ސަރުކާރުން އޮފްޝޯ ޕްލެޓްފޯމު އަޅާ ވާހަކައެއް މެނިފެސްޓޯގައި ނޯންނާނެ: ރިޒާ

ސަރުކާރުން އޮފްޝޯ ޕްލެޓްފޯމު އަޅާ ވާހަކައެއް މެނިފެސްޓޯގައި ނޯންނާނެކަމަށް ރައްޔިތުންގެ މަޖިލީހުގެ މިލަންދޫ ދާއިރާގެ މެމްބަރު އަލީ ރިޒާ ވިދާޅުވެއްޖެ އެވެ.

ރިޒާ މިފަދައިން ވިދާޅުވެފައިވަނީ އެމްޑީޕީ ވެރިކަމެއް އޮވެމެ، އެމްޑީޕީގެ މެނިފެސްޓޯގައިވާ މަސްވެރިކަމުގެ ސިޔާސަތު ހިންގުމުގައި ފަހަތުފަޔަށް ބުރަވެ، ސަރުކާރުން މަސްވެރިކަމުގެ ސިޔާސަތާ ދެކޮޅަށް ވާހަކަދެއްކުން ހުއްޓާލައި އެމްޑީޕީގެ މެނިފެސްޓޯގައިވާގޮތަށް އަދި ރައީސުލްޖުމްހޫރިއްޔާގެ އޮފީހުގެ ވެބްސައިޓްގައި ޝާއިއުކޮށްފައިވާ ސިޔާސަތު ތަންފީޒުކުރުމަށް ގޮވާލައި އޭނާ ހުށަހެޅުއްވި ގަރާރަށް ވާހަކަދައްކަވަމުން ނެވެ.

ރިޒާ ވިދާޅުވީ މި ސަރުކާރުން މަސްވެރިކަމުގެ ސިނާއަތަށް ކޮށްދިން އެންމެ މުހިންމު އެއް މަސައްކަތަކީ މަސްވެރިކަމުގެ ޤާނޫނު ވުޖޫދުކުރުން ކަމަށެވެ.

އެ ޤާނޫނުގައި އޮފްޝޯ ޕްލެޓްފޯމުގެ ވާހަކަ ބަޔާންކޮށްފައި އޮންނާނެކަމަށް އޭނާ ވިދާޅުވިއެވެ. އެހެން ނަމަވެސް ޤާނޫނުގައި އެކަން ބަޔާންކުރުމަކީ އަދި އެކަން ކުރެވޭނެ ކަމެއް ނޫން ކަމަށާއި، އެ ޕްލެޓްފޯމުތައް އެޅޭނީ އިންވެސްޓަރުން އިންވެސްކޮށްގެން އެކަން ކުރުމުންކަމަށް ރިޒާ ވިދާޅުވިއެވެ.

ފަހަރެއްގައި އޮފްޝޯ ޕްލެޓްފޯމުތަކަކީ ސަރުކާރުން އަޅަން ޖެހޭ ތަންތަނުގެ ގޮތުގައި ބަޔާންކޮށްފައި ނުވާނެ ކަމަށާއި، އަދި އެކަން ކުރުމަށް ސަރުކާރުގެ މެނިފެސްޓޯގައި ވެސް ނޯންނާނެކަމަށް ރިޒާ ވިދާޅުވި އެވެ.

"ޤާނޫނުގައި ލިޔުމަކުން އޮފްޝޯ ޕްލެޓްފޯމެއް ނޭޅޭ. އޮފްޝޯ ޕްލެޓްފޯމެއް އަޅަން އިއުލާނުކުރީމަ އެކަމަށް އިންޓްރެސްޓު ހުރި ބަޔަކު ނޫނީ އިންވެސްޓުކުރާނެ ބަޔަކު ޤައުމަށް އައިސް އެ އޮފްޝޯ ޕްލެޓްފޯމު އެޅީމަ އެކަން ކުރެވެނީ. ސަރުކާރުން އެކަން ކުރާ ވާހަކައެއް ފަހަރެއްގައިވެސް މެނިފެސްޓޯގައި ނޯންނާނެ، އަދި އޮތް ކަމަކަށް ލަފާ ކުރެވޭކަށްވެސް ނެތް"

މަޖިލީހުގެ މިލަންދޫ ދާއިރާގެ މެމްބަރު އަލީ ރިޒާ

ރިޒާ މިފަދައިން ވިދާޅުވެފައި ވީ ނަމަވެސް 2018 ވަނަ އަހަރު ވެރިކަމަށް އައުމަށް އެމްޑީޕީން އެކުލަވާލާފައިވާ މެނިފެސްޓޯގައި މަސްވެރިންނަށް ޚާއްސަ އޮފްޝޯ ޕްލެޓްފޯމުތަކެއް އަޅާނެކަމަށް ވަނީ ލިޔެފައެވެ. އެ ވައުދު ފުއްދުމަށް ސަރުކާރުން މަސައްކަތް ކުރާކަމަށް މީގެ ކުރިން ބުނެފައިވެއެވެ.

އެހެން ނަމަވެސް އެމްޑީޕީގެ ރިޔާސީ ޕްރައިމަރީތެރޭގައި އެމްޑީޕީ ޖަގަހައިގައި ބޭއްވި ޖައްލސާއެއްގައި ވާހަކަދައްކަވަމުން ރައީސް އިބްރާހިމް މުޙައްމަދު ޞާލިހު ވަނީ މެނިފެސްޓޯގައި ލިޔެފައި އޮތް ނަމަވެސް އެފަދައިން ޕްލެޓްފޯމުތަކެއް ނޭޅޭނެކަމަށް ވިދާޅުވެފައެވެ. އަދި އެއީ "ރިއަލިސްޓިކް" ކަމެއް ނޫންކަމަށް އެމަނިކުފާނު ވިދާޅުވެފައި ވެއެވެ.