ގަދަ ފިނީގެ ސަބަބުންނާއި އިމާރާތްތައް ވެއްޓުމުގެ ސަބަބުން ޣައްޒާގެ ފަސް މީހުން މަރުވެއްޖެ

އިސްރާއީލުން ފަލަސްތީނުގެ ނަސްލު ނައްތާލުމަށް ހިންގަމުންދާ ޤަތުލުޢާއްމުގައި ސުންނާފަތިކޮށްލާފައިވާ ޢިމާރާތްތައް ވެއްޓުމުގެ ސަބަބުން މަދުވެގެން ފަސް މީހުން މަރުވެ، ފިނީގެ ސަބަބުން އިތުރު ކުދިންތަކެއްގެ ފުރާނަ ގޮސްފިއެވެ.

ޣައްޒާގެ ސިއްހީ އޮފިޝަލުން ހާމަކުރި ގޮތުގައި، އަންގާރަ ދުވަހު މަރުވި މީހުންގެ ތެރޭގައި ދެ އަންހެނުންނާއި، އަންހެން ކުއްޖެއްގެ އިތުރުން ފިރިހެނަކު ހިމެނެއެވެ. މީގެ ތެރެއިން ތިން މީހުންނަކީ އެއް އާއިލާއަކަށް ނިސްބަތްވާ ބައެކެވެ.

އެގޮތުން ޣައްޒާ ސިޓީގެ އައްސޭރިފަށުގައި ހުރި ފޭލިގެއެއްގެ މައްޗަށް 8 މީޓަރުގެ އުސް ފާރެއް ވެއްޓި މަރުވީ އުމުރުން 72 އަހަރުގެ މުޙައްމަދު ޙަމޫދާ އާއި، އޭނާގެ 15 އަހަރުގެ ކާފަ ދަރިފުޅުގެ އިތުރުން އޭނާގެ ދަނބިދަރިފުޅެވެ.

ފިނީގެ ސަބަބުން ލިބުނު ގެއްލުންތަކަށް ބަލާއިރު، އެއް އަހަރުގެ ފިރިހެން ކުއްޖަކު ހައިޕޯތާމިއާ (ގަދަ ފިނީގެ ސަބަބުން ހަށިގަނޑުގެ ހޫނުމިން ދަށްވުން) ޖެހިގެން މަރުވެފައިވާ ކަމަށް ޣައްޒާގެ ހެލްތު މިނިސްޓްރީން ބުނެއެވެ. މީގެ އިތުރުން، އެކަށީގެންވާ ހިޔާވަހިކަމެއް ނެތުމުގެ ސަބަބުން ހޯމަ ދުވަހުގެ ރޭ ވެސް ދެ ކުޑަކުދިން މަރުވެފައިވާ ކަމަށް އަލްޖަޒީރާއިން ރިޕޯޓުކޮށްފައިވެއެވެ.

އޮކްޓޫބަރު 10 އިން ފެށިގެން ޤަތުލްޢާއްމު ހުއްޓާލުމުގެ އެއްބަސްވުމެއް އޮތް ނަމަވެސް، އިސްރާއީލުން ދަނީ ޣައްޒާއަށް ބޭނުންވާ އިންސާނީ އެހީއާއި ހިޔާވަހިކަން ގާއިމުކުރުމަށް ބޭނުންވާ ތަކެތި އެތެރެކުރުމަށް ހުރަސް އަޅަމުންނެވެ.

މިކަމުގެ ސަބަބުން ގިނަ ބަޔަކު ދިރިއުޅެމުންދަނީ ވަގުތީ ފޭލިގެތަކުގައެވެ. އަންގާރަ ދުވަހުގެ ގަދަ ވަޔާއެކު އެތައް ސަތޭކަ ފޭލިގެއެއް ވަނީ ވަޔާ ގޮސްފައެވެ.

ޔުނިސެފްގެ ތަރުޖަމާނު ޖޭމްސް އެލްޑަރ ވިދާޅުވި ގޮތުގައި، ޤަތުލްޢާއްމު ހުއްޓާލި ފަހުން ވެސް 100 އަށްވުރެ ގިނަ ކުޑަކުދިން ވަނީ ޝަހީދުކޮށްލާފައެވެ. އަދި މި ފިނި މޫސުމުގައި މިހާތަނަށް ހަ ކުދިން ފިނީގެ ސަބަބުން މަރުވެފައިވާ ކަމަށް އޭނާ ފާހަގަކުރެއްވިއެވެ.

ޣައްޒާގެ މަދަނީ ދިފާއީ ބާރުގެ ތަރުޖަމާނު މަޙްމޫދު ބާސަލް ވަނީ، އިސްރާއީލުގެ އުދުވާނުގެ ސަބަބުން ހަލާކުވެފައިވާ އިމާރާތްތަކަކީ ކޮންމެ ވަގުތެއްގައިވެސް ވެއްޓިދާނެ ތަންތަން ކަމަށްވާތީ، އެފަދަ ތަންތަނަށް ހިޔާވަހިކަން ހޯދަން ނުވަނުމަށް ރައްޔިތުންނަށް އިލްތިމާސްކޮށްފައެވެ.

މި ހާދިސާއާ ގުޅިގެން ހަމާސް ޖަމާއަތުން ނެރުނު ބަޔާނެއްގައި ބުނެފައިވަނީ، ބައިނަލްއަގުވާމީ މުޖުތަމައުން ޣައްޒާގެ ރައްޔިތުންނަށް އެހީތެރިކަން ފޯރުކޮށްދިނުމުގައި ނުކުޅެދިފައިވާ ކަމަށާއި، މިއީ އިންސާނީ ތާރީޚު ދުށް އެންމެ ބިރުވެރި ނަސްލު ނައްތާލުމުގެ އަމަލު ކަމަށެވެ.

ގަތަރުގެ ފޮރިން މިނިސްޓްރީން ވެސް ވަނީ މިއީ އިންސާނުން ރާވައިގެން ހިންގާ އިންސާނީ ކާރިސާއެއް ކަމަށް ސިފަކޮށް، އެއްވެސް ޝަރުތަކާ ނުލައި އެހީ އެތެރެކުރުމަށް އިސްރާއީލަށް ގޮވާލާފައެވެ.