ސާބިއާގެ ރައީސް އެހާ ޔަގީން ކަމާއެކު ކޮސޯވޯގެ ވާހަކަ އިއުލާނުކުރީ ޝާހިދު ކީކޭ ބުނީމަބާ؟: ދުންޔާ
ކޮސޯވޯއަކީ ވަކި ދައުލަތެއްގެ ގޮތުގައި ރާއްޖެއިން ކުރިން ބަލައިގެން ނަމަވެސް އެ ނިންމުން ބަދަލުކޮށްފި ކަމަށް ސާބިއާގެ ރައީސް އެލެކްސެންޑާ ވުޖިކް އެހާ ޔަގީން ކަމާއި އެކު އިއުލާން ކުރެއްްވީ ފޮރިން މިނިސްޓަރު އަބްދުالله ޝާހިދު ކީކޭ ވިދާޅުވީމާތޯ ކުރީގެ ޚާރިޖީ ވަޒީރު ދުންޔާ މައުމޫން ސުވާލު ކުރައްވައިފި އެވެ.
ކޮސޯވޯ މިނިވަން ދައުލަތެއްގެ ގޮތުގައި ބަލައިގަތް ގަތުން އަނބުރާ ގެންދަން ރާއްޖެ ހިމެނޭ ގޮތަށް ނުވަ ގައުމަކުން އެއްބަސްވެފައިވާ ކަމަށް ސާބިއާގެ ރައީސް އެލެކްސެންޑާ ވުޖިކް ދާދިފަހުން ވަނީ ވިދާޅުވެފަ އެވެ. ސާބިއާގެ ރައީސް އެހެން ވިދާޅުވެފައި ވަނީ ޝާހިދު ވެސް ސާބިއާއަށް ވަޑައިގެންފައިވާ ދަނޑިވަޅެއްގައެވެ.
ނަމަވެސް ރައީސް އޮފީހުން އިއްޔެ ބޭއްވި ނޫސްވެރިންގެ ބައްދަލުވުމެއްގައި، ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ އެއްވެސް ގައުމަކާ ގުޅުން ކަނޑާލުމަކީ މި ސަރުކާރުން ކުރާނެ ކަމެއް ނޫން ކަމަށާ އަދި ކޮސޯވޯއަކީ ވަކި ދައުލަތެއް ކަމަށް ރާއްޖެއިން ބަލައިގަންނަ ކަމަށެވެ.
ތަރުޖަމާނު އެފަދައިން ވިދާޅުވުމާއި ގުޅިގެން އެ މައްސަލާގައި ދުންޔާ ވަނީ މުހިންމު ސުވާލުތަކެއް ސަރުކާރާއި ކުރައްވާފައެވެ.
އެގޮތުން ދެގައުމުގެ ޚާރިޖީ ވަޒީރުންގެ ރަސްމީ މަޝްވަރާއާ ގުޅޭގޮތުން ގައުމެއްގެ ރައީސް ދޮގުހެދީތޯ ސުވާލު ކުރައްވައި އެއީ އާދައިގެ ކަމެއް ނޫން ކަމަށް އޭނާ ވިދާޅުވި އެވެ.
"ވަރަށްދެރަ. ދެގައުމުގެ ޚާރިޖީ ވަޒީރުންގެ ރަސްމީ މަޝްވަރާއާ ގުޅޭގޮތުން ގައުމެއްގެރައީސް ދޮގުހެދީތަ؟ މީ އާދައިގެ ކަމެއްނޫން. ސާބިއާގެ ރައީސް އެހާޔަގީން ކަމާއެކު އެފަދަކަމެއް އިއުލާނުކުރީ ރަސްމީ މަޝްވަރާގައި ޝާހިދު ކީކޭ ބުނީމަބާ؟ ކޮންމެ އިންތިޚާބަކާ ދިމާކޮށް ސާބިއާއަށް ދަނީ ކީއްވެ؟" ދުންޔާ ވިދާޅުވި އެވެ.
ކުރިން ސާބިއާގެ ބައެއްގެ ގޮތުގައި އޮތް އަދި ގިނަ އަދަދެއްގެ މުސްލިމުން ދިރިއުޅޭ ކޮސޯވޯއަކީ މިނިވަން ދައުލަތެއްގެ ގޮތުގައި ރާއްޖެއިން ބަލައިގަތީ ކުރީގެ ރައީސް މުހައްމަދު ނަޝީދުގެ ވެރިކަމުގައި 2009 ވަނަ އަހަރު އެވެ. އެކަމަކު ސާބިއާއިން އަދިވެސް ގަބޫލުކުރަނީ އެއީ އެ ގައުމުގެ ބައެއްގެ ގޮތުގަ އެވެ
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
