އައު ޓާމިނަލް ވާނީ އެންމެ އިސްކަންދޭނެ އިޤްތިޞާދީ މަޝްރޫޢަށް: ޑރ މުއިއްޒު

ވެލާނާ އިންޓަރނޭޝަނަލް އެއަރޕޯޓްގެ އައު ޓަރމިނަލް ތަރައްގީ ކުރުމުގެ މަޝްރޫގެ މަސައްކަތް ވެގެންދާނީ އައު ސަރުކާރުގައި އެންމެ އިސްކަމެއް ދީގެން އެއްވަނަ ދަރަޖައިގައި ކުރިއަށް ގެންދާނެ މަޝްރޫއަކަށް ކަމުގައި އިންތިޚާބީ ރައީސް ޑރ މުހައްމަދު މުއިއްޒު ވިދާޅުވެއްޖެއެވެ.

ޑރ މުއިއްޒު މިފަދައިން ވިދާޅުވީ، ވެލާނާ އިންޓަރނޭޝަނަލް އެއަރޕޯޓްގައި ތަރައްޤީ ކުރަމުންގެންދާ އައު ޓަރމިނަލްގެ މަސައްކަތް ބައްލަވާ ލެއްވުމަށްޓަކައި މިއަދު އެ ސަރަހައްދަށް ވަޑައިގެން އެ މަސައްކަތްތައްް ބެލެއްވުމަށްފަހު ނޫވެސްވެރިންނާއި ބައްދަލުކުރައްވާ ދެއްކެވި ވާހަކަ ފުޅުގެ ތެރެއިންނެވެ.

އެގޮތުން ޑރ މުއިއްޒު ވިދާޅުވީ, ރާއްޖޭގެ އިގްތިސާދު ނަގައި ކޮޅަށް ޖެހުމަށް ބަލާއިރު ވެލާނާ އިންޓަރނޭޝަނަލް އެއަރޕޯޓްއަކީ އިގްތިޞާދުގެ މައި ދޮރާށިކަމުގައި ވުމުން، މި މަޝްރޫއު ނިންމުން އެއީ އެމަނިކުފާނުގެ ސަރުކާރެއްގައި އެންމެ އިސްކަމެއް ދެއްވާނެ އިޤްތިޞާދީ މަޝްރޫޢުކަމުގައި ޑރ މުއިއްޒު ވަނީ ވިދާޅުވެފައެވެ.

މި މަޝްރޫއު އަވަސްކޮށް ނިންމުން އެއީ އިރާދުކުރެއްވިއްޔާ އަޅުގަނޑުމެންގެ ސަރުކާރެއްގައި އެންމެ އިސްކަމެއް ދޭނެ އިޤްތިޞާދީ މަޝްރޫއަށް

ޑރ މުހައްމަދު މުއިއްޒު

މީގެ އިތުރުން އިބްތިޚާބީ ރައީސް ވިދާޅުވީ މި މަޝްރޫއުގެ ތެރެއިން ސައުދީ ބިން ލާދިން ކުންފުންޏާއި ހަވާލު ކުރެވުނު މަސައްކަތުގެ 54 އިންސައްތަ މަސައްކަތް ނިމިފައިވާ ކަމަށް އެ ކުންފުނިން މައުލޫމާތުދީފައިވާކަމަށާއި މަސައްކަތް ކުރިއަށްދާ ގޮތް ބައްލަވާލެއްވުމުން އެކަން ފެނިވަޑައިގަތް ކަމަށެވެ.

އެހެންނަމަވެސް އެ ކުންފުނީގެ ސްކޯޕުގައި ވަގުތުން މަޝްރޫއުގެ ނުނިމި ހުރި މަސައްކަތްތަައް ނިންމުމަށް އަދި އޮތީ 2025 ވަނަ އަހަރުގެ މެދަކާއި ހަމައަށް ކަމަށާއި އެހެންނަމަވެސް، އެހެންނަމަވެސް އެ ކުންފުނީގެ ސްކޯޕް 2024 ވަނަ އަހަރުގެ އޮކްޓޫބަރު މަހާއި ހަމައަށް ނިންމުމަށް އެމަނިކުފާނު ބޭނުންފުޅުވެ ވަޑައިގަންނަވާކަމަށެވެ.

ބާކީ އޮތް ސްކޯޕް ނިންމަން އަދި އެބަ އޮތް 2025 ވަނަ އަހަރުގެ މެދަކާއި ހަމައަށް، އަޅުގަނޑު ބޭނުންވަނީ 2024 ވަނަ އަހަރުގެ އޮކްޓޫބަރު މަހަށް އެ ބޭފުޅުންގެ ސްކޯޕް ނިންމަން، އެއީ އަށެއްކަ ނުވާ ވަރަކަށް މަސް ދުވަހުގެ އަވަސް ކުރުމެއް

ޑރ މުހައްމަދު މުއިއްޒު

ވެލާނާ އިންޓަރނޭޝަނަލް އެއަރޕޯޓްގެ އައު ޓަރމިނަލް ގެ މަސައްކަތަކީ ކުރީގެ ރައީސް ޔާމީނު އަބްދުލްގައްޔޫމްގެ ވެރިކަމުގައި ފެށިގެން ކުރިއަށްދާ މަޝްރޫއެކެވެ. އެގޮތުން އަންނަ އަހަރުގެ ޕީކް ސީޒަން ފެށެންވާއިރަށް މި މަޝްރޫއުގެ މަސައްކަތް ނިންމުމަކީ އަމާޒެއް ކަމުގައި އިންތިޚާބީ އައު ރައީސް ވަނީ ވިދާޅުވެފައެވެ.