ސަޕޯޓަރުން ތަޅާފޮޅުމަކަށް، އަނިޔާތަކާއެކު 12 މީހުން އެޑްމިޓްކޮށް ފަރުވާ ދެނީ!
ރ އަތޮޅު ފުޓްސެލް ފިއެސްޓާ ފައިނަލް މެޗު ހޫނުވެ އެ މެޗުގައި ވާދަކުރި ދުވާފަރާއި އިނގުރައިދޫގެ ސަޕޯޓަރުންގެ މެދުގައި ހަމަނުހެޖުން ބޮޑުވެ ތަޅައިގެންފިއެވެ.
އެ ހަމަނުޖެހުމާއި ގުޅިގެން ކުޑަކުދިންނާއި އަންހެނުން ހިމެނޭހެން އަނިޔާލިބުނު 12 މީހުންނަށް އުނގޫފާރު ހޮސްޕިޓަލުގައި ވަނީ ފަރުވާދޭން ފަށާފައެވެ.
ސަޕޯޓަރުންގެ މެދުގައި ހަމަނުޖެހުން ބޮޑުވާން މެދުވެރިވި ސަބަބާއި ގުޅޭގޮތުން މައުލޫމާތު ދެއްވަމުން އިނގުރައިދޫ ކައުންސިލްގެ ނައިބުރައީސް ފާތުމަތު އިޝްމާ ވިދާޅުވީ މަޝްރަހު ގޯސްވީ ދުވާފަރު ސަޕޯޓަރަކު އެއްލި ފުޅިއަކުން އިނގުރައިދޫ ސަޕޯޓަރެއްގެ(އަންހެނެއް) ބޮލުގައި ޖެހި އޭނާގެ ބޯ ފަޅައިގެން ދިޔަ ހިސާބުންކަމަށެވެ.
"ހޫނުވީ ދުވާފަރަށް ލަނޑެއް ޖެހުމުން، އެއައި ފޯރީގައި ވެލި އަޅާފައި އޮތް ފުޅިއެއް އެއްލީ. އެ ފުޅި ޖެހުނީ އިނގުރައިދޫ ޓީމުގެ އަންހެން ސަޕޯޓަރެއްގެ ބޮލުގައި، ޖެހި ބޯ ފަޅައިގެން ދިޔައީ"
އިނގުރައިދޫ ކައުންސިލްގެ ނައިބުރައީސް ފާތުމަތު އިޝްމާ
އެފަހުން، ސަޕޯޓަރުން ގަލާއި ލަކުޑި ބުރިއާއި، ދަނގަޑާއި އުކަމުން ދިޔަކަމާއި، އެގޮތަށް އަމަލުކުރަމުން ދިޔައީ އެތަނުގައި ތިބި ކުޑަކުދިންނަށްވެސް ބެލުމެއް ނެތިކަމަށް އޭނާ ވިދާޅުވިއެވެ.
އިޝްމާ ވިދާޅުވީ މަޝްރަހު ހޫނުވެދާނެތީ، އެ ސަރަހައްދުގެ ސެކިއުރީ ކަންކަން ބެލެހެއްޓުމަށް ދުރާލާ ފުލުހުންނަށް އަންގާފައިވާކަމަށެވެ. އެހެން ނަމަވެސް އެ މެޗުގެ ސެކިއުރީ ބެލެހެއްޓުމަށް އެކަށީގެންވާ ވަރަށް އެ އިންތިޒާމުތައް ހަމަޖައްސާފައި ނުވާކަމަށް އޭނާ ވިދާޅުވިއެވެ.
އެ ހާދިސާގައި ބޮޑެތި ގެއްލުންތަކެއް ލިބިފައިވަނީ އިނގުރައިދޫ ސަޕޯޓަރުންނަށް ކަމަށާއި، އެގޮތުން ކުޑަ ކުދިންނާއި އަންހެނުން ހިމެނޭހެން 12 މީހުން މިވަގުތު ފަރުވާދެމުން ދާކަމަށް އޭނާ ވަނީ ވިދާޅުވެފައެވެ.
ސަޕޯޓަރުންގެ ފަރާތުން ލިބުނު ގެއްލުމަށް ފަރުވާ ހޯދުމަށް 3 ކުޑަ ކުދިން ވަނީ އެޑްމިޓްކޮށްފަ. އޭގެ އިތުރުން މާބަނޑު އަންހެނަކަށްވެސް ވަނީ ފަރުވާ ދޭން ފަށާފަ
އިނގުރައިދޫ ކައުންސިލްގެ ނައިބުރައީސް ފާތުމަތު އިޝްމާ
އިޝްމާ ވިދާޅުވީ މިއަދު ފެނިގެން ދިޔައީ ވަރަށް ނާތަހުޒީބު އަމަލުތަކެއްކަމަށެވެ. އަތޮޅު ކައުންސިލުން އެކަށިގެންވާ ގޮތަށް ސެކިއުރިޓީގެ ކަންކަން އިންތިޒާމު ކޮށްފައި ނުވާއިރު، އިނގުރައިދޫގެ ރައްޔިތުންނަށް ލިބިގެން ދިޔައީ ވަރަށް ބޮޑު ގެއްލުމެއްކަމަށް އޭނާ ވިދާޅުވިއެވެ.
މިއަދު ފެނިގެން ދިޔަ މަންޒަރުތަކަކީ ކުޅިވަރުގެ ރޫހާއިވެސް ޚިލާފު އަމަލުތަކެއްކަމަށާއި، މިފަދަ ކަންކަން ތަކުރާރުވިޔަ ނުދިނުމަށް މިޔަށްވުރެ ފުރިހަމައަށް އިންތިޒާމުތައް ހަމަޖައްސަން ޖެހޭކަން އޭނާ ފާހަގަކުރެއްވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
