ޑިމޮކްރެޓްސްއާއެކު ކޯލިޝަން ހެދުމުގެ މަޝްވަރާތަކުގެ ބޯޅަ އޮތީ އެ ޕާޓީގެ ފަޅީގައި: ޑރ މުއިއްޒު
މި މަހުގެ 30 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގެ ދެވަނަބުރުގައި ކޯލިޝަން ހެދުމަށްޓަކައި ދަ ޑިމޮކްރެޓްސްއާއެކު ކުރެވެމުންދާ މަޝްވަރާތަކުގައި ބޯޅަ އޮތީ އެ ޕާޓީގެ ފަޅީގައި ކަމުގައި ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ.
އިންތިހާބުގެ ދެވަނަ ބުރުގައި ޕީޕީއެމް ޕީއެންސީ އާއި އެމްއެންޕީ އެކުގައި މަސައްކަތް ކުރުމަށް ނިންމައި އެކަމުގެ އެއްބަސްވުމުގައި ސޮއިކުރުމަށް މިއަދު މީރުމާގައި އޮތް ރަސްމިއްޔާތުގައި ވޮއިސްގެ ފަރާތުން ކުރި ސުވާލަކަށް ޖަވާބުދެއްވަމުން ޑރ މުހައްމަދު މުއިއްޒު ވިދާޅުވީ، އެ ޕާޓީން މަސައްކަތް ކުރަނީ "ދިވެހިންގެ ރާއްޖެ"އެއް ހޯދުމަށް ކަމަށާއި އެ މަސައްކަތުގައި ބައިވެރިވާން ބޭނުންވާ ކޮންމެ ފަރާތަކަށް ވެސް ފުރުސަތު ވަނީ ހުޅުވާލާލެވިފައި ކަމަށެވެ.
އަދި ޑިމޮކްރެޓްސް އާއި އެކު ކޯލިޝަން ހެދުމާމެދު ގޮތެއް ކަނޑައެޅުމާއި ގުޅޭ ގޮތުން މުޢިއްޒު ވިދާޅުވީ، "ދަ ބޯލް އިޒް އިން ދެއާ ކޯޓު" ކަމަށެވެ.
ދެވަނަ ބުރުގައި ކޯލިޝަން ހެދުމަށް އެންމެ މުހިންމުވެފައި "ދަ ޑިމޮކްރެޓްސް" މިހާތަނަށް ވަކި ގޮތެއް ނިންމާފައިނުވާއިރު، އެ ޕާޓީން އަންނަނީ ސަރުކާރާ އެކު ވެސް މަޝްވަރާތައް ކުރަމުންނެވެ.
އެގޮތުން ރިޔާސީ އިންތިހާބުގައި ތާއީދު ކުރާނެ ފަރާތެއް ކަނޑައެޅުމަށް ދަ ޑިމޮކްރެޓްސްގެ ކައުންސިލް ބައްދަލުވުމެއް މިއަދު ބާއްވާފައިވާރު އެ ބައްދަލުވުމުގައި ބައިވެރިވެވަޑައިގެންނެވި ގިނަ މެންބަރުންގެ ޚިޔާލު ހުރީ ވެރިކަން ކުރާ ޕާޓީ، އެމްޑީޕީއާއި ނުގުޅި ކުރިއަށް ދިޔުމަށެވެ.
ރިޔާސީ އިންތިހާބުގެ ދެވަނަބުރުގެ ވޯޓުލުން މިމަހުގެ 30 ވަނަ ދުވަހު ބޭއްވުމަށް ހަމަޖެހިފައިވާއިރު ދެވަނަ ބުރުގައި ވާދަކުރާ ޕީޕީއެމް/ޕީއެންސީ އަދި އެމްޑީޕީއާއި ކޯލިޝަން ހެދުމުގެ މަޝްވަރާތައް ސިޔާސީ ޕާޓީތަކުން މިހާރު ކުރަމުން އަންނަ އިރު، އިބްތިހާބުގެ ފުރަތަމަ ދެވަނަ ބުރުގައި ކޯލިޝަން ހެދުމަށް ނިންމި ފުރަތަމަ ޕާޓީއަކީ އެމްއެންޕީއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
