނިސްބަތްވާ މައްސަލައެއް ސްޕްރީމް ކޯޓުގައި އޮތުމުންނެވެ. މައްސަލައިގެ މިއަދުގެ އަޑުއެހުމުގައި މައްސަލަ ބައްލަވާ ގާޒީ އަލީ ނަދީމް ވިދާޅުވީ ކްރިމިނަލް ކޯޓުގައި ހިނގަމުންދާ މައްސަލަ އާއި ސްޕްރީމް ކޯޓުގައި މިހާރު އޮތް މައްސަލަ އާ ފުށުއެރުމެއް ފާހަގަކުރެވޭކަމަށް ގަބޫލުކުރެވޭތީ ދަށުކޯޓުގެ ޝަރީއަތް މަޑުޖައްސާލުމަށް ނިންމީކަމަށެވެ. މައްސަލައިގެ ޝަރީއަތް ދެން ކުރިއަށްގެންދާނީ މައްސަލާގައި ހިމެނޭ ހެކީގެ މައްސަލަ ސްޕްރީމްކޯޓުން ނިންމުމުންކަމަށްވެސް ގާޒީ ވަނީ ވިދާޅުވެފައެވެ.

އާރަށުގެ މައްސަލައިގައި ރައީސް ޔާމީންގެ މައްޗަށް ދައުލަތުން ރިޝްވަތު ގަބޫލުކުރުމާއި މަނީ ލޯންޑްރީގެ ދައުވާ އުފުލާފައިވާއިރު، ރިޝްވަތާއި މަނީ ލޯންޑްރިންގެ ކުށް ސާބިތުވެ ޔާމީން 11 އަހަރަށް ޖަލަށްލުމަށް ކްރިމިނަލް ކޯޓުން ހުކުމްކުރީ ޑިސެމްބަރު 25، 2022 ގަ އެވެ.

އެހެންނަމަވެސް، އެ ހުކުމް ބާތިލްކޮށް އަލުން އެ މައްސަލަ ކްރިމިނަލް ކޯޓުން ބެލުމަށް ހައި ކޯޓުން އަމުރުކުރިއެވެ.

އެކަމާއި ގުޅިގެން މިއަދު ކްރިމިނަލް ކޯޓުގައި މިއަދު އޮތް އަޑުއެހުމުގައި ރައީސް ޔާމީންގެ ވަކީލުން ވަނީ ސުޕްރީމް ކޯޓުގައި އޮތް މައްސަލަ ނިމެންދެން އެ މައްސަލަ މަޑުޖައްސާލަން އެދިފައެވެ. މިގޮތުން ދިފާއީ ބައެއް ހެކިތައް ބަލައިނުގަތުމަށް ދައުލަތުން ކްރިމިނަލް ކޯޓުގައި އެދިފައިވާއިރު، މައްސަލައިގެ ދިފާއީ ހެކިތައް ނަފީކުރަން އާ ހެކި ހުށަހެޅުމާ ގުޅޭ ބައެއް ދައުލަތުން ސުޕްރީމް ކޯޓަށް ހުށަހެޅި މައްސަލާގައި ހިމެނޭ ކަމަށް ރައީސް ޔަމީންގެ ވަކީލުން ފާހަގަކުރެއްވިއެވެ.

ދައުލަތުން ބުނީ ކްރިމިނަލް ކޯޓުގައި ކުރިއަށް ގެންދާ މައްސަލަ މަޑުޖައްސާލަން ސުޕްރީމް ކޯޓުން އަންގާފައިނުވި ނަމަވެސް، ރައީސް ޔާމީންގެ ވަކީލުން ފާހަގަކުރެއްވި ގޮތަށް، އެ ދެ މައްސަލާގައި ގުޅުމެއް އޮތްކަން ދައުލަތުންވެސް ވަނީ ފާހަގަކޮށްފައެވެ.

.