ނުކުމެ މިތިބީ ރައީސް ޑރ.މުޢިއްޒު މާލެސިޓީ އަށް ޚާއްސަކުރައްވާފައިވާ ސިޔާސަތުތައް ތަންފީޒުކުރަން: ޢާޒިމާ

މާލެސިޓީ މޭޔަރު ކަމަށް ވާދަކުރައްވަން ނުކުންނެވީ، ރައީސުލްޖުމްހޫރިއްޔާ ޑރ މުހައްމަދު މުޢިއްޒު މާލެ ސިޓީ އަށް ޚާއްސަ ކުރައްވާފައިވާ ސިޔާސަތުތައް ތަންފީޒުކުރައްވަން ކަމަށް، އެ މަޤާމަށް ޕީއެންސީގެ ޓިކެޓްގައި ވާދަކުރައްވާ ކުރީގެ ބަންޑާރަ ނާއިބު އާއިޝަތު ޢާޒިމާ ޝަކޫރު ވިދާޅުވެއްޖެއެވެ.

ވެރިކަންކުރާ ޕީއެންސީގެ ޓިކެޓްގައި މާލެ ސިޓީ ކައުންސިލްގެ މޭޔަރުކަމަށާއި ކައުންސިލް މެންބަރުންގެ މަގާމަށް ވާދަކުރައްވާ 4 ކެންޑިޑޭޓުންގެ ފޯމު މިއަދު ވަނީ އިލެކްޝަންސް ކޮމިޝަން، އީސީ އަށް ހަށަހަޅުއްވާފައެވެ.

ފޯމު ހުށަހެޅުއްވުމަށްފަހު ނޫސްވެރިންނާއި ބައްދަލުކުރައްވާ ވާހަކަފުޅުދައްކަވަމުން ޢާޒިމާ ވަނީ، އެ މަގާމުތަކަށް ޕީއެންސީގެ ޓިކެޓްގައި ވާދަކުރައްވާ ކެންޑިޑޭޓުންގެ ތެރެއިން ތިން ކެންޑިޑޭޓުންނަކީ އަންހެނުންކަން ފާހަގަކުރައްވާ، އެއީވެސް ހެޔޮ ފާލެއް ކަމަށް ވިދާޅުވެފައެވެ.

އަދި ޢާޒިމާ އާއި ދެންވެސް ޕީއެންސީގެ ފަރާތުން ވާދަކުރައްވާ ކެންޑިޑޭޓުން ތިއްބެވީ ރައްޔިތުންނަށް އެންމެ ރަނގަޅަށް ޚިދުމަތްކުރެއްވުމަށް ކަމަށާއި ރައްޔިތުންނަށް ޚިދުމަތް ކުރެއްވުމަށްވުރެ މުހިންމު އެހެން އެއްވެސް ކަމެއް ނޯންނާނެ ކަމަށް އޭނާ ވިދާޅުވިއެވެ.

"އަޅުގަނޑުމެން ނުކުމެ މި ތިބީ ރައީސް މުޢިއްޒުގެ ވިޝަން ރާއްޖެއަށް ކާމިޔާބު ކުރެއްވުމަށްޓަކައި އޭގެ މާލޭގެ ބައި ހިފައިގެން. އިރާދަކުރެއްވިޔާ އަޅުގަނޑުމެން ވާނެ އިންތިޚާބު ކާމިޔާބު ކޮށްފައި ދިވެހިރާއްޖޭގެ ރައްޔިތުންނަށް އެންމެ އެކަށީގެންވާ ގޮތަށް ޚިދުމަތް ކުރާނެ ބަޔަކަށް. އަޅުގަނޑުމެންނަށް ދިވެހި ރައްޔިތުންނަށް ޚިދުމަތްކުރުމަށްވުރެ މުހިންމު ކަމެއް ނޯންނާނެ. މިއަދު އަޅުގަނޑުމެން ކުރިމަތި މިލަނީ ރައީސް ޑރ. މުހައްމަދު މުޢިއްޒުގެ ވިޝަންގެ ތެރެއިން މާލެ އަށް ޚާއްސަ ކުރެވިފައިވާ ސިޔާސަތުތައް ތަންފީޒު ކުރުމަށްޓަކައި. އަޒުމާއެކު އަޅުގަނޑުމެން މި ތިބީ. އަޅުގަނޑުމެންގެ ޢަޒުމެއް ނުގުޑާނެ."

މާލެސިޓީ މޭޔަރު ކަމަށް ޕީއެންސީގެ ޓިކެޓްގައި ވާދަކުރައްވާ ކުރީގެ ބަންޑާރަ ނާއިބު އައިޝަތު ޢާޒިމާ ޝަކޫރު

ޢާޒިމާ ވަނީ އައު ސަރުކާރުގެ ސިޔާސަތުތައް ތަންފީޒުކޮށް ރައްޔިތުންނަށް ޚިދުމަތް ކުރުމަށް ފުރުސަތު ދެއްވުމަށް އޭނާ އާއި ޕީއެންސީގެ އެހެން ކެންޑިޑޭޓުންނަށް ވޯޓު ދެއްވުމަށް އެދިވަޑައިގެންފައެވެ.