މީ ތާރީހުގައި ވެސް ހެދުނު މެމްބަރުން އެންމެ ގިނަ ކޯލިޝަން: ރައީސް ޞާލިހު

އެމްޑީޕީއާއި އަދާލަތު ޕާޓީއާއި އެމްޑީއޭ އާއި އެކު ހަދާފައިވާ ކޯލިޝަނަކީ ރިޔާސީ އިންތިޚާބަކަށް ނިކުތުމަށް ރާއްޖޭގެ ސިޔާސީ ތާރީޚުގައި ވެސް ހެދުނު އެންމެ މެމްބަރުން ގިނަ ކޯލިޝަން ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ.

ރައީސް ޞާލިހު މިފަދައިން ވިދާޅުވީ އެމަނިކުފާނު ކ. އަތޮޅަށް ކުރައްވާ ކެމްޕޭނު ދަތުރުފުޅުގައި ގުރައިދޫ ރައްޔިތުންނާއި ބައްދަލުކުރައްވާ ބޭއްވި ޖަލްސާއެއްގައި ވާހަކަދައްކަވަމުން ނެވެ.

ރައީސް ޞާލިހު ވިދާޅުވީ 2018 ވަނަ އަހަރުގެ ރިޔާސީ އިންތިޚާބުގައި ގުރައިދޫ ދާއިރާގެ މެޖޯރިޓީ އެމަނިކުފާނަށް ލިބިވަޑައިގެންފައި ނުވާކަމަށެވެ.

އެހެން ނަމަވެސް ގުރައިދޫ ދާއިރާގެ ރައްޔިތުންގެ ވިސްނުމަށް ފާއިތުވެ 4 އަހަރުގެ ތެރޭގައި ބޮޑެތި ބަދަލުތަކެއް އައިސްފައިވާ ކަމަށާއި، ކުރިއަށް އޮތް ރިޔާސީ އިންތިޚާބު އެމަނިކުފާނު ކާމިޔާބު ކުރައްވާނީ ގުރައިދޫ ދާއިރާގެ ރައްޔިތުންގެ ބޮޑު ހިއްސާއަކާއި އެކުގައިކަމަށް މިހާރު ގަބޫލުފުޅު ކުރައްވާ ކަމަށް ރައީސް ޞާލިހު ވިދާޅުވި އެވެ.

ރައީސް ޞާލިހު ވިދާޅުވީ ނިމިގެންދިޔަ ގުރައިދޫ ދާއިރާގެ ރައްޔިތުންގެ މަޖިލީހުގެ ބައި-އިލެކްޝަނުގައި އެމްޑީޕީން ވާދަކުރީ އަދާލަތާއި އެމްޑީޕީއޭ އާއި އެކުގައި ކަމަށެވެ. އަދި އެ އިންތިޚާބު ބޮޑުތަނުން އެމްޑީޕީން ކާމިޔާބު ވެސް ކޮށްފައިވާ ކަމަށެވެ.

ރިޔާސީ އިންތިޚާބަށް އަނެއްކާވެސް އެމްޑީޕީއާއި އަދާލަތާއި އެމްޑީއޭ ނިކުންނައިރު މިއީ ރިޔާސީ އިންތިޚާބަކަށް މިހާތަނަށް ނިކުންނަ އެންމެ މެމްބަރުން ގިނަ ކޯލިޝަން ކަމަށާއި، މި ކޯލިޝަނާއެކު ރިޔާސީ އިންތިޚާބު އެއްބުރުން ކާމިޔާބު ކުރެވޭނެކަމުގެ ވަރަށް ބޮޑު ޔަގީންކަމެއް އޮތްކަމަށް ރައީސް ޞާލިހު ވިދާޅުވި އެވެ.

"ކުރިއަށް މިއޮތް ރިޔާސީ އިންތިޚާބުގައި އަނެއްކާވެސް އަޅުގަނޑުމެން މި ނިކުންނަނީ އޭރު (ގުރައިދޫ ބައި-އިލެކްޝަން) ގައި އެއްބަސްވި ގޮތަށް. މީ ރާއްޖޭގެ ތާރީހުގައި އިންތިޚާބަކަށް ކުރިމަތިލާ އެންމެ ގިނަ މެމްބަރުން ތިބި ކޯލިޝަން. މިހާތަނަށް މިހާ ވަރަށް މެމްބަރުން ގިނަ ކޯލިޝަނެއް ރާއްޖޭގެ ތާރީހުގައި ހެދިފައެއް ނެތް"

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު

ރައީސް ޞާލިހު ވިދާޅުވީ އަމާޒަކީ ވޯޓުލާން ފަށާއިރު އެއްލައްކަ މެމްބަރުންގެ ވޯޓުން ފެށުން ކަމަށެވެ. އަދި ކުޑަ ކުޑަ މަސައްކަތަކުން ރިޔާސީ އިންތިޚާބު ކާމިޔާބު ކުރެވޭނެ ކަމުގެ ޔަގީންކަން އޮތްކަމަށް ވެސް ރައީސް ޞާލިހު ވިދާޅުވި އެވެ.