ރައީސް ޔާމީންގެ ފޮޓޯ ބޭނުންކޮށްގެން ކެންޕެއިން ކުރަން ގާނޫނު މަނައެއް ނުކުރޭ: އީސީ
ކުރީގެ ރައީސް، އަދި ޕީޕީއެމްގެ ލީޑަރ، ރައީސް އަބްދުالله ޔާމީން އަބްދުލްގައްޔޫމްގެ ފޮޓޯ ބޭނުންކޮށްގެން ކެންޕެއިން ކުރުމަށް ގާނޫނު ހުރަސް ނާޅާ ކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަން ކޮމިޝަނުން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުޢިއްޒު ގެ ކެންޕެއިން ޕޯސްޓަރ ތަކުގައި ރައީސް ޔާމީން ގެ ފޮޓޯ ބޭނުންކުރައްވާތީ، ޖަލު ހުކުމް ތަންފީޒް ކުރައްވަމުން ގެންދަވާ މީހެއްގެ ފޮޓޯ އެފަދައިން ކެންޕެއިންގައި ބޭނުންކުރެވިދާނެތޯ ސުވާލު ކޮށްފައެވެ.
އެ ސުވާލަށް ޖަވާބު ދެއްވަމުން އިލެކްޝަންސް ކޮމިޝަން (އީސީ)ގެ ނާއިބު ރައީސް އިސްމާއީލް ހަބީބު ވިދާޅުވީ، ޕީޕީއެމް/ޕީއެންސީގެ ފަރާތުން، އެ ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުޢިއްޒުގެ ކެންޕެއިން ޕޯސްޓަރ ތަކެއް ފާސްކޮށްދެއްވުމަށް އެދި އެ ކޮމިޝަނަށް ފޮނުއްވާފައިވާ ކަމަށެވެ. ހަބީބު ވިދާޅުވީ އެގޮތުން ފޮނުވާ ތަކެތީގެ ތެރޭއިން އީސީން ބަލަނީ ކެންޑިޑޭޓާއި ރަނިންމޭޓާއި ގުޅޭ މައުލޫމާތު ތައް ކަމަށާާ، ކެންޕެއިން ކުރަމުންދާ ގޮތް އެއީ އެ ބައެއްގެ ކަމެއް ކަމަށެވެ.
އިލެކްޝަންސް ކޮމިޝަނުން އާއްމު ގޮތެއްގައި މި ބަލަނީ ކެންޑިޑޭޓާއި ރަނިންމޭޓާއި ދެ ބޭފުޅުންގެ މައުލޫމާތު މިބަލަނީ. ތިންވަނަ ފަރާތެއްގެ މައުލޫމާތު... އަނެންހެން އެމްޑީޕީން ކޯލިޝަން ހަދައިގެން އިތުރު ދެ ޕާޓީ އަކާއި އެކު މިދަނީ. ޕީއެންސީން ޕީޕީއެމާއި އެކުގައި މި ކޯލިޝަން ހަދަނީ. އެހެންވީމާ އަޅުގަނޑުމެން ގާނޫނުގައި ދަންނަ ކަމެއް ނޫން އަނެންހެން ކޯލިޝަން ހަދައިގެން އެކަންކަން ކުރުމަކީ. އެހެންނަމަވެސް އެ ބޭފުޅުންގެ އަމިއްލަ ބޭނުމަށް އެކަންކަން ކުރެވިދާނެ. އެއީކީ އަނެންހެން މައްސަލަ އެއް ނޫން.
އީސީގެ ނާއިބު ރައީސް އިސްމާއީލް ހަބީބު
ހަބީބު ވިދާޅުވީ ރާއްޖޭގެ ގަނޫނު އަސާސީގައި ވާގޮތުން ކޮންމެ މީހަކަށްވެސް ކެންޕެއިން ކުރުމުގެ ފުރުސަތު އޮންނަ ކަމަށެވެ. އަދި ކެންޕެއިންގެ ތެރެއިން އެކި މީހުން ވިއްކާނީ އެކި ސިޔާސަތު ކަން ފާހަގަކުރައްވައި ހަބީބު ވިދާޅުވީ، އެމީހެއްގެ ނަޒަރުގައި އެންމެ ރަނގަޅަށް ވިއްކިދާނެ އެއްޗެއް ވިއްކައިގެން ވެރިކަމަށް ވަޑައިގެންނެވުމަކީ އެ މީހުންގެ ހައްގެއް ކަމަށް އީސީން ދެކޭ ކަަމަށެވެ.
އެހެންވީމާ ރައީސް ޔާމީންގެ ފޮޓޯފުޅު ބޭނުން ކުރައްވައިގެން ޕީއެންސީގެ ރިޔާސީ ކެންޑިޑޭޓް ޑރ. މުޢިއްޒު ކެންޕެއިން ކުރެއްވުމަކުން ގާނޫނީ ގޮތުން އެއްވެސް ހުރަހެއް ނެތް. އިލެކްޝަންސް ކޮމިޝަނުން އެގޮތަށް ފާސްކޮށްދީފައެއް ނޯންނާނެ. އެކަމު ގާނޫނީ ގޮތުން އެކަން ކުރުމުގެ އެއްވެސް ހުރަހެއް ނެތް ކަމަށް މި ބަލަނީ
އީސީގެ ނާއިބު ރައީސް އިސްމާއީލް ހަބީބު
ޑރ. މުއިއްޒު ރިޔާސީ ރޭހަށް ނުކުންނެވީ، ޕީޕީއެމް/ޕީއެންސީ ކޯލިޝަންގެ ރިޔާސީ ކެންޑިޑޭޓެއްގެ ގޮތުގައި އެންމެ ފުރަތަަމަ ކަނޑައެޅުނު، ކުރީގެ ރައީސް ޔާމީނަށް އިންތިހާބުގައި ވާދަ ނުކުރެވޭނެކަން އީސީން ކަނޑައަޅައި، ސްޕްރީމް ކޯޓުންވެސް އެ ނިންމުމަށް ތާއީދު ކުރުމުންނެވެ. އެހެންކަމުން، މުއިއްޒުގެ ކެންޕެއިން ސްލޯގަން އަށްވެސް ބޭނުން ކުރަމުން އަންނަނީ ޔާމީންއަށް ބޭނުން ކުރުމަށް ކަނޑައެޅުނު ސްލޯގަން އެވެ. އަދި މުއިއްޒު ވިދާޅުވަމުންދަނީ ވެސް އޭނާ ކުރިއަރުއްވާނީ ރައީސް ޔާމީން ގެ ތަރައްގީގެ ފިކުރު ކަމަށެވެ. އެގޮތުގެ މަތީން މުއިއްޒުގެ ކެންޕެއިން ޕޯސްޓަރ ތަކުގައި ޔާމީންގެ ފޮޓޯވެސް ބޭނުން ކޮށްފައި ހުންނަކަށް ފާހަގަކޮށްލަން ޖެހެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
