ރިޔާސަތަށް އަރާނެ މީހަކު އައްޔަން ނުކުރުމަކީ ރައީސް ނަޝީދު އަމިއްލައަށް އިސްތިއުފާދިނުން: ޝަރީފު

ނައިބުރައީސް އިތުބާރުނެތްކަމަށް ވޯޓްނަގަން ބާއްވާ މަޖިލީހުގެ ޖަލްސާގައި ޤަވާއިދުގައި ވާގޮތަށް ރިޔާސަތަށް އަރާނެ މީހަކު އައްޔަން ނުކުރުމަކީ މަޖިލީހުގެ ރައީސް މުހައްމަދު ނަޝީދު އަމިއްލައަށް އިސްތިއުފާދެއްވުން ކަމަށް، މަޖިލީހުގެ ކެލާ ދާއިރާގެ އެމްޑީޕީ މެންބަރު އިބްރާހީމް ޝަރީފް ވިދާޅުވެއްޖެއެވެ.

މަޖިލިހުގެ މިއަދުގެ ޖަލްސާގެ އެޖެންޑާގައި އޮތް ހަމައެކަނި މައްސަލައަކީ އީވާގެ އިތުބާރު ނެތް ކަމުގެ މައްސަލައާ މެދުގައި ގޮތެއް ނިންމުމެވެ.

ރައްޔިތުންގެ މަޖިލީހުގެ ގަވާއިދުގެ 205 ވަނަ މާއްދާގެ (ބ) ގައި ވާގޮތުން، ނާއިބު ރައީސްގެ އިތުބާރު ނެތްކަމުގެ މައްސަލަ ކުރިއަށްދާއިރު މަޖިލީހުގެ ރިޔާސަތުގައި އިންނަވާނީ މަޖިލީހުގެ ރައީސް ކަމަށެވެ. އަދި މަޖިލީހުގެ ރައީސް ގެ އިތުބާރު ނެތްކަމުގެ މައްސަލަ ކުރިއަށްދާއިރު ރިޔާސަތުގައި އިންނަވާނީ ނާއިބު ރައީސް އެވެ.

އެހެންކަމުން، މަޖިލީހުގެ ނާއިބު ރައީސް އީވާ އަބްދުاللهގެ އިތުބާރު ނެތްކަމުގެ މައްސަލަ އެޖެންޑާ ކޮށް، އަމީން އާންމު ވަނީ މަޖިލީހުގެ ރިޔާސަތު ބެލެހެއްޓެވުމަށް މަޖިލީހުގެ ރައީސް މުހައްމަދު ނަޝީދު ގެ އަރިހުގައި ސިޓީއަކުން އެދިލައްވާފައެވެ. އެހެންނަމަވެސް، އެމަނިކުފާނުގެ އިތުބާރު ނެތް ކަމުގެ މައްސަލައާއި މެދު ވަކި ގޮތެއް ނުނިންމެނީސް އީވާގެ މައްސަލަ ކުރިއަށްދާއިރު ރިޔާސަތު ބަލަހައްޓަވަން އުޒުރުވެރިވެވަޑައިގަންނަވާކަން އަންގަވާފައިވާ ކަމަށް އަމީން އާންމު ވިދާޅުވި އެވެ. އެހެންކަމުން އެ މައްސަލަ މިއަދު ކުރިއަށް ގެންދެވޭގޮތް ވަނީ ނުވެފައެވެ.

މިކަމާއި ގުޅިގެން އިބްރާހީމް ޝަރީފް ކުރެއްވި ޓުވީޓެއްގައި ވިދާޅުވީ، ނައިބުރައީސް އިތުބާރުނެތްކަމަށް ވޯޓްނަގަން ބާއްވާ މަޖިލީހުގެ ޖަލްސާ ޤަވާއިދުގައި ވާގޮތަށް ރިޔާސަތަށް އަރާނެ މީހަކު އައްޔަން ނުކުރުމަކީ ރައީސްގެ މަގާމުގެ މަސްއޫލިއްޔަތުން އެއްކިބާވުން، ނުވަތަ އިތުބާރުނެއްކަމުގެ ވޯޓުން އެއްކިބާވުމަށް އަމިއްލައަށް އިސްތިއުފާދެއްވުން ކަމަށެވެ.

ރައީސް ނަޝީދު ވަޑައިނުގެންނެވުމުން ރިޔާސަތު ބަލަހައްޓަވާނެ ބޭފުޅަކު ނެތި، ރިޔާސަތު ކަނޑައެޅުމާމެދު ގޮތެއް ނުނިންމެނީސް މިއަދުގެ ޖަލްސާ ކުރިއަށް ނުގެންދެވޭނެކަން އަންގައި ޖަލްސާ ވަނީ މިވަގުތަށް ނިންމާލާފައެވެ.