ފާހިޝް ޢަމަލުތައް ޕްރޮމޯޓް ކޮށް އެކަންކުރާ މީހުންނަށް ހަމަހަމަ ކަމާއެކު ފިޔަވަޅު އަޅަން އެމްއާރްއެމް އިން ގޮވާލައިފި

ފާޙިޝް ޢަމަލުތައް ޕްރޮމޯޓްކޮށް، އެފަދަ ނުބައި ޢަމަލުތައް ކުރަމުންދާ ފަރާތްތަކާއި މެދު ހަމަހަމަ ކަންމަތީ ފިޔަވަޅު އެޅުމަށް އެމް.އާރް.އެމް އިން ގޮވާލައިފި އެވެ.

ފާޅުކަން ބޮޑުގޮތެއްގައި ފާހިޝް ކަންކަން ޕްރޮމޯޓް ކުރަމުންދާތީ އެކަމާއި ގުޅިގެން އެމްއާރްއެމް އިން ނެރުނު ނޫސްބަޔާނެއްގައި ބުނީ، މިހާރަކަށް އައިސް، ފައިސާ ހޯދުމުގެ ނިޔަތުގައާއި އަދި އެހެނިހެން ގޮތް ގޮތުން، ދިވެހި މުޖުތަމަޢުގައި އެކިއެކި ފާޙިޝް ޢަމަލުތައް ޕްރޮމޯޓުކޮށް، އެއްވެސް ޖެހިލުމެއް ނެތި އެފަދަ ނުބައި ޢަމަލުތަކަށް ހިތްވަރުދޭ މެސެޖުތައް، ސޯޝަލް މީޑިއާގައި ދައުރުވަމުންދާ ކަމަށެވެ. އަދި އެއީ އެ ޕާޓީއިން އިންތިހާއަށް ކަންބޮޑުވާ ކަމެއް ކަމަށް ވެސް ބުނެފައިވެއެވެ.

އެފަދަ މައްސަލަތަކުގައި ބައިވެރިވާ ފަރާތްތަކާ މެދު، ކަމާބެހޭ މުއައްސަސާތަކުން އަޅަންޖެހޭ ޤާނޫނީ ފިޔަވަޅު ނޭޅި، މައްސަލަތައް ދިގުލައި ދިއުމަކީ ބަލައިގަނެވޭނެ ކަމެއް ނޫންކަން އެމްއާރްއެމް އިން ބުނެއެވެ.

"އެފަދަ ޢަމަލުތައް ފްރޮމޯޓްކޮށް، އެފަދަ ފާޙިޝް ޢަމަލުތަކުގައި ބައިވެރިވާ މީހުންގެ މައްސަލަ، އެއްވެސް އިސްތިސްނާއެއް ނެތި، ހަމަހަމަ އުޞޫލެއްގެ ދަށުން ކަމާއިބެހޭ މުއްސަސާތަކުން، ވީހާވެސް އަވަހަކަށް ބަލައި ޤާނޫނީ ފިޔަވަޅު އެޅުމަށް މި ޕާޓީއިން ގޮވާލަމެވެ."

މިފަދަ ޢަމަލުތަކަކީ ދިވެހި މުޖްތަމަޢުގެ އިޖްތިމާޢީ ފޭރާން ވީދި، މުޅި މުޖްތަމަޢު ނުރައްކަލެއްގެ ތެރެއަށް ހުށަހެޅިގެންދާނެ ބިރުވެރި ކަންކަން ކަމަށްވާއިރު އެއީ މާތް ވެގެންވާ އިސްލާމްދީނަށް އޮންނަ ލޯތްބާއި ޤަދަރު ކުޑަވެގެންދާނެ ކަންކަމެއް ކަމަށް އެ ޕާޓީން ފާހަގަކޮށްފައިވެ އެވެ. އެހެންކަމުން، އެފަދަ ފާޙިޝް ޢަމަލުތައް ހުއްޓުމަށްޓަކައި މުޅި މުޖްތަމަޢު ގުޅިގެން މަސައްކަތް ކުރަންޖެހޭ ކަމުގައި އެ ފާޓީން ދެކެއެވެ.

ވުމާއެކު މިހާރަށްވުރެ ޒިންމާދާރުވެ، އެފަދަ ފާޙިޝް ޢަމަލުތައް ހިންގުމަށް، އެއްވެސް ފަރާތަކަށް ޖާގަ ނުދިނުމަށާއި، އެފަދަ ކަންކަން ރާވައި ހިންގުމަށް ހިތްވަރުދީ މީސްމީޑިއާގައި މެސެޖުތައް ދައުރުކުރާ ފަރާތްތަކަށާއި، އަދި ފާޙިޝް ޢަމަލުތައް ހިންގުމުގައި ބައިވެރިވާ ފަރާތްތަކަށް ޤާނޫނުގައި ކަނޑައެޅިފައިވާ ފިޔަވަޅު އެޅުމަށް، އެ ޕާޓީން ކަމާބެހޭ މުއައްސަސާތަކަށް ވަނީ ގޮވާލާފައެވެ.