ކުރީގެ އެޑިޔުކޭޝަން މިނިސްޓަރުގެ މައްޗަށް ކޮރަޕްޝަންގެ ތުހުމަތު ކުރައްވައި އެމައްސަލަ ބެލުމަށް އެދިވަޑައިގެންފި!

ކުރީ ސަރުކާރުގެ އެޑިއުކޭޝަން މިނިސްޓަރު ޑރ ޢާއިޝަތު ޢަލީގެ މައްޗަށް ކޮރަޕްޝަންގެ ތުހުމަތު، ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުالله (މޮސްޓާ) ކުރައްވައިފި އެވެ.

2024 ވަނަ އަހަރަށް އެކުލަވާލާފައިވާ ބަޖެޓް ދިރާސާކުރުމަށްފަހު ކޮމިޓީން އެކުލަވާލި ރިޕޯޓަށް މިއަދުގެ މަޖިލީހުގެ ޖަލްސާގައި ބަހުސް ކުރައްވަމުން މޮސްޓާ ވިދާޅުވީ، ނިމިދިޔަ އަހަރުގައިވެސް 50 ބިލިއަން ރުފިޔާގެ ބަޖެޓެއް އެކުލަވާލާފައިވާ ކަމަށެވެ. އެހެން ނަމަވެސް، އޭނާގެ ދާއިރާއަށް ކޮށްދިނުމަށް އެ ބަޖެޓުގައި ހިމަނާފައިވާ ކަންކަން ހާސިލްވެފައި ނުވާ ކަމަށް މޮސްޓާ ވިދާޅުވި އެވެ.

އެޑިއުކޭޝަން ސެކްޓާގައި ޖަހާފައި އިން ނޮޅިވަރަންފަރު އައު ސުކޫލުގެ ޢަމަލީ މަސައްކަތެއް ނުފެށޭ. އެކަމު 50 ބިލިއަން ރުފިޔާ ހުސްވެގެން ގޮއްސި. ދައުލަތުގެ ރައީސުލްޖުމްހޫރިއްޔާ ވިޔަސް މިނިސްޓަރުން ވިޔަސް ޖަވާބުދާރީވާން އެބަޖެހޭ އެ ރުފިޔާއަށްވީ ކިހިނެއްތޯ؟ 50 ބިލިއަނަަށް އެރީ އަޅުގަނޑުމެންގެ ދާއިރާއަށް މި އަދަދު ޖަހައިގެން. އެހެންވީމާ އެއަށް ވީގޮތެއް އަޅުގަނޑުމެންނަށް އެނގެންޖެހޭނެ. މަޖިލިސް މެންބަރުންނަށް އެނގެންޖެހޭނެ. ދިވެހި ރައްޔިތުންނަށް އެނގެންޖެހޭނެ.

އެހެންކަމުން، ފާއިތުވި އަހަރުގެ ބަޖެޓުގައި ނޮޅިވަރަންފަރަށް ކޮށްދެއްވުމަށް ބަޖެޓުގައި ހިމަނާފައި ހުރި ކަންކަމަށްވީ ގޮތެއް މަޖިލީހުގެ ރިޔާސަތުންވެސް ބަލަންޖެހޭ ކަމަށް މޮސްޓާ ވިދާޅުވި އެވެ. އަދި ނޮޅިވަރަންފަރު ނަމުގައި ބަޖެޓްގައި ކަންކަން ހިމެނުމަށް ފަހު އެ ރަށަަށް ކަންކަން ނުކޮށްދީ، އެ ފައިސާ ޚަރަދު ކުރީ ކޮން ދާއިރާއެއްގެ ކުރިއެރުމަށްތޯވެސް ބަލަންޖެހޭ ކަމަށް މޮސްޓާ ވިދާޅުވި އެވެ.

އަބަދުވެސް މިދައްކަނީ ދައުލަތުން ވައްކަމާއި ކޮރަޕްޝަންގެ ވާހަކަ. އެހެންވީމާ އަޅުގަނޑު ހަމަ މިހާރު އެންޓި ކޮރަޕްޝަން ކޮމިޝަނަށް ވެސް ގޮވާލަން، ކުރީގެ އެޑިޔުކޭޝަން މިނިސްޓަރު ޑރ. ޢާއިޝަތު ޢަލީ އަށް ކޮރަޕްޝަންގެ ތުހުމަތު ކޮށް މިއަށްވީ ގޮތެއް، މި ފައިސާއަށް، ނޮޅިވަރަންފަރު އައު ސްކޫލެއް އަޅަންވީ ފައިސާ ކޮންތާކަށްތޯ އައިޝަތު ޢަލީ ލީ. ކުރީގެ ޕްލޭނިންގ މިނިސްޓަރު އަޅުގަނޑުމެން ދާއިރާއަށް މަގު ހަދަން ލީ ލާރިއަށް ކިހިނެއްތޯ ހެދީ. އެކަން ސާފުކޮށްދޭން ޖެހޭނެ. ކުރީގެ ހެލްތު މިނިސްޓަރު ނަސީމް، އަޅުގަނޑުމެން ދާއިރާއަށް ވެއާ ހައުސް އަޅަން ދިން ލާރިއަށް ކިހިނެއްތޯ ހެދީ.

ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުالله (މޮސްޓާ)

މޮސްޓާ ވިދާޅުވީ ބަޖެޓް ފޮތުގައި ކަންކަން ލިޔެފައިވީ ނަމަވެސް އެކަންކަން އަމަލީ ގޮތުން ނުފެންނަ ނަމަށ ބެޖެޓަށް ތާއިދު ނުކުރެވޭނެ ކަމަށެވެެ. އަދި ރައްޔިތުން ބޭނުންވަނީ ލިޔެފައި އޮންނަ ތަރައްގީ ނޫން ކަމަށާ، އެހެނެއް ކަމަކު އަތް ލެވޭ، ލޮލަށް ފެންނަ ތަރައްގީ ކަމަށް ވެސް އޭނާ ވިދާޅުވި އެވެ.