ހަށިވިއްކާ ތަންތަން ނުހުއްޓުވާ މައްސަލައިގައި މިނިސްޓަރު މަޖިލީހުގައި ހުންނެވީ ހަނު
ރާއްޖޭގައި ހަށިވިއްކުން އާންމުވެފައިވާ މައްސަލައާ ގުޅޭ ގޮތުން އިސްލާމިކް މިނިސްޓަރު ޑރ. އަހުމަދު ޒާހިރުއާ ސުވާލު ކުރުމުން އެއްވެސް ޖަވާބެއް ނުދެއްވައި ހަނު ހުންނަވައިފި އެވެ.
މިއަދު ކުރިއަށް ދިޔަ ރައްޔިތުންގެ މަޖްލީހުގެ ޖަލްސާ ގައި ނައިފަރު ދާއިރާގެ ޕީޕީއެމްގެ މެންބަރު އަހުމަދު ޝިޔާމް ވަނީ ހަށިވިއްކާ ތަންތަން ފުޅާދާއިރާއެއްގައި އޮޕަރޭޓު ކުރަމުންދާއިރު އެކަން ނުހުއްޓުވޭ ސަބަބަކީ ކޮބައިތޯ އިސްލާމިކް މިނިސްޓަރާއި ސުވާލު ކުރައްވާފައެވެ.
”ދެވަނަ ސުވާލަކީ ފުޅާ ދާއިރާއެއްގައި ދިވެހިރާއްޖޭގައި އެބަ، އޮޕަރޭޓު ކުރަމުން ދޭ… މިނިސްޓަރުގެ ނުވަތަ މިނިސްޓްރީގެ ދައުރެއް އޮތީ ބާއޭ.. އެކަންކަން ނުހުއްޓި މިދަނީ..“ ޝިޔާމް ސުވާލު ކުރެއްވިއެވެ.
ޝިޔާމްގެ އެހެން ތިން ސުވާލަށް ޖަވާބު ދެއްވުމަށް ފަހު، ހަށިވިއްކުމާ ބެހޭ ސުވާލަށް ޒާހިރު އެއްވެސް ޖަވާބެއް ނުދެއްވައި ވާހަކަ ނިންމަވައިލެއްވީ އެވެ.
އެކަމާއި ގުޅިގެން ނިޒާމީ ނުކުތާއެއް ނަންގަވައި ޝިޔާމް ވިދާޅުވީ އޭނާ ދެވަނައަށް ކުރީ އެންމެ މުހިންމު ސުވާލު ކަމަށް ވިދާޅު އެ ސުވާލު ތަކުރާރު ކުރެއްވި އެވެ.
”ދެވަނަ ސުވާލަކީ އެންމެ މުހިންމު ސުވާލު.. ރާއްޖޭގައި ފުޅާ ދާއިރާއެއްގައި ހަށި ވިއްކާ ތަންތަން އޮޕަރޭޓުވާ ވާހަކައާއި.. މިނިސްޓަރުގެ ނުވަތަ މިނިސްޓަރުގެ ދައުރެއް އެކަމުގައި އޮތީ ތޯ… އެކަންތައް ނުހުއްޓިގެން މި އުޅެނީ.. މި ސުވާލަށް ޖަވާބު ދެއްވިއްޔާ ވަރަށް ރަނގަޅު“ ޝިޔާމް ވިދާޅުވި އެވެ.
ނަމަވެސް އެ އަށް ވެސް ޑރ. ޒާހިރު ޖަވާބެއް ނުދެއްވި އެވެ.
ރާއްޖޭގައި މަސާޖު ޕާލަރު ތަކުގެ ނަމުގައި ހުޅުވާފައި ހުންނަ ގިނަ ތަންތަނުގައި ހަށިވިއްކުމުގެ ވިޔަފާރި ކުރާ މައްސަލަތައް ވަނީ ވަރަށް ބޮޑަށް އާންމުވެފަ އެވެ. ފަހަކަށް އައިސް ސޯޝަލް މީޑިއާ މެދުވެރިކޮށް، ހަށިވިއްކާ އަންހެނުން ވަރަށް ފާޅުކަން ބޮޑު ގޮތެއްގައި އިޝްތިހާރު ކުރެ އެވެ.
ނަމަވެސް އެ މައްސަލާގައި ކަމާބެހޭ އިދާރާތަކުން ފިޔަވަޅު ނާޅާތީ ގިނަ ބައެއްގެ ފާޑުކިޔުންތައް ވަނީ ސަރުކާރަށް ޚާއްޞަ ކޮށް އަދާލަތުޕާޓީއަށް އަމާޒުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
