މެމްބަރެއްގެ ގޮތުގައި ހުރެ މަޖިލީހަށް ވަންނަން މަސައްކަތް ކުރީތީ ކޯޓަށް ދެމި، އެއީ މާޒީ: ރައީސް

ރައްޔިތުންގެ މަޖިލީހުގެ މެމްބަރެއްގެ ގޮތުގައި ހުންނަވާ މަޖިލީސް ކުރާ ގެއަށް ވަދެވަޑައިގަތުމަށް މަސައްކަތްޕުޅު ކުރެއްވުމަކީ ކުށަކަށް ހަދާ ދައުވާ އުފުލާފައިވާ ކަމަށާއި، އެއީ މިއަދު މާޒީއަށް ވެފައިވާ ކަންކަން ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ.

ރައީސުލްޖުމްހޫރިއްޔާ މިފަދައިން ވިދާޅުވެފައި ވަނީ އެމަނިކުފާނު ކ އަތޮޅަށް ކުރައްވާ ކެމްޕޭނު ދަތުރުފުޅުގައި ގުޅިއަށް ވަޑައިގެން އެ ރަށުގައި ބޭއްވި ޖަލްސާއެއްގައި ވާހަކަދައްކަވަމުން ނެވެ.

ރައީސް ޞާލިހު ވިދާޅުވީ ފާއިތުވި ސަރުކާރުގައި ބަސްބުނުމުގެ ހައްގު އޮތީ އެއްކޮށް ހަނިކޮށްފައި ކަމަށެވެ. އެގޮތުން ސިޔާސީ ދާއިރާގައި ހަރަކާތްތެރިވާ ފަރާތްތަކާއި މެމްބަރުންނާއި ނޫސްވެރިންގެ އިތުރުން އާންމު ރައްޔިތަކު ވެސް ސަރުކާރު ނުރުހޭފަދަ ބަހެއް ބުނެއްޖެނަމަ އެމީހަކާއި ދޭތެރޭ ފިޔަވަޅު އަޅަމުން ގޮސްފައިވާކަމަށް ރައީސް ވިދާޅުވި އެވެ.

ރައީސް ޞާލިހު ވިދާޅުވީ އެމަނިކުފާނަށް ވެސް އޭރުގެ ސަރުކާރުން މަޖިލީސް މެމްބަރެއްގެ ގޮތުގައި ހުންނަވާ މަޖިލީހުގައި އަދާކުރަންޖެހޭ މަސްއޫލިއްޔަތު އަދާކުރުމަށް މަސައްކަތްކުރުމުން ދައުވާތައް އުފުލާފައިވާ ކަމަށެވެ.

"އަޅުގަނޑުމެން ޚުދު މިތިބީ ރައްޔިތުންގެ މަޖިލީހުގެ މެމްބަރުންނަށް ތިބެ ރައްޔިތުންގެ މަޖިލީހަށް ވަންނަން އުޅުނޭ ކިޔާފައި ދައުވާކޮށްފައި. ރައްޔިތުންގެ މަޖިލީހުގައި ރައްޔިތުންގެ މަޖިލީަހުގެ މަސްއޫލިއްޔަތުތައް އަދާކުރުމަށް އަޅުގަނޑު މަޖިލީހަށް ވަންނަން އުޅުނީތީ ދަމާހަލާ ކޯޓަށް ގެންދިޔަ. 12 ވަރަކަށް މެމްބަރުންގެ މައްޗަށް އެ ދައުވާ ކުރި"

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު

ރައީސް ޞާލިހުގެ ވާހަކައިގައި އެ އިޝާރާތްކުރެއްވީ ރައީސް ޔާމިނުގެ ވެރިކަމުގައި މަޖިލީހުގެ 12 މެމްބަރުންގެ ގޮނޑި ގެއްލުނުކަމަށް ކަނޑައަޅާ އެ މެމްބަރުން މަޖިލީހުން ނެރުމަށް މަސައްކަތްކުރި ހާދިސާއަށް އިޝާރާތްކުރައްވަ އެވެ.

އެކަންކަން ފާހަގަކުރައްވާ ރައީސް ޞާލިހު ވިދާޅުވީ މިހާރު އެއީ މާޒީ ކަމަށެވެ. އަދި މިއަދު މެމްބަރުންނަށް އެފަދަ އެއްވެސް ދަތިކަމެއް ކުރިމަތި ކުރުވަމުން ނުދާކަމަށެވެ.

ރައީސް ޞާލިހު ވިދާޅުވީ 2018 ވަނަ އަހަރު ރައްޔިތުން އެމަނިކުފާނާއި ހަވާލުކުރި މަސްއޫލިއްޔަތަކީ އަމާން ރާއްޖެއެއް ހޯދައިދިނުމުގެ މަސްއޫލިއްޔަތު ކަމަށެވެ.

މި ސަރުކާރުން ވާނީ މުއައްސަސާތަކަށް ފޯރުވަމުން އައި ނުފޫޒު ތައް ނައްތާލާފައި ކަމަށާއި، ރައްޔިތުން ބޭނުންވާ އަމާންރާއްޖެ ހޯދާ، އެ މަސައްކަތުގައި ދެމިހުންނަވާނެކަމަށް ރައީސުލްޖުމްހޫރިއްޔާ ވަނީ ވިދާޅުވެފަ އެވެ.