ސިޔާސި ކަންކަމުގައި އަރާނެ އިތުރު ހަރުފަތެއް ދެން ނެތް: ރައީސް ޞާލިޙް

ސިޔާސީ ކަންކަމުގައި އަރާނެ އިތުރު ހަރުފަތެއް ދެން ނެތް ކަމަށާއި، ދެވަނަ ދައުރެއް ލިބިވަޑައިގެންފިނަމަ ސިޔާސީ މަޤްސަދެއްގައި ކުރާނެ އެއްވެސް ކަމެއް ނެތް ކަމުގައި ރައީސުލްޖުމުހޫރިއްޔާ އިބްރާހީމް މުހައްމަދު ޞާލިހު މިއަދު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، ސެޕްޓެމްބަރު 9 ވަނަ ދުވަހު ބޭއްވުމަށް ހަމަޖެހިފައިވާ ރިޔާސި އިންތިހާބުގެ ކެމްޕެއިންގައި ނ. މާޅެންދޫއަށް ވަޑައިގެން އެ ރަށުގެ ސަޕޯޓަރުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސްގެ ވާހަކަފުޅުގައި މިހާރު ހުންނެވީ ރައީސުލް ޖުމްހޫރިއްޔާކަމުގެ މަގާމުގައި ކަމުގައި ވިދާޅުވަމުން ރައީސް ވިދާޅުވީ ސިޔާސި މަގްސަދެއްގައި ދެވަނަ ދައުރެއްގައި ކުރައްވާނެ އެއްވެސް ކަމެއް ނެތްކަމުގައެވެ.

"އަޅުގަނޑު ސިޔާސީ ކަންތަކުގައި ދެން އަރާނެ އިތުރު ހަރުފަތެއް ނެތް. ސިޔާސީ މަގުސަދުގައި އަޅުގަނޑު ބޭނުންވާނެ އެއްވެސް ކަމެއް ދެން ނެތް. އިރާދަކުރެއްވީތީ މިއަދު މިހުރީ ރާއްޖޭގެ ރައީސުލްޖުމުހީރިއްޔާ ކަމުގައި. ކުރިއަށް އޮތް ދައުރުގަ އަޅުގަނޑު ސިޔާސީ މަގުސަދެއްގައި ކުރާނެ އެއް ވެސް ކަމެއް ނޯންނާނެ،"

ރައީސްގެ ވާހަކަފުޅުގައި ވިދާޅުވިއެވެ.

މީގެ އިތުރުން ރައީސް ޞާލިޙް ވިދާޅުވީ، އެމަނިކުފާނުންގެ އަމާޒަކީ ދިވެހިންނަށް އުފާވެރި އަމާން ރާއްޖެއެއް ހޯދަވައިދެއްވުން ކަމަށާއި ދެވަނަ ދައުރެއްގައި ވެރިކަން ކުރަން ލިބިވަޑައިގެންފިނަމަ ވެރިކަމުން ފައިބައިވަޑައިގަންނަވާއިރު ފެންނާނީ އެ މަންޒަރުކަމުގެ ޔަގީންކަން ދެއްވައިފައެވެ.

އަދި މީގެ އިތުރުން އެ މަނިކުފާނުގެ އަމާޒަކީ މިހާރު ފަށައިގެން ކުރިއަށްދާ ހުރިހާ މަޝްރޫއުތަކެއް އެއްކޮށް ނިންމައި ރައްޔިތުންނަށް އުފާވެރި، އަމާން ދިރިއުޅުމެއް ހޯދައިދިނުން ކަމަށާއި އެނޫން އެއްވެސް މަގްސަދެއް ނޯންނާނެ ކަމުގައި ރައީސް ޞާލިޙްގެ ވާހަކަ ފުޅުގައި ވިދާޅުވިއެވެ.

އަދި އެކި އެކި ބަދަލުތަކާހުރެ ނ. އަތޮޅަށް މި ސަރުކާރުން ނުކުރެވި މަޑުޖެހިފައި ހުރި އުމްރާނީ ތަރައްގީގެ ގިނަ މަޝްރޫއުތަކެއް މިހާރު ނިންމާފައިވާ ކަމަށާއި މި މަޝްރޫއުތައް ނިންމުނީ މި ސަރުކާރުން ސިޔާސީ ހަލަބޮލިކަމެއްގެ ތެރެއަށް ދިޔުމުގެ ބަދަލުގައި ތަފާތު ހިޔާލުތަކުގެ މަޝްވަރާއަށް ޖާގަ ދީގެން މަސައްކަތް ކުރުމުން ކަމަށް ރައީސް ވިދާޅުވިއެވެ.

ރިޔާސީ ކެމްޕެއިންގައި ވެރިކަމުގެ ދެވަނަ ދައުރެއް ހޯދުމުގެ މަގްސަދުގައި ރައީސް އިބްރާހިމް މުޙައްމަދު ޞާލިޙާއި ކެމްޕެއިން ޓިމުން ގެންދަވަނީ ރާއްޖޭހގެ ހުރިހާ ރަށަކަށް ޒިޔާރަތްކުރުމުގެ ގޮތުން ކެމްޕެއިން ދަތުރުތައް ކުރައްވަމުންނެވެ.