މުޒާހަރާކޮށް ކޫއްޑޫ މަސް ފެކްޓަރީ ހުއްޓުވުމުން، މަސް ނުކިރި މަސްވެރިންނަށް ބޮޑު ގެއްލުމެއް!

މަސްވެރިންނަށް ލިބެންޖެހޭ ފައިސާ ނުލިބި ލަސްވުމުގެ ސަބަބުން ކޫއްޑޫގައި މަސްވެރިން ކުރަމުންގެންދާ އިހްތިޖާޖުގެ ސަބަބުން މަސްވެރިންނަށް އެތައް ހާސް ރުފިޔާގެ ގެއްލުން ލިބެމުންދާކަމަށް ބުނެފިއެވެ.

މަސްވެރިން ބާނާ މަހުގެ ފައިސާ ނުލިބޭ ކަމަށްބުނެ، މީގެ ތިން ދުވަސް ކުރިން ހުވަދުއަތޮޅު ބައެއް މަސްވެރިން ކޫއްޑޫ އަށް އަރައި އިހްތިޖާޖް ކޮށް، ކޫއްޑޫ މަސް ފެކްޓަރީގެ އޮޕަރޭޝަންވެސް ވަނީ ހުއްޓުމަކަށް ގެނެސްފައެވެ.

އެ މަސްވެރިން މުޒާހަރާ ކުރަންފެށުމާއިއެކު، މަސްވެރިކަމާއި ބެހޭ ވުޒާރާގެ ވަޒީރު އަހުމަދު ޝިޔާމް ވަނީ އެފަރާތްތަކާއި ބައްދަލު ކުރުމަށް ކޫއްޑޫއަށް ވަޑައިގެން އެ މީހުންގެ ކަންބޮޑުވުން ތައް އަޑުއައްސާވަފައެވެ. އަދި މަސްވެރިންނަށް ދޭންޖެހޭ ހުރިހާ ފައިސާއެއްވެސް މާރިޗު މަހުގެ 5 ވަނަ ދުވަހުގެ ކުރިން ދީ ޚަލާސް ކުރައްވާނެ ކަމަށް ވަޒީރު ވަނީ ވިދާޅުވެފަ އެވެ.

އެހެން ނަމަވެސް، ކޫއްޑޫގައި ފެށުނު އެ އިހްތިޖާޖު އަދިވެސް ހުއްޓާނުލާ ކުރަމުން އަންނަ އިރު، އޭގެ ސަބަބުން، އިހްތިޖާޖު ގައި ބައިވެރިނުވެ، މަސް ބާނަންދާ މަސްވެރިންނަށް ބޮޑެތި ގެއްލުންތަކެއް ވަމުން އަންނަ ކަމަށް އެމަސްވެރިން ވަނީ ބުނެފައެވެ.

އެގޮތުން "ވޮއިސް" އަށް މަޢުލޫމާތު ދެއްވަމުން ގދ. ދެއްވަދޫ މަސްވެރިއެއް ކަމަށްވާ އަހުމަދު ސުޢޫދު ވިދާޅުވީ، ފައިސާ ނުލިބިގެން އިހްތިޖާޖް ކުރުމުން، މަސްވެރިންގެ ކަންބޮޑުވުންތައް އަޑުއައްސަވައި، އެ ފައިސާ ލިބޭނެ ތާރީޚްވެސް ވަޒީރު ހާމަކުރައްވާފައިވާ ކަމަށެވެ. އެހެންކަމުން އިތުރަށް އިހްތިޖާޖު ކޮށް، ކޫއްޑޫ އޮޕަރޭޝަން ހުއްޓުވުމުން، މަސްބާނައިގެން މަސް ކިރަން އަންނަ ދޯނިތަކަށް މަސް ނުކިރޭ ކަމަށާ، އަދި އައިސް އަޅަން އަންނަ ދޯނި ތަކަށް އައިސް ވެސް ނުލިބޭ ކަމަށެވެ.

"މުޒާހަރާގެ ސަބަބުން ރާއްޖޭގެ އެތައް ބައިވަރު މަސްވެރިންނަަށް ގެއްލުން ތަކެއް ލިބެމުން އެބަދޭ. ހުރިހާ ދޯނި ތަކަކީ ޗިލަރ ހަރުކޮށްފައި ހުރި ދޯނިތަކެއް ނޫން. ބައެއް ދޯނި ތަކަކީ އައިސް އަޅައިގެން މަހަށްދާ ދޯނިތައް. މިހާރުވެސް ވަރަށް ގިނަ މީހުންގެ މަސްތައް ހަލާކުވަމުން އެދަނީ މަސް ނުކިރުމުގެ ސަބަބުން. އެއްބަޔަކު އެ ޑިމާންޑު ކުރަނީ ލާރި ހޯދަން. އަނެއް ބަޔަކު މަސް ކިރަން. ލާރި ހޯދަން މުޒާހަރާ ކުރާ މީހުންނާ ހުރެ މަސް ކިރޭގޮތެއް ނުވޭ. ކޫއްޑޫ އެ އޮތީ ހިސާރު ކޮށްފައި. ހައްގު އޮތީ އެއްބައެއްގެ ނޫން. ހައްގު އޮވޭ އެންމެންގެ. މުޒާހަރާގެ ޖަވާބު އެ އޮތީ ދީފައި" މަސްވެރި ކަމުގެ މަސައްކަތުގައި އުޅޭތާ ގާތްގަނޑަކަށް 20 އަހަރު ވެފައިވާ ސުޢޫދު ވިދާޅުވިއެވެ.

މީގެ އިތުރުން ސުޢޫދު ވިދާޅުވީ، ނިމިދިޔަ ސަރުކާރުން އިންތިޚާބާއި ދިމާކޮށް މަހުގެ އަގު ބޮޑު ކުރުމުގެ މިފްކޯއަށާއި މަސްވެރިކަމަށް ވެސް ބޮޑު ގެއްލުމެއް ވެފައިވާ ކަމަށެވެ. އެގޮތުން މަސްދޯނިތަކަށް ފައިސާ ނުދެވި ހުއްޓައި، އެފަދައިން އަގު ބޮޑު ކޮށްލުމުގެ ސަބަބުން، އެ އަގު ބޮޑުކުރި ފައިސާވެސް ދޭންޖެހުނީ އަދުގެ ސަރުކާރަށް ކަމަށާ، އެ ފައިސާ މި ސަރުކާރުން ދީ ނިންމާފައިވާ ކަމަށެވެ.

އެހެންކަމުން, ފައިސާ ލިބޭނެ ކަމުގެ ފުރިހަމަ ޔަގީންކަން ދެއްވާފައި ވާއިރު، މިހާރު އިހްތިޖާޖު ކުރަމުންދަނީ ސިޔާސީ ބޭނުމެއްގައި ކަމަށް ބެލެވޭ ކަމަށް ސުޢޫދު ވިދާޅުވި އެވެ.

ސުޢޫދުގެ އިތުރުން، ގދ. ތިނަދޫ އަށް ނިސްބަތްވާ މަސްވެރިއެއް ކަމަށްވާ ޝަރީފްވެސް ވަނީ، އެ ދޯނިން ގާތްގަނޑަކަށް 4 ޓަނުގެ މަސް ބާނައިގެން މަސް ނުކިރިފައި އޮތް ކަމަށާ، އޭގެ ސަބަބުން ގާތްގަނޑަކަށް 80,000 އެއްހާ ރުފިޔާގެ ގެއްލުން ލިބިގެންދާނެ ކަމަށެވެ. އަދި ކޫއްޑޫ މަސް ފެކްޓަރީގެ މަސައްކަތް ހުއްޓުވައި ހިންގަމުންދަނީ ޖަރީމާއެއް ކަމަށް އޭނާ ސިފަކުރައްވާފައިވެއެވެ.

ޝަރީފްގެ އިތުރުން "ވޮއިސް" އާއި ވާހަކަ ދައްކަވަމުން ގދ. މަޑަވެލީ ކަމަނަދޯނީގެ ޝަފީގުވެސްވަނީ، ކޫއްޑޫ މަސް ފެކްޓަރީ ގެ މަސައްކަތް ހުއްޓުވުމުގެ ސަބަބުން ތެޔޮ ނުލިބިގެން މަހަށް ނުފުރައި ހުންނަންޖެހިފައިވާ ކަން ފާހަގަކޮށްފައެވެ. އަދި މުޒާހަރާ ކުރަމުންދަނީ މާ މަދު ދޯނީގެ މަސްވެރިން ކަމަށްވާއިރު، އެމީހުންގެ ސަބަބުން އެތައް އާއިލާއަކަށް އާމްދަނީ ހޯދުމުގެ މަގު ބަންދުވެފައިވާ ކަމަށް އޭނާ ބުންޏެވެ.

އެހެންކަމުން، އެކަން ބަލައި ނުގަނެވޭނެ ކަމަށާ، އިހްތިޖާޖު ކުރި ނަމަވެސް، އެހެން މީހުންގެ ހައްގުތަކަށް އެރިގެން ނުވާނެ ކަމަށް އޭނާ ބުންޏެވެ.