ކޯވިޑުތެރޭ ޤާސިމުގެ މުވައްޒަފުންނާ ވިޔަފާރިތަކަށް ފައިސާ ދިނީ މި ސަރުކާރުން: ހުސެއިން ޝަމީމު

ކޯވިޑް-19 ގެ ޙާލަތުގައި އާންމުންގެ ފުދުންތެރިކަން އެންމެ ދަށަށް ދިޔަ ވަގުތު ޖުމްހޫރީ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމްގެ މަސައްކަތްތެރިންނަށް މުސާރަ ނުދީ ހިފެހެއްޓުމާއި ގުޅިގެން އެ ފަރާތްތަކަށް އިންކަމް ސަޕޯޓު ދީ، ނުވިތާކަށް ޤާސިމުގެ ވިޔަފާރިތަކަށް ވެސް ފައިސާ ދިނީ މި ސަރުކާރުން ކަމަށް ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސެއިން) ވިދާޅުވެއްޖެ އެވެ.

ޝަމީމު މިފަދައިން ވިދާޅުވެފައިވަނީ މަޖިލީހުގެ ރައީސް މުޙައްމަދު ނަޝީދާއި އޭނާއަށް ތާއީދުކުރާ އެމްޑީޕީގެ "ފިކުރެއްގެ ދިރުން" ގޮތްޕަށް ނިސްބަތްވާ ފަރާތްތަކުން ސަރުކާރުން އެމްޑީޕީގެ ސިޔާސަތުތައް ތަންފީޒު ނުކުރާކަމަށް ބުނެ އެ ޕާޓީގެ ސިޔާސަތުތަކާއި ދެކޮޅު ޖުމްހޫރީ ޕާޓީގެ ކެންޑިޑޭޓަށް ތާއީދުކުރަން ނިންމާފައިވާކަން ފާހަގަކުރައްވާ އިއްޔެ ކުރިއަށް ގެންދިޔަ ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން ނެވެ.

ޝަމީމު ވިދާޅުވީ ޤާސިމަކީ ކޯވިޑާއި ގުޅިގެން ރައްޔިތުންނަށް ދިމާވި އެންމެ ބޮޑު އިޤްތިޞާދީ ކާރިސާގައި އަމިއްލަ މުވައްޒަފުންނަށްވެސް މުސާރަ ނުދެވުނު ބޭފުޅެއްކަމަށެވެ.

އެގޮތުން ޤާސިމުގެ ވިޔަފާރުތައް ކުރިއެރުވުމަށް މަސައްކަތްކުރި އޭނާގެ މުވައްޒަފުންނަށް ވެސް ކޯވިޑުގައި ދިނީ އެންމެ އެއް ހާސް ރުފިޔާ ކަމަށާއި، އެ މުވައްޒަފުންނަށް ބޭނުން ޖެހުނު ދުވަހު އިންކަމް ސަޕޯޓު ފޯރުކޮށްދިނީ މި ސަރުކާރުން ކަމަށް ޝަމީމު ވިދާޅުވި އެވެ.

އޭގެ އިތުރުން އޭނާ ވިދާޅުވީ ޤާސިމުގެ ވިޔަފާރިތަކަށް ވެސް މި ސަރުކާރުން ފައިސާ ދީފައިވާ ކަމަށެވެ. ޤާސިމު ބަނގުރޫޓުނުވެ ސަލާމަތްވީ ސަރުކާރުން އެހީތެރިކަން ފޯރުކޮށްދީގެންކަން ޝަމީމު ފާހަގަކުރެއްވި އެވެ.

"ރައްޔިތަކާއި ރައްޔިތެއް، އެ ހިސާބަށް ވިޔަފާރި ގެނެސްދިން އެތައް ސަތޭކަ މުވައްޒަފުންނަށް ފްލައިޓުގެ އިންޖިނިއަރުންތަކަށް ދާންދެން 1000 ރުފިޔާ މުސާރަ ދިނީ، އަންއެމްޕްލޮއިމަންޓު ބެނެފިޓް ދެނީ މި ސަރުކާރުން. އެބޭފުޅާގެ ވިޔަފާރިތައް ސަލާމަތްކުރަން ވެސް ފައިސާ ދިނީ މި ސަރުކާރުން"

ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސެއިން)

އެއާއި ގުޅުވާ ޝަމީމު ވިދާޅުވީ އެމްޑީޕީގެ ރިޔާސީ ކެންޑިޑޭޓުގެ ބަދަލުގައި ފިކުރެއްގެ ދިރުމުގެ މަދު ބަޔަކަށް ކަމުދިޔައީ ރައްޔިތުންނަަށް ބޭނުން ޖެހުނު ދުވަހު އެމީހުންނަށް އެހީތެރިކަން ފޯރުކޮށްނުދެވުނު، އަދި އެހީވާން ޖެހޭކަމަށް ޤަބޫލު ނުކުރާ ފިކުރެއްގެ ބޭފުޅެއް ކަމަށެވެ.

އަދި ޤާސިމަށް ވެރިކަން ހޯދުމަށް އެމްޑީޕީ ބައިބައިކޮށް، އެމްޑީޕީ އިދަޖައްސާލަން މަސައްކަތް ކުރުމަކީ ހުތުރުކަމެއްކަމަށް ޝަމީމު ވަނީ ސިފަކުރައްވާފަ އެވެ.