މަކުނުދޫ އެއާޕޯޓު މަޝްރޫއު، ރައްޔިތުން އެދޭގޮތަށް ބަދަލުކުރާނަން: ޑރ މުއިއްޒު
ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި މަކުނޫދުގައި އެއާޕޯޓު އެޅުމުގެ މަޝްރޫއު، ރައްޔިތުން ބޭނުންވާގޮތަށް ބަދަލުކޮށްދެއްވާނެ ކަމަށް އިދިކޮޅު ކޯލިޝަން ތަމްސީލުކުރައްވާ ޕީއެންސީގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެއްޖެ އެވެ.
ޑރ މުއިއްޒު މިފަދައިން ވިދާޅުވެފައި ވަނީ އެމަނިކުފާނު ތިލަދުންމައްޗަށް ކުރައްވާ ކެމްޕޭނު ދަތުރުފުޅުގައި ހދ މަކުނުދޫއަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވާ ވާހަކަދައްކަވަމުން ނެވެ.
ޑރ މުއިއްޒު ވިދާޅުވީ ގުދުރަތީގޮތުން މަކުނުދޫ ހެދިފައިވާ ގޮތަށް ބަލާއިރު، މަކުނުދޫއަކީ ވަކި ގޮތަކަށް ތަރައްގީކުރަން ޖެހޭ ރަށެއްކަމަށް ގަބޫލުކުރައްވާ ކަމަށެވެ.
އެގޮތުން މަކުނޫދެ ރައްޔިތުން އަސާސީ ޚިދުމަތްތައް ހޯދުމަށް ދުރު ރަށްރަށަށް ދަތުރުކުރަން ޖެހުމަކީ އިންސާފުވެރި ގޮތެއް ނޫން ކަމަށާއި، ރަށުގައި މަޝްރޫއުތައް ހިންގާއިރު، ރައްޔިތުންނަށް އެންމެ ބޭނުންޖެހިފައިވާ ކަންކަން ބަލައިގެން ކުރިއަށް ދިއުން މުހިންމުކަން ޑރ މުއިއްޒު ފާހަގަކުރެއްވި އެވެ.
"ސަރުކާރުން ރަށްރަށުގައި އެބަ ތަރައްގީގެ މަޝްރޫއުތައް ފަށާ، އެހެން ނަމަވެސް ފަށަނީ ރައްޔިތުން ބޭނުންވާ ގޮތް ބަލައިގެނެއް ނޫން. ހަމަ އެބޭފުޅުންގެ އަމިއްލަ އެޖެންޑާއެއް އޮވެގެން، އެކި ކަހަލަ ގޮތްގޮތަށް ރަށްރަށުގައި ބިން ވެސް ހިއްކާ އެއާޕޯޓު ވެސް އަޅާ، ބަނދަރު ވެސް ހަދާ، ރަށުގެ ރައްޔިތުން ތިބެނީ އެކަމާއި ވަރަށް ހިތްހަމަ ނުޖެހިފަ، އެހެންވީމަ ރައްޔިތުންނަށް އެކަންކަމުން ވާ ފައިދާއެއް ނޯވޭ، ރައްޔިތުންނާއި ސަރުކާރާއި ނެތް އެއްވެސް ކަހަލަ ގުޅުމެއް"
ޑރ މުހައްމަދު މުއިއްޒު
އެއާއެކު ޑރ މުއިއްޒު ވިދާޅުވީ މި ސަރުކާރުން ހިންގަން މަސައްކަތްކުރާ މަކުނުދޫ އެއާޕޯޓު މަޝްރޫއާއި ގުޅިގެން ރައްޔިތުންގެ ވަރަށް ބޮޑެތި ކަންބޮޑުވުންތަކެއް ހިއްސާކުރައްވާފައިވާ ކަމަށެވެ. އަދި ރައްޔިތުންގެ ޚިޔާލު ނުހޯއްދަވާ ރައްޔިތުންނާއި ރަށަށް ގެއްލުންލިބޭގޮތަށް އެކަން ކުރަން ސަރުކާރުން މަސައްކަތް ކުރަމުންދާތީ ހައިރާންވެވަޑައިގަންނަވާ ކަމަށެވެ.
"އެއާޕޯޓުގެ މަސައްކަތް ތިޔަ ވިދާޅުވީ އޮތީ ވަރަށް ނުރައްކާތެރި ހާލަތެއްގައޭ. ތިމާވެށީގެ ގޮތުން ބަލައިފިއްޔާ އިޔާދަނުކުރެވޭ ވަރުގެ ބޮޑު ގެއްލުމެއް ލިބިގެންދާނެކަމަށް، މި ރަށުގެ އަހުލުވެރިން ތި ވިދާޅުވަނީ. އެހެންވީމަ ތިބޭފުޅުންނަށް ވުރެ ބޮޑަށް މި ރަށަށް، މި ރަށުގެ ފަޅަށް ވާނެ ގޮތް އެނގޭނެ އެހެން ބަޔަކު ނޫލޭނެ. އެހެންވީމަ އަޅުގަނޑު ގަބޫލެއް ނުކުރަން އެކަން އެދަނީ ރަނގަޅަކަށް ކަމަށެއް:
ޑރ މުހައްމަދު މުއިއްޒު
އެއާއެކު ޑރ މުއިއްޒު ވިދާޅުވީ ޕީޕީއެމް-ޕީއެންސީ ވެރިކަމެއްގައި މަކުނުދޫ ރައްޔިތުން އެދޭގޮތަށް މަކުނުދޫގައި އެއާޕޯޓު އެޅުމުގެ މަޝްރޫއު ބަދަލުކޮށްދެއްވާނެ ކަމަށެވެ.
ޑރމުއިއްޒުގެ ވެރިކަމެއްގައި ތަރައްގީގެ މަޝްރޫއު ހިންގަވާނީ ރައްޔިތުންގެ ޚިޔާލު ހޯއްދަވައިގެން، ރައްޔިތުން އެދޭގޮތަށް ކަމުގެ ޔަގީންކަން ވެސް ޑރ މުއިއްޒު ވަނީ ދެއްވާފަ އެވެ.
"އަޅުގަނޑު ގަބޫލުކުރަނީ އަޅުގަނޑުމެން ގާއިމްކުރާ ސަރުކާރު ވެގެންދާނީ ދިވެހިރައްޔިތުންގެ ވިންދާއި އިހުސާސާއި ގުޅި ލާމެހިފައި އޮތް ސަރުކާރަކަށޭ"
ޑރ މުހައްމަދު މުއިއްޒު
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
