ނިޝާމާގެ ފިރިމީހާގެ ބަންދަށް 15 ދުވަސް

ހދ. ނޮޅިވަރަމުގައި ނިޔާވެފައި އޮއްވާ ފެނުނު ނިޝާމާ މުހައްމަދު މަރާލި ކަމަށް ތުހުމަތު ކުރެވޭ އޭނާގެ ފިރިމީހާ, އަބޫބަކުރު ފައިސަލް (32އ)ގެ ބަންދަށް ކޯޓުން 15 ދުވަސް ޖަހައިފިއެވެ.

ނިޝާމާ އޭނާ ދިރިއުޅޭ ގޭގެ ކޮޓަރިތެރޭގައި ޚަބަރު ހުސްވެފައި އޮއްވާ ޢާއިލާއަށް ފެނުނީ މިދިޔަ ހޮނިހިރު ދުވަހު މެންދުރު ގެ ވަގުތެއްގައެވެ.

އެ މައްސަލަ އާއި ގުޅިގެން ފުލުހުން އެދުވަހު ބުނީ، ނޮޅިވަރަމްގައި މީހަކު މަރާލައިގެން އުޅޭ ކަމަށް ބުނެ، މެންދުރު 12:30 ހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ.

އަދި އެ މައުލޫމާތު ލިބުމާއި އެކު ފުލުހުން، އެ ސީން އަށް އެޓެންޑްވެ ހޭނެތިފައި އޮތް މީހަކު، ފުލުހުންގެ އެހީތެރިކަމާއެކު އެ ރަށު ހެލްތު ސެންޓަރަށް ގެންގޮސްފައިވާ ކަމަށްވެސް ފުލުހުން ބުނެފައިވެއެވެ.

އަދި އެއީ 28 އަހަރުގެ ދިވެހި އަންހެނެއް ކަމަށާ، އެ މީހާ ހެލްތު ސެންޓަރ އަށް ގެންދިޔަ އިރުވެސް ނިޔާވެފައިވާ ކަމަށް، ޑޮކްޓަރުން ފުލުހުންނަށް މައުލޫމާތު ދީފައިވާ ކަމަށް ފުލުހުން ބުނެފައިވެއެވެ.

އަދި އޭނާގެ ޕޯސްޓްމޯޓަމް ހަދަން ނިންމާފައިވާ ކަމަށްވެސް ފުލުހުން ބުނެފައިވެއެވެ.

ނިޝާމާގެ މަރާއި ގުޅިގެން ފުލުހުން ހައްޔަރު ކޮށްފައި ވަނީ އޭނާގެ ފިރިމީހާ އެވެ. އޭނާގެ ބަންދާއި މެދު ގޮތެއް ނިންމުމަށް ކޯޓަށް ހާޒިރު ކުރުމުން އޭނާގެ ބަންދަށް ކޯޓުން 15 ދުވަސް ޖަހާދީފައިވާ ކަމަށް ފުލުހުން ރޭ ބުނެފައި ވެއެވެ.