އެފްޑީސީގެ ޓަވަރުތަކުގައި ހަވާލުނުކުރެވި ހުރި އެޕާޓްމަންޓްތަކުގެ އަދަދު 74 ގައި

ގެދޮރުވެރިޔާ ސްކީމުގެ ދަށުން ހުޅުމާލޭގައި އިމާރާތް ކޮށްފައިވާ ފަހި ދިރިއުޅުން ކޯޕަރޭޝަނުގެ އަމާން ދޯދި އަދި އަމާން އުދަރެހުގެ 4،000 ހައުސިން ޔުނިޓްގެ ތެރެގައި ހިމެނޭ ބައެއް ޔުނައިޓްތައް އެއްކޮށް އަދިވެސް ހަވާލުކޮށް ނުނިމޭކަމަށް  އެފްޑީސީން އާއްމުކުރި ތަފާސްހިސާބުތަކުން ދައްކައިފިއެވެ.

އެފްޑީސީން އާއްމުކުރި މައުލޫމާތަށް ބަލާއިރު، ތަފާތުއެކި ސަބަބުތަކާހެދި 74 ހައުސިން ޔުނިޓް އަދި ހަވާލުނުކުރެވި އަދި އެބައޮތެވެ. ވޮއިސްއަށް މައުލޫމާތު ލިބިފައިވާ ގޮތުގައި މީގެ ތެރޭގައި ހިމެނެނީ ޤާނޫނީ ގޮތުންނާއި އެނޫންވެސް ބައެއް ސަބަބުތަކާހެދި ހަވާލުނުކުރެވި ހުރި ޔުނިޓްތަކެވެ.

އެފްޑީސީން ވަނީ 4،000 ހައުސިން ޔުނިޓްގެ ތެރެއިން 3،926 ޔުނިޓް ހަވާލުކޮށްފައެވެ. އެފްޑިސީގެ ބެލެނިވެރިކަމުގެ ދަށުގައި ހުރި މި ޔުނިޓްތަކަށް ބަލާއިރު، މީގެ ކުރިން ބޯހިޔާވަހިކަމަށް ދޫކޮށްފައިވާ ތަންތަނަށްވުރެ އެފްޑީސީގެ ޔުނިޓްތަކުގެ ކުލި ދެއްކުމުގެ ރޭޓް ރަނގަޅުަކަމަށް އެ ކުންފުނިން އާއްމުކުރި ތަފާސްހިސާބުތަކަށް ބަލާލުމުން އެނގެއެވެ. އެފްޑީސީން އާއްމުކުރި މައުލޫމާތަށް ބަލާއިރު ހަތަރުހާސް ޔުނިޓްގެ ތެރެއިން ގަވާއިދުން ކުލިދައްކާ ޔުނިޓްތަކުގެ ޖުމްލަ އަދަދު 3،362 ޔުނިޓުގައި އުޅޭއިރު ގަވާއިދުން ކުލި ނުދައްކާ ޔުނިޓްތަކުގެ އަދަދު އުޅެނީ، 564 ގައެވެ.

ބޯހިޔާވަހިކަމުގެ އެކިއެކި ސްކީމްތަކުން ދޫކޮށްފައިވާ ފްލެޓްތަކަށް ކުލި ނުދައްކާ އުޅޭ މައްސަލަ ރާއްޖޭގައި ވަރަށް ބޮޑެވެ. މި މައްސަލަ ބޮޑުވެ، އެންމެފަހުން ކުލި ނުދައްކާ ފަރާތްތަކަށް ލޯނު ނުނެގޭގޮތަށް އުސޫލެއް ގާއިމްކޮށްފައިވާކަންވެސް ފާހަގަކޮށްލެވެއެވެ. އެޗްޑީސީން ބަލަހައްޓަމުންދާ ހިޔާ ޓަވަރުތަކަށް އެކަނި ބަލާލިނަމަވެސް މިދިޔަ އަހަރުގެ ޖުލައިމަހުގެ ނިޔަލަށް ކުލީގެ ގޮތުގައި އެޗްޑީސީއަށް 890 މިލިއަނަށް ވުރެ ގިނަ ރުފިޔާ ނުލިބިވާކަމަށް ތަފާސްހިސާބުތަކުން ދައްކައެވެ.