ދެވަނަ ބުރަކަށް ދާން ޖެހުނު ވޯޓުތައް އަލުން ލާން ފަށައިފި

ނިމިގެންދިޔަ ލޯކަލް ކައުންސިލް އިންތިހާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިހާބުގައި އަލުން ވޯޓުލާންޖެހުނު ދާއިރާތަކުގެ ވޯޓުލުމުގެ މަސައްކަތް ފަށައިފިއެވެ.

އިންތިޚާބުގެ ފުރަތަމަ ބުރުގެ ނަތީޖާއާ އެކު، ދެވަނަ ބުރަކަށް ދާންޖެހުނު ދާއިރާތަކުގެ ވޯޓުލުން ބޭއްވުމަށް ތާވަލްކޮށްފައިވަނީ މިއަދު ހެނދުނު 8 ކުން ފެށިގެން 4 ޖެހުމާ ހަމަޔަށެވެ. އިލެކްޝަންސް ކޮމިޝަނުން ބުނީ، އިތުރުބުރުގެ ވޯޓުލުން ފެށިގެން ކުރިއަށްދާ ކަމަށާއި، އިތުރުބުރުގައި ބެހެއްޓިފައިވާ ހުރިހާ މަރުކަޒެއްގައި ވޯޓުލުން މިހާރުފެށިފައިވާކަމަށެވެ.

އިންތިހާބުގައި 5 ދާއިރާއެއްގެ ވޯޓު އަލުން ނަގަން ޖެހުނެވެ. އެއީ، އަންހެނުންގެ ތަރައްޤީއަށް މަސައްކަތްކުރާ ހދ.ނޭކުރެންދޫ، ލ.މާވަށު ކޮމިޓީގެ މެމްބަރުގެ މަގާމާއި ހއ.ކެލާ ކޮމިޓީގެ ރައީސްގެ މަގާމެވެ. މީގެ އިތުރުން ދެން ހިމެނެނީ، ފުވައްމުލައް ދަޑިމަގު ދާއިރާއަށް ކައުްނސިލް މެމްބަރަކު ހޮވުމާއި، ދޮންފަނު ކައުންސިލްގެ އަންހެނުންނަށް ހާއްސަކޮށްފައިވާ ގޮނޑިއަށް މެމްބަރަކު ހޮވުމެވެ. މި ދާއިރާތަކުގެ ވޯޓުނެގުމަށް މާލެއާއި އަތޮޅުތަކުގައި ޖުމްލަ 14 ފޮށި ވަނީ ބަހައްޓާފައެވެ.

މީގެ ތެރެއިން މާލޭގައި ވޯޓުފޮށިތައް ތިން ސްކޫލެއްގައި ބަހައްޓާއިރު އޭގެ ތެރެއިން ފުވައްމުލަކް ދަނޑިމަގު ވޯޓުފޮށި ބަހައްޓާފައިވަނީ ދަރުމަވަންތަ ސްކޫލްގައެވެ. ކެލާ އަދި ދޮންފަނު ރައްޔިތުން ވޯޓުލާން ދާންޖެހެނީ ތާޖުއްދީން ސްކޫލަށެވެ. މާވަށާއި ނޭކުރެންދޫ ރައްޔިތުން ވޯޓުލާން ދާންޖެހެނީ ހިރިޔާ ސްކޫލަށެވެ.

ލޯކަލް ކައުންސިލް އިންތިޚާބުގައި 294،876 މީހަކަށް ވޯޓުލުމުގެ ހައްގު ލިބިގެންދިޔައިރު އޭގެ ތެރޭގައި ހިމެނެނީ، 144،506 އަންހެނުންނާއި 150،370 ފިރިހެނުންނެވެ. އެގޮތުން ވޯޓުލުމަށް މުޅި ރާއްޖޭގައި 582 ވޯޓު ފޮށި ބެހެއްޓިއެވެ.