ދަޢުލަތް ބަނގުރޫޓުކޮށް އިންޑިއާގެ އެފްކޯންސް ކުންފުނި ފިލާނެ: ސައީދު

މި ދަޢުލަތް ބަނގުރޫޓުކޮށްލުމަށްފަހު ތިލަމާލެ ބްރިޖާއި އައްޑޫ ސިޓީގެ މަގުހެދުމުގެ މަސައްކަތް ހަވާލުކޮށްފައިވާ އިންޑިއާގެ އެފްކޯންސް ކުންފުނި ފިލައިގެން ދާނެކަމަށް މަޖިލީހުގެ މާވަށު ދާއިރާގެ މެމްބަރު އަދި ކުރީގެ އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެ އެވެ.

ސައީދު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ނެވެ.

ސައީދު ވަނީ ފިނޭންސް މިނިސްޓްރީން އިންޑިއާގެ އެފްކޯންސް ކުންފުންޏަށް ދޭން ހުރި ފައިސާ ހިފެހެއްޓުމަށް ގޮވާލައްވާފަ އެވެ. އަދި ތިލަމާލެ ބްރިޖު އެޅުމަށް އެ ކުންފުންޏާއެކު ހެދިފައިވާ އެއްބަސްވުން ވީ އެންމެ އަވަހަކަށް އުވާލުމަށް އޭނާ ގޮވާލެއްވި އެވެ.

ސައީދު ވިދާޅުވީ ކުރިއަށް އޮތް 4 މަސްތެރޭ މުޅި ދައުލަތް ބަނގުރޫޓު ކުރުމަށްފަހު އެފްކޯންސް ކުންފުނި ފިލައިގެންދާނެ ކަމަށެވެ. އެހެންކަމުން ސަރުކާރުގެ ކަމާގުޅުންހުރި އިދާރާތަކުން މިކަމަށް ސަމާލުވެ ތިއްބެވުމަށް ސައީދު ވަނީ އެދިލައްވާފަ އެވެ.

"މި ގޮވާލަކީ މިނިސްޓްރީ އޮފް ފިނޭންސްއިން އެފްކޯންސްއަށް ދޭން ހުރި ފައިސާ ދޫނުކުރަން. އަދި ބްރިޖުގެ ކޮންޓްރެކްޓު މިހާރުން މިހާރަށް ބާތިލުކުރުމުގެ މަސައްކަތް ފެއްޓުމަށް"

މާވަށު ދާއިރާގެ މެމްބަރު މުޙައްމަދު ސަޢީދު

ސައީދު މިފަދައިން ވިދާޅުވެފައިވާއިރު އިންޑިއާގެ ބިލިއަނަރު، ޝާޕޫރު މިސްޓްރީގެ ޝާޕޫރުޖީ ޕަލޯންޖީ (އެސްޕީ) ގްރޫޕަށް މާލީ ތާށިކަން ކުރިމަތިވެ އެ ކުންފުނީގެ ދަށުން ހިންގާ އެފްކޮންސް އިންސްފްރާސްޓްރަކްޗާ ވިއްކާލަން ވަނީ ނިންމާފަ އެވެ.

އިންޑިއާގެ ނޫސްތަކުން ރިޕޯޓުކޮށްފައިވާ ގޮތުގައި އިންޑިއާގެ އެންމެ ބޮޑު އެއް ކުންފުނި ކަމަށްވާ އެސްޕީ ގުރޫޕުން އަންނަނީ ގާތްގަނޑަކަށް ދެ ބިލިއަން ޑޮލަރުގެ އެސެޓް ވިއްކާލަން މަސައްކަތް ކުރަމުންނެވެ.

އޭގެ ތެރޭގައި އެފްކޮންސް އިންފްރާސްޓްރަކްޗާއާއި އިންޑިއާގެ އިރުމަތީ އައްސޭރިފަށުގައި އޮންނަ ގޯޕާލްޕޫރު ފޯޓު ހިމެނެ އެވެ. އެސްފީ ގްރޫޕުން އަންނަނީ އެސެޓް ގަންނާނެ ކަސްޓަމަރުން ހޯދަމުންނެވެ.

އެފްކޯންސް ވިއްކާލުމަށް ނިންމާފައިވާއިރު، މި ސަރުކާރުން ރާއްޖޭގައި ހިންގާ އެންމެ ބޮޑެތި މަޝްރޫއުތައް ހަވާލުކޮށްފައިވާ އެފްކޯންސް ކުންފުންޏަށެވެ. އެ ކުންފުނި ވިއްކާލުމަށް ނިންމާފައިވާއިރު، މިހާތަނަށް ސަރުކާރުން މި ކަމާއި ގުޅިގެން އެއްޗެއް ބުނެފައެއް ނުވެއެވެ.