ދައުވާ އަނބުރާ ގެންދިޔަކަން ރަސްމީކޮށް އަދި ނޭނގޭ، ގެންގޮސްފިއްޔާ ވަރަށް ރަނގަޅު: މަހްލޫފް

ޔޫތު މިނިސްޓަރު އަހުމަދު މަހުލޫފުގެ މައްޗަށް އުފުލާފައިވާ ރިޝްވަތު ހިފުމުގެ ދައުވާ ޕްރޮސެކިއުޓާ ޖެނެރަލް (ޕީޖީ) އޮފީހުން އަނބުރާ ގެންދިޔަކަން އަދި ރަސްމީކޮށް އެނގިފައިނުވާ ކަމަށާ ގެންދިޔަ ނަމަ ވަރަށް ރަނގަޅު ކަމަށް އޭނާ ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް (ސެމްބެ) ވަނީ، މިނިސްޓަރު މަހުލޫފް ގެ މައްޗަށް ސިޔާސީ ގޮތުން އުފުލާފައިވާ ދައުވާތައް ނެންގެވުމަށް އެއްވެސް މަސައްކަތްޕުޅެއް ކުރައްވާފައިވާނެތޯ ސުވާލު ކުރައްވާފަ އެވެ.

"ފަހު ދިހައަކަށް އައި އިރު މަނިކުފާނު ތި ހުންނެވީ ހުދު ފޮތިކޮޅަކަށް ހައްދަވާފައި. އެހެންކަމުން ސިޔާސީ ގޮތުން މަނިކުފާނުގެ މައްޗަށް އުފުލާފައިވާ ދައުވާތައް ނެންގެވުމުގެ އެއްވެސް މަސައްކަތްޕުޅެއް ނުކުރައްވާނަންތޯ؟" ސެމްބެ ސުވާލު ކުރެއްވި އެވެ.

ސެމްބެގެ ސުވާލަށް ޖަވާބު ދެއްވަމުން މަހްލޫފް ވިދާޅުވީ އެ ދައުވާތައް އަނބުރާ ގެންދިޔަކަން ރަސްމީ ސިފައެއްގައި އަދި އަންގާފައި ނުވާ ކަމަށެވެ.

"އިއްޒަތްތެރި މެންބަރަށާ [ސެމްބެ] އަޅުގަނޑާ ދެމީހުންނަށް ވަރަށް ރަނގަޅަށް އެނގޭނެ އަޅުގަނޑުމެން އޭރު އެއްކޮށް ޕީޕީއެމްގައި މަސައްކަތްކުރި މީހުންނަށް މިކަންތައް ހިނގާ ދިޔަގޮތް. އަޅުގަނޑު ވަރަށް އުފާވޭ. އެކަމު އަދި އަޅުގަނޑަކަށް އެއްވެސް ހިސާބަކުން ރަސްމީ ސިފައެއްގައި އެކަމު އެ މައްސަލަ ގެންދިޔަކަން އެނގިފައެއް ނެތް، ނޫސްތަކުން އަޅުގަނޑަށް ފެނުނީވެސް. އެކަމު ގެންގޮސްފިއްޔާ ވަރަށް ރަނގަޅު. ހަމަ ކަނޑައެޅިގެން ބަޔަކު ގަސްތުގައި އަޑީގައި ތިބެގެން ކުރި ކަމެއް،"

މިނިސްޓަރު އަހްމަދު މަހްލޫފް

އެމްއެމްޕީއާރްސީގެ ހިޔާނާތުގެ ފައިސާ ބޭނުންކުރެއްވުމުގެ ތުހުމަތުގައި މަހްލޫފަށް ކުރާ ދައުވާ ކޯޓްތަކުގައި ހިނގަމުންދާތާ އަހަރެއް ފަހުން، ޕީޖީ އޮފީހުން ވަނީ އެ ދައުވާ އަނބުރާ ގެންނަން ނިންމާފަ އެވެ. މިކަމުގެ މާ ބޮޑު ތަފްސީލެއް ރަސްމީކޮށް ޕީޖީ އޮފީހުން އަދި ހާމައެއް ނުކުރެ އެވެ.

ކޮރަޕްޝަން ހުއްޓުވުމާއި މަނާކުރުމުގެ ގާނޫނުގެ ދަށުން، 33،000 ޑޮލަރު (508،860 ރުފިޔާ)ގެ ރިޝްވަތު ހިފުމުގެ ދައުވާ މަހްލޫފުގެ މައްޗަށް އުފުލައި އެ މައްސަލަ ކޯޓަށް ހުށަހެޅީ ނޮވެމްބަރު 2021ގަ އެވެ.

ދައުލަތުގެ ދައުވާގައި ބުނެފައި ވަނީ މަހްލޫފް، ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރަކަށް ހުންނެވި އިރު، 27 އޮގަސްޓު 2014ގައި ސްޕެޝަލް އިކޮނޮމިކް ޒޯންގެ ބިލަށް ތާއީދުކޮށް ވޯޓުދިނުމުގެ ބަދަލެއްގެ ގޮތުން ރިޝްވަތު ނެންގެވި ކަމަށެވެ.
އަދި އޭރުގެ ޓޫރިޒަމް މިނިސްޓަރު އަހްމަދު އަދީބު، އެސްއޯއެފް ޕްރައިވެޓް ލިމިޓެޑްގެ ނަމުގައި ބޭންކް އޮފް މޯލްޑިވްސް (ބީއެމްއެލް)ގައި ހުޅުވާފައިވާ އެކައުންޓެއްގެ ޗެކަކުން 33،000 ޑޮލަރު މަހްލޫފަށް ދެއްވިކަމަށާ އެ ފައިިސާ މަހްލޫފުގެ ނަމުގައި ބީއެމްއެލްގައި ހުޅުވާފައިވާ އެކައުންޓަށް 01 ސެޕްޓެމްބަރު 2014ގައި ޖަމާކޮށްފައިވާ ކަމަށެވެ.

ނަމަވެސް ދައުލަތުން ހުށަހެޅި ދައުވާ ކުރިއަށް ގެންދެވޭނެ ފަދަ ބުރަދަނެއް ހުރި ހެކިތަކެއް ނޫން ކަމަށް ބުނެ ކްރިމިނަލް ކޯޓުން މައްސަލަ ފުރަތަމަ ބޭރުކޮށްލިއެވެ.

ބޭރުކޮށްލުމުން 6 މާޗު 2022 ގައި ޕީޖީން އެ މައްސަލަ ހައި ކޯޓުގައި އިސްތިއުނާފުކުރި އެވެ. އަދި 21 މާޗު 2022 ގައި ހައި ކޯޓުން ކުރި ހުކުމުގައި ބުނީ، އެއީ މަދަނީ މިންގަނޑުން ބެލޭނެ ދައުވާއެއް ނޫން ކަމަށް ދަށު ކޯޓުން ނިންމީ ގޯސްކޮށް ކަމަށެވެ. އެހެންކަމުން އެ މައްސަލަ އަލުން ބަލަން ކްރިމިނަލް ކޯޓަށް ހައިކޯޓުން އެންގިއެވެ.