އިހަވަންދިއްޕޮޅުގައި އަޅާ ޕޯޓް އެހެން ތަނަކަށް ބަދަލެއް ނުކުރަން؛ އެކަން ކުރިއަށް ދާނެ: ސަޢީދު

ކުރީ ސަރުކާރުން އިހަވަންދިއްޕޮޅުގައި އަޅަން ނިންމާފައިވާ ޕޯޓެއް، އެހެން ސަރަހައްދަކަށް ބަދަލުކޮށްފައި ނުވާނެ ކަމަށާ، އެ މަސައްކަތް ކުރިއަށް ދާނެ ކަމުގެ ޔަގީންކަން އިކޮނަމިކް މިނިސްޓަރު މުހައްމަދު ސަޢީދު ދެއްވައިފި އެވެ.

މިއަދުގެ ރައްޔިތުންގެ މަޖިލީހުގެ ޖަލްސާގައި އިކޮނަމިކް މިނިސްޓަރު ސަޢީދާއި ސުވާލު ކުރެއްވުމަށް އެބޭފުޅާ ވަނީ މަޖިލީހަށް ހާޒިރު ކުރައްވާފަ އެވެ.

ސަޢީދާއި ސުވާލު ކުރައްވަން އެދިލެއްވީ ހޯރަފުށީ ދާއިރާގެ މެންބަރު އަހުމަދު ސަލީމެވެ.

އެގޮތުން ސަލީމަށް ފުރުސަތު ދެއްވުމުން އޭނާ ވަނީ، އިހަވަންދިއްޕޮޅުގައި ޓްރާންޝިޕްމަންޓް ބަނދަރެއް ތަރައްގީ ކުރެވެންދެން އެސަރަހައްދުން ދަތުރުކުރާ އާގުބޯޓް ފަހަރަށް ބޭނުންވާ ޚިދުމަތްތައް ގާއިމް ކުރުމަށް ނިމިދިޔަ ސަރުކާރުން ނިންމައި، އެ ސަރަހައްދުގައި ތެޔޮ ސްޓޯރޭޖެއް ގާއިމްކޮށް، ބަންކަރިންގެ ޚިދުމަތް ފެށުމަށް ގަތަރުގެ އާބަކޮން ޓްރޭޑިންގް އެންޑް ކޮންޓްރެކްޓިންގ ކުންފުންޏާއެކު ސޮއި ކުރެވިފައިވާ ކަން ފާހަގަކުރައްވައި، އެ މަސައްކަތް ކުރިއަށް ގެންދާނެތޯ ސުވާލު ކުރައްވާފައެވެ.

ސަލީމްގެ ސުވާލާއި ގުޅިގެން ސަޢީދު ވަނީ އެކަން ކުރިއަށް ގެންދާނެ ކަމަށާ އެ ސަރަހައްދުން ދަތުރު ކުރާ ބޯޓު ތަކަށް ބަންކަރިންގެ ޚިދުމަތާއި ދެންވެސް ދޭންޖެހޭ ޚިދުމަތްތައް ފޯރުކޮށްދެމުންދާނެ ކަމުގެ ޔަގީންކަން މެންބަރަށް އަރުއްވާފައެވެ.

ސައީދުގެ ޖަވާބާއި ގުޅިގެން ސުވާލު ކުރުމަށް ހުޅުވާލެވުނު ފުރުސަތުގައި ކެނދިކުޅުދޫ ދާއިރާގެ މެންބަރު މުހައްމަދު ރާއީ ވަނީ އިހަންދިއްޕޮޅިގައި އަޅަން އޮތް ޕޯޓް ލ.ގާދޫއަށް ބަދަލުކުރަން ސަރުކާރުން ނިންމާފައިވާ ކަމަށާ، ގާދޫގައި ޕޯޓް އަޅަން ސަރުކާރުން ނިންމީ ކޮން ގޮތަކަށް ބައްލަވައިފައިތޯ ސުވާލު ކުރައްވާފައެވެ.

އެ ސުވާލަށް ޖަވާބު ދެއްވަމުން ސަޢީދު ވަނީ އިހަވަންދިއްޕޮޅުގައި އަޅަން ކުރީ ސަރުކާރުން ނިންމި އެއްވެސް ޕޯޓެއްގެ މަސައްކަތް ލާމު އަތޮޅަށް ބަދަލު ނުކުރާ ކަމަށާ، އަދި ސަރުކާރުގެ ވައުދަކީ އިހަވަންދިއްޕޮޅާއި އެކު ލާމު އަތޮޅުގައިވެސް ޕޯޓް ގާއިމް ކުރުން ކަމަށް ސައީދު ވިދާޅުވި އެވެ.

އިހަވަންދިއްޕޮޅުގައި އަޅަން ސަރުކާރުން ނިންމާފައި އޮތް ޕޯޓެއް ސަރުކާރުން ލާމު އަތޮޅަކަށް ބަދަލެއް ނުކުރޭ އިނގޭތޯ؟ ރައީސް ޑރ. މުހައްމަދު މުޢިއްޒުގެ ވަޢުދަކީ އިހަވަންދިއްޕޮޅުގައި ވެސް ޕޯޓެއް ގާއިމް ކުރުން، އަދި އެތާނގައި ކުރެވޭނެ އިންޑަސްޓްރިއަލް މަސައްކަތްތައް ކުރުމާއި އެކުގައި ލާމު އަތޮޅުގައިވެސް ބަނދަރެއް ގާއިމް ކުރުން. އެއީ ދެ ޗެނަލް އަކަށް ވާތީ އެވާހަކަ އައިސްގެން އެ އުޅެނީ. އަޅުގަނޑަށް ގަބޫލުކުރެވޭ ގޮތުގައި ވަރަށް ބޮޑު އޮޅުމެއް އިއްޒަތްތެރި މެންބަރު އަރައިގެން ތި އުޅުއްވީ. އިހަވަންދިއްޕޮޅުގައި ގާއިމް ކުރަން އޮތް އެއްވެސް މަޝްރޫއެއް ލާމު އަތޮޅަކަށް ބަދަލެއް ނުކުރޭ.

އިކޮނަމިކް މިނިސްޓަރު މުހައްމަދު ސަޢީދު

މީގެ އިތުރުން ސަޢީދު ވިދާޅުވީ، ލ.ގާދޫގައި ޕޯޓް އަޅާނީ އެކަމާއި ގުޅިގެން ހަދަންޖެހޭ ހުރިހާ އެނަލިސިސް އެއް ހެދުމަށްފަހުގައި، ތިވާމެއްޓަށް އެއިން އެއްވެސް ގެއްލުމެއް ނުވާނެކަން ކަށަވަރު ކުރައްވާފައި ކަމަށްވެސް ސަޢީދު ވިދާޅުވި އެވެ.