ތުރުކިޔޭ އާއި ސީރިޔާއަށް އެހީވުމަށް ވިޔަފާރިވެރިއެއް 30 މިލިއަން ޑޮލަރު ހަދިޔާކޮށްފި

މިމަހު 6 ވަނަދުވަހު ތުރުކިޔޭ އަދި ސީރިއާއަށް އައި ބާރުގަދަ ބިންހެލުމާއި ގުޅިގެން ހާލުގައި ޖެހިފައިވާ ފަރާތްތަކަށް އެހީވުމަށް ޕާކިސްތާނުގެ ވިޔަފާރިވެރިއެއް 30 މިލިއަން އެމެރިކާ ޑޮލަރު ހަދިޔާކޮށްފި އެވެ.

އެމެރިކާގައި ދިރިއުޅޭ ޕާކިސްތާނުގެ މި ވިޔަފާރި ވެރިޔާ އަކީ ކާކުކަން ހާމަކުރަން އޭނާ ބޭނުން ނުވާއިރު، އޭނާ އެހީގެ ގޮތުގައި ދިން 30 މިލިއަން އެމެރިކާ ޑޮލަރު ހަވާލުކޮށްފައިވަނީ އެމެރިކާގައި ހުންނަ ތުރުކިޔޭ އެމްބަސީއަށެވެ. އަދި އޭނާގެ އެހީ ފޯރުކޮށްދީފައިވަނީ ތުރުކިޔޭ އަދި ސީރިއާގައި ހާލުގައި ޖެހިފައިވާ ފަރާތްތަކަށް ކަމަށްވެސް މީޑިއާ ރިޕޯޓްތައް ބުނެއެވެ.

ޕާކިސްތާނުގެ ކާކުކަން ނޭނގޭ މި ވިޔަފާރިވެރިޔާ ވެދިން ދީލަތި އެހީއާއި ގުޅިގެން އެ ގައުމުގެ ބޮޑު ވަޒީރު ޝެހެބާޒް ޝަރީފް ވަނީ އެކަމަށް ވަރަށް ބޮޑަށް ތައުރީފް ކުރައްވާފައެވެ.

އެގޮތުން ކުރެއްވި ޓުވީޓެއްގައި ޝެހެބާޒް ވަނީ ޕާކިސްތާނުގެ ކާކުކަން ނޭނގޭ އެ ވިޔަފާރިވެރިޔާގެ އެ ޢަމަލުގެ ސަބަބުން ވަރަށް ބޮޑަށް އަސަރުކޮށްފައިވާ ކަމަށެވެ.

އަދި މިފަދަ ޒަމާނެއްގައި އިންސާނިއްޔަތު ކަން ދުނިޔޭގައި ދެމި މި އޮންނަނީވެސް އެފަދަ ހެޔޮ ދަރުމަވެރިންގެ ޢަމަލު ތަކުގެ ސަބަބުން ކަމަށްވެސް ޝެހެބާޒް ވިދާޅުވިއެވެ.

ބިންހެލުމުގައި ތުރްކިޔޭ އާއި ސީރިޔާ އަށް އައި ބާރުގަދަ ބިންހެލުން ތަކުގައި ދެޤައުމުން ނިޔާވި މީހުންގެ ޢަދަދު މިހާރު ވަނީ 34,000 އަށް އަރާފައެވެ. އެގޮތުން ތުރްކިޔޭ އިން މިހާތަނަށް 29،605 މީހުން ނިޔާވެފައިވާއިރު ސީރިޔާގެ 4،574 މީހުން ވަނީ ނިޔާވެފައެވެ.

ރިކްޓަރ މިންގަނޑުން 7.8އާއި 7.5ގެ ބާރުމިނުގައި އައި ބިންހެލުންތަކުގައި ތުރުކީވިލާތުގައި އެކަނިވެސް 6,000 އަށްވުރެ ގިނަ ޢިމާރާތް ވެއްޓިފައިވާއިރު، ޢިމާރާތްތަކުގެ ދަށުން މަރުވެފައިވާ އިތުރު މީހުންގެ ހަށިތައް ދަނީ ފެންނަމުންނެވެ. ޢިމާރާތްތަކުގެ ދަށުގައި ތާށިވެފައިވާ އެތަކެއް ސަތޭކަ ބަޔަކު ދިރިތިއްބާ ސަލާމަތް ކުރެވިދާނެ ކަމުގެ އުންމީދު ފަނޑުވަމުންދިޔަ ނަމަވެސް، އެ މަސައްކަތް ހުއްޓުމެއް ނެތި ދަނީ ކުރަމުންނެވެ.

ބިންހެލުމާ ގުޅިގެން ސޫރިޔާގައި 5.3 މިލިއަނަށްވުރެ ގިނަ މީހުންގެ ގެދޮރު ގެއްލުން އެކަށިގެންވާކަމަށާއި ތުރުކީއާއި ސޫރިޔާގައި ގާތްގަނޑަކަށް 900،000 މީހުން ބަނޑުހައި ހޫނުކަން ތަޙައްމަލުކުރަމުން އަންނަކަމަށް އދ.އިން ވަނީ ހާމަކޮށްފައެވެ.

ބިންހެލުމުން އައިފަހުން 150 ގަޑިއިރަށްވުރެ ގިނަ ވަގުތު ފާއިތުވެފައިވާއިރު، ވެއްޓިފައިވާ ބައެއް ޢިމާރާތްތަކުގެ ކޮންކްރީޓްތަކާއި ފާރުތަކުގެ ދަށުން ބައެއް މީހުން ވަނީ ދިރިތިއްބާ ސަލާމަތް ކުރެވިފައެވެ. މީހުން ސަލާމްތަކުރުމުގެ މަސައްކަތުގައި އެކި ޤައުމުތަކުން 100,000 އަށްވުރެ ގިނަ މީހުން ދަނީ ހަރަކާތްތެރިވަމުންނެވެ.