ސިފައިންނަށް ފިނދަނަތަކެކޭ ބުނުމުން، އެއަށް ޖަވާބުދޭން ސިފައިންނެއް އަޅުގަނޑުމެން ނުނެރެން: އާޒިމާ

ކުރީގެ ރައީސް ޑރ. މުހައްމަދު ވަހީދުގެ ސަރުކާރުގައި، އަދުގެ ޑިފެންސް މިނިސްޓަރު މާރިޔާ އަހުމަދު ދީދީ، ދިވެހި ސިފައިންނަކީ ފިނދަނަތަކެއް ކަމަށް ވިދާޅުވެ، ސިފައިންނަށް ކުޑައިމީސް ކުރެއްވުމުން، އެކަން ދިފާއު ކުރައްވަން ވާހަކަ ދައްކަވަން ސިފައިން ނުނެރުއްވާ ކަމަށް ކުރީގެ ބަންޑާރަ ނާއިބު ޢާއިޝަތު ޢާޒިމާ ޝަކޫރު ވިދާޅުވެއްޖެއެވެ.

ޢާޒިމާ ކުރެއްވި ޓްވީޓެއްގައި ވިދާޅުވީ، މީގެ ކުރިން ދިވެހި ސިފައިންނަށް ފާޑުވިދާޅުވެ ވާހަކަ ދައްކަވަމުން އެއީ، ދިވެހި ސިފައިންނަކީ ބަލި ފިނދަނަ ތަކެކޭ މާރިޔާ ވިދާޅުވުމުން، އެކަން ދިފާއު ކުރަން، ޔުނީފޯމު އެޅި ސިފައިން ނުނެރެއްވާ ކަމަށެވެ. އަދި އެއީ ސިޔާސީ ބޭފުޅުން ދެއްކި ވާހަކައަކަށް ވާތީ، އެ ވާހަކަ ތަކަށް ރައްދުދީ ސިފައިންގެ ދިފާއުގައި ނުކުތީ އެބޭފުޅުން ކަމަށްވެސް އާޒިމާ ވިދާޅުވި އެވެ.

އެފަދައިން ކަން ނުކުރެއްވީ ސިފައިންގެ މުއައްސަސާ ސިޔާސީ ނުކުރަން ކަމަށް އާޒިމާ ވިދާޅުވި އެވެ.

"ސިފައިންގެ އަކީ ގައުމީ ސަލާމަތުގެ އެންމެ ފުރަތަމަ މުއައްސަސާ. ސިފައިން ސިޔާސީ ނުކުރައްވާ." ޢާޒިމާ ވިދާޅުވި އެވެ.

2012 ވަނަ އަހަރު އެމްޑީޕީގެ ވެރިކަން ވެއްޓުމުން، އެމްޑީޕީއިން މުޅި ރާއްޖޭގެ އެކިކަންކޮޅުތަކުގައި ބާއްވަމުން ދިޔަ ޖަލްސާތަކުގައި މާރިޔާ ވަނީ ދިވެހި ސިފައިންނަކީ ފިނޑި ފިނދަނަ ތަކެކޭ ވިދާޅުވެފައެވެ.

އަދި 3 ނޮވެމްބަރު ގައި ދިވެހި ސިފައިން ބިރުން ފިލީ ކަމަށާއި ރާއްޖެ ސަލާމަތްކުރީ އިންޑިއާ ސިފައިން ކަމަށް ބުނެ ދިވެހި ސިފައިންގެ ގަދަރާއި ކަރާމަތަށް އުނިކަން އަންނަ ގޮތަށް ވާހަކަ ދައްކާފައިވެއެވެ.

އޭރު އެވާހަކަތަކަށް ރައްދު ދެއްވީ އެމްޑީޕީ އާއި އިދިކޮޅު ސިޔާސީ ލީޑަރުންނެވެ.

އެހެންނަމަވެސް، މިއަދު ރާއްޖޭގައި އިންޑިޔާ ސިފައިން ތިބި މައްސަލާގައި، އިންޑިއާ ސިފައިން ރާއްޖޭގައި ބެއިތިއްބުމަށް ވެފައިވާ އަޑިނޭނގޭ އެއްބަސްވުން ތަކުން ގައުމީ ސަލާމަތަށް ނުރައްކާވާ ކަމަށް އިދިކޮޅުުން ވިދާޅުވުމުން، އެކަމަށް ރައްދު ދެއްވަން ގައުމީ ޓީވީ، ޓީވީއެމްގައި ވާހަކަދެއްކެވީ ޗީފް އޮފް ޑިފެންސް ފޯސް، މޭޖަރ ޖެނެރަލް އަބްދުالله ޝަމާލްއެވެ. އެކަމާއި ގުޅިގެން ގިނަ ބައެއްގެ ފާޑުކިޔުންތައް އަންނަނީ ސިފައިންނަށް އަމާޒުވަމުންނެވެ.