ހުޅުމާލޭ ދެވަނަ ފިޔަވައްސަކީ ރައީސް ޔާމިނުގެ ތަރައްގީގެ ލެގަސީގެ ފުރިހަމަ މިސާލެއް: ޑރ މުއިއްޒު

ރިޔާސީ އިންތިހާބުގެ ފުރަތަމަ ބުރުގެ ނަތީޖާއިން ފެނިގެންދިޔައީ ހުޅުމާލެގެ ރައްޔިތުންނަށްޓަަކައި ރައީސް ޔާމިން ކުރެއްވެވި ގިނަ ގުނަ މަސައްކަތްތަކާމެދު ހުޅުމާލޭގެ ރައްޔިތުންވެސް ޝުކުރުވެރިވާކަން ކަމަށާއި ހުޅުމާލެއާއި ހާއްސަކޮށް ހުޅުމާލޭގެ ދެވަނަ ފިޔަވައްސަކީ ރައީސް ޔާމިނުގެ ތަރައްގީގެ ލެގަސީގެ ފުރިހަމަ މިސާލެއްކަމުގައި ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ.

މި މަހުގެ 30 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގެ ދެވަނަބުރުގެ ކެމްޕެއިންގައި ރޭ ހުޅުމާލޭގައި ބޭއްވި ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ، ރާއްޖޭގެ ހުރިހާ ރައްޔިތުން ފަދައިން ހުޅުމާލޭގެ ރައްޔިތުންގެ ފަރާތުންވެސް ފެނިގެން މިދަނީ ގައުމު އިސްކުރައްވާ މަންޒާރުކަމަށެވެ.

މީގެ އިތުރުން ޕީޕީއެމް ޕީއެންސީގެ މެނިފެސްޓޯގައި ގެދޮރުވެރިކަމާއި ބެހޭ ބަޔަކީ އެންމެ މުހިއްމު އެއްބައިކަން ފާހަގަކުރައްވާ މުއިއްޒު ވިދާޅުވީ، އެ މެނިފެސްޓޯގައި ހާއްސަ އިސްކަމެއް ދޭ ކަމެއްގެ ގޮތުގައި ނުކުޅެދުންތެރިކަން ހުންނަ ފަރާތްތަކަށް ވަކި ހައްސަ ކަންތައްތަކެއް އޮތުން ހިމަނައިފައި ވާނެކަމަށެވެ.

އެގޮތުން މުއިއްޒު ފާހަގަކުރެއްވި ގޮތުގައި، ޕީޕީއެމް ޕީއެންސީގެ ސަރުކާރެއްގައި ނުކުޅެދުންތެރިކަން ހުންނަ ފަރާތްތަކަށް ވަކި އަދަދަކަށް ހާއްސަ ފްލެޓް ތަކެއް ގާއިމްކުރެވިގެން ދާނެކަމުގައި އެ ޕާޓީގެ މެނިފެސްޓޯގައި ހިމެނިފައިވާނެކަމަށެވެ.

މީގެ އިތުރުން މުއިއްޒު ވިދާޅުވީ ނުކުޅެދުންތެރިކަން ހުންނަ ފަރާތްތަކަށް މީހާރު ދެވިފައިވާ ފްލެޓްތަކަކީ އެފަދަ ފަރާތްތަކަށް ހާއްްސަކުރެވިގެން ފަރުމާ ކުރެވިފައިވާ ފްލެޓްތަަކެއް ނޫންކަމަށެވެ.

އެހެންނަމަވެސް އަޅުގަޑުމެންގެ މެނިފެސްޓޯގައި ދެން އަޅާ ފްލެޓްތަކުގައި ނުކުޅެދުންތެރިކަން ހުންނަ ފަރާތްތަކަށް ހާއްސަ ކުރެވޭ ފްލެޓް ތަކަކީ، އިންޓަރނޭޝަނަލް މިންގަނޑުތަކަށް ފެތޭގޮތަށް ހާއްސަ އެހީއަށް ބޭނުންވާ ފަރާތްތަކަށް ބޭނުންވާ ގޮތަށް ޑިޒައިން ކުރެވިފައިވާ ފްލެޓްތަަކަކަށް ވާނެ

ޑރ މުހައްމަދު މުއިއްޒު

މީގެ އިތުރުން ރޭގެ ޖަލްސާގައި މުއިއްޒު ވަނީ ހުޅުމާލެއަކީ ގާނުނުގައި ބަޔާންކުރާ ގޮތަށް މާލޭ ސިޓީކައުންސިލްގެ ބެލުމުގެ ދަށުން ބަލަހައްޓަމުންދާ ތަނަކަށް ހަދައިދޭނެ ކަމަށެވެ.

މީގެ އިތުރުން ރޭގެ ޖަލްސާގައި މުއިއްޒު ވަނީ އިންތިހާބުގެ ދެވަނަ ބުރުގައި ހުރިހާ ޕާޓީތަކުންވެސް ޕީޕީއެމް ޕީއެންސީއާ އެކުގައި މަސައްކަތް ކުރުމަށް ގުޅިވަޑައިގަތުމަށް އިލްތިމާސްކޮށްފައެވެ.

ރިޔާސީ އިންތިހާބުގެ ފުރަތަމަ ބުރުގައި ވާދަކޮށް ނާކާމިޔާބީ ލިބުނު އެމްއެންޕީން ވަނީ އިންތިހާބުގެ ދެވަނަ ބުރުގައި ޕީޕީއެމް ޕީއެންސީއާއި އެކުގައި މަސައްކަތް ކުރުމަށް އެ ޕާޓީއާއި ގުޅި އެކަމުގެ އެއްބަސްވުމުގައި އިއްޔެ ސޮއިކޮށްފައެވެ.