ތިލަމާލެ ބްރިޖު ހަދާ އެފްކޮންސް ކުންފުނި ވިއްކާލަނީ
ތިލަމާލެ ބްރިޖާއި އައްޑޫގެ މަގުތައް ހެދުމަށް ދިވެހި ސަރުކާރުން ހަވާލުކޮށްފައިވާ އިންޑިއާގެ އެފްކޮންސް ކުންފުނި ވިއްކާލުމަށް އެ ކުންފުނީގެ ވެރިފަރާތުން ނިންމައިފި އެވެ.
ބޭރުގަ މީޑިއާ ރިޕޯޓްތައް ބުނާގޮތުން، އިންޑިއާގެ ބިލިއަނަރެއް ކަމުގައިވާ ޝާޕޫރު މިސްޓްރީގެ ޝާޕޫރުޖީ ޕަލޯންޖީ (އެސްޕީ)ގެ ދަށުން ހިންގަމުންދާ އެފްކޮންސް ކުންފުނި ވިއްކާލުމަށް ނިންމާފައިވަނީ އެސްޕީއަށް ދިމާވެފައިވާ މާލީ މައްސަލަތަކާއި ދަރަނިތައް އަދާކުރުމުގެ ގޮތުންނެވެ.
އެގޮތުން، އެފްކޮންސް ގެ އިތުރުން އެސްޕީ ގުރޫޕުން އިންޑިއާގައި ހިންގާ ގޯޕާލްޕޫރު ޕޯޓުވެސް ގަންނާނެ ފަރާތެއް ހޯދުމަށް އެ ގުރޫޕުން މަސައްކަތް ކުރަމުންދާ ކަމަށް ރިޕޯޓް ކޮށްފައިވެއެވެ. އަދި އެސްޕީ ގުރޫޕަށް އެފްކޮންސް އާއި ގޯޕާލްޕޫރު ޕޯޓު ވިއްކާލައިގެން 2.5 ބިލިއަން އެއްހާ ޑޮލަރު ލިބޭނެ ކަމަށްވެސް ބުނެފައިވެއެވެ.
މި ކަމަާއި ގުޅޭގޮތުން އިންޑިއާގެ ނޫސްތަކުން އެސްޕީ ގުރޫޕާއި ސުވާލުކުރުމުން އެއްވެސް ޖަވާބެއް ދިނުމަށް ދެކޮޅު ހަދާފައިވާ ކަމަށްވެސް އެ ނޫސްތަކުން ބުނެފައިވެއެވެ.
އެސްޕީއަށް ދިމާވެފައިވާ މާލީ މައްސަލަތަކާ ގުޅިގެން މިދިޔަ އަހަރުވެސް އެ ކުންފުނީގެ އެސެޓްތަކެއް ވިއްކާލާފައިވެ އެެވެ. އެގޮތުން، އެ ގުރޫޕުގެ އުރޭކާ ފޯބްސް އެޑްވެންޓް އިންޓަނޭޝަނަލްސް އަށް 536 މިލިއަން ޑޮލަރަށް ވަނީ ވިއްކާލާފައެވެ.
އެފްކޮންސް ވިއްކާލަން އުޅޭ ކަމުގެ ވާހަކަ ދެކެވޭއިރު އިންޑިއާ އަދި ރާއްޖޭގައި އެ ކުންފުނިން ކުރިއަށް ގެންދާ މަޝްރޫއުތަކުގައި މަސައްކަތް ކުރާ މުވައްޒަފުންނަށް މުސާރަ ނުދޭ މައްސަލަތަކެއް ފެންމަތިވެ އެ މީހުން ދާފިފަހުން އިހްތިޖާޖު ވެސް ކޮށްފައިވެއެވެ.
އަދި ތިލަމާލެ ބްރިޖްގެ މަސައްކަތް ކުރަނިކޮށް ޕްލެޓްފޯމް ފަރަށް އެރުމާއި ގުޅިގެން އެފްކޮންސް އިން ދިވެހި ދައުލަތަށް ދައްކަންޖެހޭ 69 މިލިއަން ރުފިޔާގެ ޖޫރިމަނާވެސް އަދި އޮތީ ނުދައްކަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
