ގައުމީ މަސައްކަތުގައި އެމްއެންޕީ ގުޅުމަކީ ގައުމަކަށް ލެވޭ ހިތްހަމަޖެހުމުގެ ނޭވާއެއް: ޑރ މުއިއްޒު

ޕީޕީއެމް ޕީއެންސީން ކުރަމުން ގެންދާ ގައުމީ މަސައްކަތުގައި ގައުމީ ޖޯޝު އިސްކޮށް، އެމްއެންޕީން އެ ޕާޓީއާއި ގުޅުމަކީ ދިވެހި ގައުމަށް ލެވޭ ހަމަޖެހުމުގެ ނޭވާއެއް ކަމުގައި އިދިކޮޅު ކޯލިޝަންގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ.

ރިޔާސީ އިންތިހާބުގެ ދެވަނަބުރުގައި ޕީޕީއެމް ޕީއެންސީއާއި އެކު މަސައްކަތް ކުރުމަށް އެމްއެންޕީން ނިންމައި އެކަމުގެ އެއްބަސްވުމުގައި ސޮއި ކުރުމަށް މިއަދު މީރުމާގެ ބޭއްވި ރަސްމިއްޔާތުގައި ވާހަކަފުޅުދައްކަވަމުން މުއިއްޒު ވިދާޅުވީ، އެ ކޯލިޝަނާއެކު މަސައްކަތް ކުރުމަށް ނިންމި ކަމަށްޓަކައި އެމްއެންޕީގެ ލީޑަރޝިޕާއި އެޕާޓީގެ އެންމެހައި މެންބަރުންނަށް ޝުކުރު އަދާކުރައްވައިފައެވެ.

މީގެ އިތުރުން މުއިއްޒު ވިދާޅުވީ އެ މަނިކުފާނު އުންމީދަކީ އެމްއެންޕީން ދެއްކި ނަމޫނާއިން ހިތްވަރު ލިބިގެން ކުރިއަށް އޮތް ތިން ދުވަހު ސިޔާސީ ޕާޓީތަކުން ޕީޕީއެމް ޕީއެންސީއާއި ގުޅިވަޑައިގަތުން ކަމުގައެެވެ.

އަޅުގަނޑު ޔަގީންކުރަނީ ނާޒިމްވެސް ވިދާޅުވިފަދައިން ދެފަރާތުން ގުޅިގެން އެކުގައި އިންތިހާބުގެ ދެވަނަ ބުރު ރައްޔިތުންގެ ހައްގުގައި ރައްޔިތުންނަށްޓަަކައި ކާމިޔާބު ކުރެވިގެން ދާނެކަމަށް

ޑރ މުހައްމަދު މުއިއްޒު

މި ބައްދަލުވުމުގައި ވާހަކަދައްކަވަމުން އެމްއެންޕީގެ ލީޑަރ ނާޒިމް ވިދާޅުވެފައިވަނީ، އެ ޕާޓީން ތިބީ ޖާނާއި މާލުން ގުރުބާން ވެގެންވެސް ޑރ މުއިއްޒުއަށް އިންތިހާބުގެ ދެވަނަ ބުރު ކާމިޔާބުކޮށްދިނުމަށް ކަމުގައިކަމަށެވެ.

ރިޔާސީ އިންތިހާބުގެ ދެވަނަބުރުގެ ވޯޓުލުން މިމަހުގެ 30 ވަނަ ދުވަހު ބޭއްވުމަށް ހަމަޖެހިފައިވާއިރު ދެވަނަ ބުރުގައި ވާދަކުރާ ޕީޕީއެމް/ޕީއެންސީ އަދި އެމްޑީޕީއާއި ކޯލިޝަން ހެދުމުގެ މަޝްވަރާތައް ސިޔާސީ ޕާޓީތަކުން މިހާރު ކުރަމުން އަންނަ އިރު، އިބްތިހާބުގެ ފުރަތަމަ ދެވަނަ ބުރުގައި ކޯލިޝަން ހެދުމަށް ނިންމި ފުރަތަމަ ޕާޓީއަކީ އެމްއެންޕީއެވެ.

ކުރީގެ ޑިފެންސް މިނިސްޓަރު އަދި ދަނގެތި ދާއިރާގެ މެމްބަރު މުހައްމަދު ނާޒިމް ރިޔާސީ ކެންޑިޑޭޓެއްގެ ގޮތުގައި ނެރެގެން ރިޔާސީ އިންތިހާބުގެ ފުރަތަމަ ބުރުގައި ލިބުނީ 1907 ވޯޓެވެ. އެއީ ވޯޓް ލީ މީހުންގެ 0.8 ޕަސެންޓް ވޯޓެވެ. ޕީއެންސީގެ ކެންޑިޑޭޓް ޑރ.މުހައްމަދު މުއިއްޒަށް 101،635 ވޯޓެވެ. އެއީ 46 ޕަސެންޓް ވޯޓެވެ.