ސިޓީ ކައުންސިލުން ހެންވޭރު ގައި 69 ސައިކަލް ޒޯން ކުރަހައި ނިންމައިފި

މިނީ ބަހުގެ ހިދުމަތް ފެށުމާއި ގުޅިގެން ބަސްދުއްވާ މަގުތަކުގެ ޕާކިން ޒޯން ހުސްކޮށް އައު ޕާކިންގ ޒޯންތައް ހެދުމަށް މާލެ ސިޓީ ކައުންސިލުން ފައްޓަވާފައިވާ މަސައްކަތުގެ ތެރެއިން ހެންވޭރުގަައި 69 ސައިކަލް ޒޯން ކުރަހައި ނިންމައިފިއެވެ.

މާލެ ސިޓީ ކައުންސިލްގެ މޭޔަރު ޑރ މުޙައްމަދު މުޢިއްޒު ވިދާޅުވީ، މާލޭގައި މިނީ ބަހުގެ ޚިދުމަތް ފެއްޓެވުމަށްޓަކައި މަޖީދީމަގުގައި ހުރި ޕާކިންގ ޒޯންތައް ނަގައި އޭގެ ބަދަލުގައި ޕާކިންގ ޒޯން ހެދުމަށް ސަރުކާރުން ކަނޑައަޅާފައިވާ ސަރަހައްދު ތަކުގެ ތެރެއިން ހެންވޭރުގަައި 69 ސައިކަލް ޒޯން ކުރަހައި ނިންމާފައިވާކަމަށެވެ. އަދި މި ސައިކަލް ޒޯންތައް ހަދާފައިވަނީ ހެންވޭރު ސަމޯސާ ވިލާގެ ގޯތިތެރޭގައި ކަމަށްވެސް މޭޔަރ ވިދާޅުވިއެވެ.

މާލެސިޓީގައި މިނީ ބަހުގެ ޚިދުމަތް ފެށުމާއި ގުޅިގެން މީގެ ކުރިންވެސް 335 ސައިކަލު ޕާކުކުރެވޭނެ ޕާކިންގ ޒޯން ސިޓީ ކައުންސިލުން ވަނީ ހަދާފައެވެ. އެޕާކިންގ ޒޯނު ހަދާފައިވަނީ މާފަންނު ދަނޑު ހުންނަ ސަރަހައްދުގައެވެ.

މާލޭގައި މިނީ ބަހުގެ ޚިދުމަތް ފެށުމަށް ކުރަމުން އަންނަ މަސައްކަތްތަކުގެ ދަށުން، ބައެއް މަގުތަކުގައި ޕާކުކުރުން ވަނީ މަނާކޮށްފައެވެ. އެގޮތުން މިހާރު މަޖީދީ މަގުގައި ޕާކުކުރުން ވަނީ މަނާކޮށްފައެވެ. މީގެއިތުރުން އަމީނީ މަގާއި އޯކިޑް މަގާއި ފަރީދީ މަގުގައިވެސް ޕާކުކުރުން މަނާކުރާނެއެވެ.
މިނީ ބަހުގެ ދަތުރުތައް މާލޭގައި ފެށުމަށް މަގުތަކުގެ ޕާކިންގ ޒޯންތައް ނަގައި އެ ތަންތަނުގެ ބަދަލުގައި މިހާރު ހަތަރު ސަރަހައްދަކުން ބިން ވަނީ ހަމަޖައްސާފައެވެ. އެއީ ހ. ސަމޯސާވިލާ ގޭގެ ބިމުން ބަޔަކާއި އެކުވެނި ޓްރެކް ކައިރިން ދެ ތަނަކާއި ދަރުބާރުގޭދޮށާއި ރަސްފަންނު ކައިރިން ކޮރަލް ބުލެވަރޑް ކައިރި އޮންނަ ސަރަހައްދެވެ.