މޮރޮކޯ ބިންހެލުން: ސަލާމަތްވި މީހުން އާއިލާ މެމްބަރުން ހޯދުމަށް ކަށިންހިތްވަރު ނެރެ ކުނިތައް ކޮންނަނީ

މޮރޮކޯއަށް މިދިޔަ ހުކުރުދުވަހުގެރޭ އައި 6.8 މެގްނެޓިޔުޓްގެ ބިންހެލުމުގައި ސަލާމަތްވި މީހުން އެމީހުންގެ ޢާއިލާ މެމްބަރުންގެ ތެރެއިން ނުފެނިވާ މީހުން ހޯދުމަށް ވެއްޓިފައިވާ ޢިމާރާތްތަކުގެ ކުނިތައް ކޮންނަމުންއެބަދެއެވެ.

ހާދިސާއަށް ފަސްދުވަސް ވެފައިވާއިރު އަދިވެސް ޢާއިލާގެ މެމްބަރުން ދިރިތިއްބައި ފެނިދާނެ ކަމަށް އެމީހުން އުންމީދު ކުރެއެވެ. މޮރޮކޯގެ މަރްކަޝް އަށް ނިސްބަތްވާ ޢަބްދުލް އާބިދްގެ 9 އަހަރުގެ އަންހެން ދަރިފުޅު އަދިވެސް ވެއްޓިފައިވާ ޢިމާރާތްތަކުގެ ދަށުން ނެގިފައެއް ނުވެއެވެ.

އާބިދްގެ ޢާއިލާއިން ބުނެފައިވަނީ އޭނާ އަދިވެސް އުންމީދު ކުރަނީ ނުވަ އަހަރުގެ ޝައިމާ ދިރި އޮއްވައި ފެނިދާނެ ކަމަށް ކަމަށާއި ކޮންކްރީޓް ތައް ކޮނުމުގައި އޭނާ ދައްކަމުންދަނީ އާދަޔާ ޚިލާފް ބާރެއް ކަމަށެވެ. އާބިދް އޭނާގެ އަންހެންދަރިފުޅު ހޯދުމަށް މަސައްކަތް ކުރަމުން ދާއިރު ސަރޗް އެންޑް ރެސްކިޔު ޓީމަކުން އިއްޔެ ވަނީ އޭނާގެ އަނބިމީހާގެ މަރުވެފައިވާ ހަށިގަނޑު ގައު ފުނިތަކުގެ ދަށުން ނަގައިފައެވެ.

ބިންހެލުމުގެ އަސަރު ކުރި ސަރަހައްދުގައި ޢާއިލާގެ އެކަކު ނުބަތަ ދެމީހަކު ނުގެއްލޭ ހަމައެކަކުވެސް ނެތެވެ. 22 އަހަރުގެ އަބްދުލް ޢަލީ ބުނެފައިވަނީ އޭނާގެ ގެ އެއްކޮށް ވަނީ ހަލާކުވެފައި ކަމަށާއި އޭނާގެ ކާފަ އާއި ބޮޑުދައިތަ ވެސް މަރުވެފައި ވާ ކަމަށެވެ. މުޞީބާތާއި ކުރިމަތިވެފައި ވީނަމަވެސް 22 އަހަރުގެ މިޒުވާނާ ދަނީ އޭނާ ގެންގުޅޭ  ހިމާރުގެ މަތީގައި އެމެޖެންސީ ހާލަތުގައި ބޭނުންވާ ސާމާނު އުފުލައި ދެމުންނެވެ.

ބިންހެލުމުގެ ސަބަބުން މިހާތަނަށް 2862 މީހަކު މަރުވެފައިވާ ކަމަށް އައިއޭސީ އިން ވަނީ ބުނެފައެވެ. އަދި 2562 މީހަކު ޒަޚަމް ވެފައިވާއިރު 3 ލައްކަ މީހުންނަށް ބިންހެލުމުގެ އަސަރު ކޮށްފައިވެއެވެ. އޭގެ ތެރެއިން އެއްލައްކަ އަކީ ކުޑަކުދިންނެވެ.